Abrahanqa markäkoq nunam karqan

Shumaq paqaschömi Abrahanqa ciëlochö mana yupëtapis puëdepaq mëtsika qoyllurkunata rikarëkan. Mëraq yarpan qoyllurkunanö mëtsika kastankuna kanampaq kaqta Dios awninqanman (Génesis 15:5). Tsë rikëkanqanqa manam Dios awninqanllatatsu yarpätsin, sinöqa awninqanta cumplinampaq kaqtawanmi. Jehová hinantin ciëlota kamëkarqa, ¿manatsuraq pëtawan Särata huk wamran qonman? ¡Alläpa markäkoq nunam Abrahanqa karqan!

¿IMATAQ MARKÄKÏQA? Bibliaqa nin markäkoq nunaqa mana rikanqanta chaskinampaq kaqman llapan shonqunwan creinqantam, tsënö kanampaq kaqta tukï rikätsiptin. Tsëmi Diosman markäkoqkunaqa awnikunqanta cumplinampaq kaqman paqwë creiyan, y cumplikashqatanönam rikäyan.

¿IMANÖTAQ ABRAHAN TSËTA RIKÄTSIKURQAN? Dios awninqankunaman creinqanta rikätsikurmi. Diosman markäkurmi yurikunqan nacionta haqirirqan, y huk markaman Dios chätsinampaq kaqta shuyararqan. Diosman markäkurmi forastëronö hinantin Canaanpa purirqan tsë markata mirëninkuna chaskiyänampaq kaqta shuyarar. Hina markäkurmi Diosta wiyakurqan y tsurin Isaacta sacrificänampaqpis listo këkarqan, y musyarqanmi awnikunqanta cumplinanrëkurqa tsurinta Dios kawaritsita puëdenqanta (Hebreus 11:8, 9, 17-19).

Chaskinampaq kaqkunamanmi yarpararqan, y manam haqinqan kaqkunamantsu. Abrahanwan Säraqa, mëraq Canaán nacionpitapis más alli Ur markachöqa täkuyarqan. Pero “pecunaqa mananam yarpäyarqannatsu yarqucuyanqan marcaman cutitaqa” (Hebreus 11:15). Tsëpa rantinqa, pëtawan mirëninkunata Dios imanö bendecinampaq kaqmanmi yarparäyarqan (Hebreus 11:16).

¿Mana allitaku Abrahan rurarqan Diosman markäkur? Manam. Jehoväqa llapan awninqantam cumplirqan. Abrahanpa tsurinkunaqa paqwë mirarmi Israel shutiyoq alläpa hatun nacionman tikrariyarqan. Hinamampis israelïtakunaqa Abrahanta Dios awninqan Canaán markachömi patsakäyarqan (Josué 11:23).

¿IMATATAQ YACHATSIMANTSIK? Awnikunqankunata Jehová cumplimunanman markäkïta puëdenqantsiktam. Y wakin awnimanqantsikkunata cumplimunan noqantsikpaq alläpa sasanö o ajanö kaptimpis, yarpäshun, “Diospaqqa manam imapis sasatsu” (Mateo 19:26).

Hina Abrahanqa yachatsimantsik haqinqantsikkunaman yarparäkunapa rantin, imëka allikunata chaskinapaq kaqman pensanapaqmi. Tsënömi ruran Jason shutiyoq nuna, pëqa huk qeshya tsarishqa kaptinmi kuyukïta paqwë puëdentsu. Tsëmi kënö nin: “Höraqa puntata ruranqäkunata manana rurëta puëdenqämanmi pensä. Alläpam llakikö unë ruranqäkunata manana rurëta puëder, kananqa mananam warmi Amandata waqurkïllatapis [makallarkuytallatapis] puedënatsu”.

Tsënö kaptimpis, Jasonqa markäkunmi llapan awnikunqankunata Dios cumplirnin, kë Patsata huk paraïsoman tikratsinanta y llapan wiyakoq nunakunata mana wanushpa kawakïnin y alli saludnin qonampaq kaqman (Salmo 37:10, 11, 29; Isaías 35:5, 6; Apocalipsis 21:3, 4).a Kënömi nin: “Alläpa alli kawakï chämunampaq kaqman, y ichikllachöna peqa nanë, alläpa yarpachakïkuna, llakinë y mana imapaq sirweqnö sientekï ushakärinampaq kaqta yarpänäpaqmi sinchikö”. ¡Pëpis Abrahannö markäkoq kanqanqa alläpam yachatsimantsik!

[Päginapa ura kuchunchö willakï]