BIBLIAPITA TAPUKÏKUNA
¿Mas allitsuraq shamoq tiempuchö kawakushun?
Jesus wanunqanrëkurmi, alläpa shumaq Patsachö kawakushun. ¿Imanötaq tsëqa cumplikanqa?
Kanan witsanqa imëkapis avansëkanmi. Peru ¿tsëqa yanapakunqatsuraq nunakuna mas alli kawakuyänampaq y wakinkunapaq yarpachakuyänampaq? Itsa mana. Kanan witsanqa kikinkunallapaq munëmi alläpa mirëkun. Tsënö kaptimpis Diosqa munan nunakunapaq mas alli kaqtam. (Leyi 2 Pëdru 3:13.)
Bibliaqa willakun shamoq tiempuqa entëru Patsachö kuyakï mas kanampaq kaqtam. Nunakunaqa segürum sientikuyanqa y manam ni pï mana allitaqa ruranakuyanqanatsu. (Leyi Miquëas 4:3, 4.)
¿Imanöraq ushakanqa kikintsikllapaq imëkata munë?
Adantawan Ëvata Dios kamarqa, manam kikinkunallapaq munëyoqtatsu kamarqan, porqui jutsannaqtam kamarqan. Peru Diosta mana wiyakunqanrëkurmi Adanqa jutsannaq këninta oqrarirqan. Noqantsikqa, pëkunapitam chaskirquntsik kikintsikllapaq munëta y jutsasapa këta. Peru Jesusrëkurmi Diosnintsikqa jutsannaqtana tikratsimäshun. (Leyi Romänus 7:21, 24, 25.)
Diospa munëninrëkurmi Jesusqa kawëninta entregarqan, tsënöpa punta kaq nuna jutsallakunqanta pagakunampaq (Romänus 5:19). Awmi, Jesus wanunqanrëkurmi llapan nunakunata alläpa shumaq kawakï shuyarämantsik, jutsayoq kë y kikintsikllapaq munëqa manam kanqanatsu. (Leyi Salmu 37:9-11.)