¿Diospa Gobiernunqa shonquntsikchöku këkan?
Bibliachö yachatsikunqan
Diospa Gobiernunqa manam cristiänukunapa shonqunllachötsu këkan.a Tsë gobiernu mëchö këkanqampaq parlarmi, Bibliachöqa cläru willakun, Diospa Gobiernunqa ciëluchö këkanqanta (Mateu 4:17). Bibliachömi rikätsikun, tsë gobiernuqa rasumpa kanqanta y ciëlupita gobernëkämunqanta. Tsëpita masllata yachakurishun.
Diospa Gobiernunchöqa kanmi, gobernaqkuna, tsë gobiernu gobernanqan nunakuna y leykunapis. Diospa Gobiernun gobernamuptinqa, ciëluchö y Patsachöpis Teyta Dios rurëta munanqanmi cumplikanqa (Mateu 6:10; Apocalipsis 5:10).
Diospa Gobiernunqa, “mëtsë markakunachö y nacionkunachö” nunakunatam gobernanqa (Daniel 7:13, 14). Tsë gobiernuchö gobernaqtaqa, manam nunakunatsu akrayashqa, sinöqa Teyta Diosmi churashqa y Diospita autoridäta chaskishqa karmi nunakunata diriginqa (Salmus 2:4-6; Isaïas 9:7).
Mana imëpis dejaq apostolninkunatam Jesusqa nirqan, Diospa Gobiernunchö pëwan juntu kayänampaq kaqta. ¿Peru imata rurayänampaq? Kikinmi nirqan, “gobernar täkunaman” jamakuyänampaq kaqta o pëwan juntu gobernayänampaq kaqta (Lücas 22:28, 30).
Diospa Gobiernunqa, tsë gobiernuta chikeqkunatam ushakätsinqa (Salmus 2:1, 2, 8, 9; 110:1, 2; 1 Corintius 15:25, 26).
Rikanqantsiknöpis, manam Bibliachöqa nintsu, Diospa Gobiernunqa shonquntsikpita gobernanqanta. Tsëmi Diospa Gobiernunqa shonquntsikchötsu këkan. Tsënö kaptimpis, Bibliachöqa ninmi “Diospa Gobiernumpita alli noticiakunata” o ‘Diospa Gobiernumpita wiyanqantsik’ shonquntsikman chëta puëdinqanta, y shonquntsikman chänanta dejanapaq kaqta (Mateu 13:19; 24:14).
¿Peru manaku Jesusqa, “Diospa Gobiernunqa qamkunapa rurikikunachömi këkan” nirqan?
Lücas 17:21 ninqantam wakin Bibliakunachöqa kënö nir traduciyashqa: “Diospa Gobiernunqa qamkunapa rurikikunachömi këkan” (Biblia Americana San Jerónimo). Tsëmi wakin nunakunaqa pensayan, Diospa Gobiernunqa shonquntsikchö këkanqanta. Tsënö kaptimpis, tsëchö ninqanta alli entiendinapaqqa, qepanchö y puntanchö imapaq parlëkanqantam musyanantsik.
Jesusta wanutsita munaq nunakunapa shonqunkunachöqa, manachi Diospa Gobiernun këkanmantsu
Jesus tsënö nirqa, fariseukunatam parlapëkarqan. Tsë grüpuchö kaqkunata dirigeqkunaqa, Jesusta alläpa chikirmi wanutsiyänampaq yachatsinakuyarqan (Mateu 12:14; Lücas 17:20). Tsëqa, ¿tsë mana alli nunakunapa shonqunkunachö Diospa Gobiernun këkanqantaku Jesus nikarqan? Manam. Kikin Jesusmi pëkunata kënö nirqan: “Shonquykikunachöqa allish tukoq y mana allita ruraqmi kayanki” (Mateu 23:27, 28).
Wakin Bibliakunachöqa, Lücas 17:21 textuchö ninqantam mas cläru rikätsikuyashqa. El Nuevo Testamento original neq Bibliachömi kënö nin: “Diospa Gobiernunqa qamkunapa läduykikunachönam këkan”. Mushoq Patsachö Kawaqkunapaq Bibliachönam kënö nin: “Diospa Gobiernunqa qamkunachönam këkan”. ¿Imanötan Diospa Gobiernunqa fariseukunapa lädunchöna o pëkunachöna këkarqan? Tsënöqa karqan, Gobiernunchö gobernanampaq Teyta Dios akranqan Jesus pëkunachöna këkaptinmi (Lücas 1:32, 33).
a Mëtsika religionkunachömi yachatsikuyan, Diospa Gobiernunqa nunakunapa shonqunchö këkanqanta. Maslla musyarinapaq, Estädus Unïduschö Convencion de Bautistas del Sur niyanqan reqishqa religionchö nunakunam, juk kuti niyarqan, Diospa Gobiernunqa “nunakunapa shonqunkunachö y vïdankunachö këkanqanta”. Jesus de Nazaret tïtuluyoq librunchönam Benedicto XVI papa kënö nirqan: “Diospa Gobiernunqa, cäsukoq nunakunapa shonqunkunapam chämun. Tsëmi nänin cuenta”.