¿Wanushqakuna o wañushqakuna kawariyämunqatsuraq?

BIBLIACHÖ YACHATSIKUNQAN

‘Allita ruraqkunata y mana allita ruraqkunatapis, Teyta Diosqa kawaritsimunqam’ (Hëchus 24:15).

¿IMANÖTAN TSËTA MUSYANQANTSIK YANAPAMANTSIK?

Kuyë familiantsik wanuptinqa manam alläpa llakikushuntsu (2 Corintius 1:3, 4).

Manam wanuyta alläpa mantsashunnatsu (Hebrëus 2:15).

Wanushqa kuyë familiantsikwanmi yapë tinkushun (Juan 5:28, 29).

¿IMANIRTAN BIBLIA NINQANMAN CREISHWAN?

Këkunarëkurmi:

• Diosmi kawëkaqta katsimantsik. Bibliachömi kënö nin: “Teyta Dios, qamllam kawatsiyämanki” (Salmus 36:9; Hëchus 17:24, 25). Llapan kawëkaqkunata kamashqa këkarqa, ¿manatsuraq wanushqakunata kawatsimunman?

• Unë tiempuchöpis Diosqa nunakunata kawaritsimurqanmi. Bibliachöqa willakun puwaq kawariyämunqantam, y pëkunaqa ollqukuna, warmikuna y wamrakunam kayarqan. Wakinqa tsëllaraqmi wanushqa kayarqan, peru juk nunaqa chusku junaqnam wanushqa karqan (Juan 11:39-44).

• Diosqa wanushqakuna yapë kawayänantam munan. Jehoväqa chikinmi wanuyta (1 Corintius 15:26). Pëqa, tsë chikinqan wanuytam pasëpa ushakätsita munan, tsëtaqa ruranqa wanushqakunata kawatsimurmi. Pensëninchö këkaqkunatam Patsachö kawëkaqta rikëta munan (Job 14:14, 15).