¿Pikunaraq Diospa amigonkuna kayan?

Jesucristoqa Jehovapa Tsurinmi, allapa kuye amigonmi. Jesusqa manaraq nunano Patsaman shamurninmi, tärarqan cielocho, allapa kallpayoq espiritum karqan (Juan 17:5). Tsepeqnam shamorqan Patsaman, nunakunata Diospita yachatsinampaq (Juan 18:37). Hinamampis wanorqan noqantsikpa hutsantsik-rekur, tsenopa wanïpita horqamänantsikpaq wiyakoqkunata (Romanos 6:23). Kananqa Jesusqa Reynam Diospa Reinoncho, kë gobiernoqa cielochomi kekan, ruramonqa Patsachomi paraisota (Revelación 19:16).

Angelkunapis Diospa amigonkunam kayan. Angelkunaqa manam ni imepis Patsacho kawayashqatsu nunano. Pekunataqa Jehová kamarqan cielochomi, manaraq Patsatapis rurarninmi (Job 38:4-7). Atska millonmi angelkunaqa kayan (Daniel 7:10). Cielocho Diospa amigonkunaqa, munayanmi Jehovapita nunakuna yachakuyänanta (Revelación 14:6, 7).

Patsachöpis Diospa amigonkunaqa kayanmi; Jehovaqa testigokunam ninmi. Huk testigoqa Juezkuna nöpancho, llapan musyanqantam parlan, pipaqkarpis, imapitakarpis. Tsenomi Jehovapa testigonkunapis parlapäyan wakin nunakunata Jehovapita, llapan Patsapaq ruramunantawan (Isaías 43:10). Angelkunanomi, Testigokunapis munayan yanapashïnikita, Jehovapita yachakunekipaq. Qampis Jehovapa amigon kanekitam munayan.