Familiachö kushishqa kawakunapaq

BIBLIACHÖ YACHATSIKUNQAN

“¡Diospa palabranta wiyaqkuna y cäsukoqkunam kushishqaqa kayan!” (Lücas 11:28).

¿IMANÖTAN TSËTA MUSYANQANTSIK YANAPAMANTSIK?

Rasumpa kuyanakunapaq (Efesius 5:28, 29).

Rasumpa respetanakunapaq (Efesius 5:33).

Familiachö juknölla kawakunapaq (Marcus 10:6-9).

¿IMANIRTAN BIBLIA NINQANMAN CREISHWAN?

Këkunarëkurmi:

• Diosmi familia kamaqqa. ‘Familiakunata’ Jehovä Dios kamaq kanqantam Bibliaqa nin (Efesius 3:14, 15). Tsëmi cläru rikantsik familiakunataqa Jehovä kamashqa kanqanta. ¿Imanirtan tsëta musyëqa alli?

  Këman pensë: Alläpa mishki mikuyta mikuykankiman, y gustashuptikina pensankiman imanö y imakunawan rurayanqanta, tsëqa ¿pitaraq tapurinkiman? Cocinaqtachi tapurinkiman.

  Tsënöllam familiachö kushishqa imanö kawakunapaq kaqta musyëta munarqa, familiata kamaq Jehovä Diosta tapukunantsik (Genesis 2:18-24).

• Diosqa noqantsikpaq yarpachakunmi. Familiëkiwan Bibliachö consëjukunata ashiyë. Jehoväqa, “qamkunapaqmi alläpa yarpachakun” (1 Pëdru 5:6, 7). Jehoväqa llapantsik alli kawakunatam munan y consëjunkunaqa imëpis yanapakunmi (Proverbius 3:5, 6; Isaïas 48:17, 18).