Cristo ruranqanta qatishun respëtowan
1. ¿Asamblea de distritopa tëman, imanötan käyitsimantsik respetakï importante kanqanta?
1 Jehová Dios Autoridadyoq cielota Patsata Gobernamoq, këkan honrawan vestishqam, ninmi Biblia (Sal. 104:1). Jesusqa, parlënincho y rurënincho Teytanta y arreglonkunatam honrarqan (Juan 17:4). Shamoq Asamblea de Distrito “¡Cristo ruranqanta qatishun!” nishqanmi kanqa huk alli oportunidad llapantsik Jesuspa ejemplonta qatinapaq, y tsënö Jehová Diosta alabanapaq.
2. ¿Imanötan Jehovata honran cada hunaq asambleapaq alistapakunqantsik?
2 Adorashun respëtowan: Jehová qomanqantsik asambleaman ëwëta pensëkarninqa, pëtam honrashun. ¿Parlashkankinaku patronnikiwan, y alistakïkankinaku kiman hunaq asambleata ewanëkipaq? ¿Rurëkankinaku arreglokunata tempranolla chëkurnin ashinëkipaq huk asientota, tsënö canticocho y qallarinan oracioncho kanëkipaq? ¿Pensashqankiku apëta mikïnikita asambleaman, wawqi y panikunawan mikunëkipaq? Cada hunaq manaraq música qallaptin, puntaman yarqamoq wawqi hamakunapaq invitamashqa, parlanantsiknatsu y hamakunantsik programa qallanampaq.
3. ¿Imanötan honrantsik Jehovata, asambleacho alli wiyakurnin?
3 Asambleata alli wiyashqaqa Teyta Diosta honranqam. Huk asamblea de distritota rikärirninmi huk periodista qellqarqan, pipis rikarnenqa sorprendishqam rikaräyanmam karqan, “alli comportakïninkunata, y respëtowan llapan yachatsikïkunata wiyëkäyanqanta”. Hina parlarqanmi, “llapan wambrakunapis alli comportakuyanqanta y Bibliacho versïculokunata ashiyanqanta”. Asamblea programa qallariptenqa manam parlakïkashwantsu, ni mikukïkashwantsu, ni tumëkachëkashwannatsu. Jovenkunaqa teytankunawanmi tärayänan tsënö alli programata wiyayänampaq (Deu. 31:12; Pro. 29:15). Tsënöpam, espiritualkaq mikï chaskinqantsikta agradecikuntsik y wakinkunata respetanqantsikta rikätsikuntsik.
4. ¿Asamblea de distritoman ëwarnin, imanirtan vestikushwan respëtowan?
4 Vestikushun respëtowan: Pasaq wata asamblea de distrito “Rikätsikushun respëtota llapancho” nishqan discursocho yarpätsikikunata atskaqmi agradecikuyarqan, këchömi yarpätsimarqantsik llapan cristianoqa kallpachakunapaq vestikïnintsikchö y adornakïnintsikchö, tsënöpa respëtota rikätsikunapaq. Kë watapismi yarpänantsik alli vestikïnintsikman. Adornakïnintsikqa rikätsikunan Jehová Diosta kuyanqantsikta, y pëpa Testigon kanqantsiktam. Imëpis vestikunantsik “Diosta adoraq” nunakunanömi (1 Tim. 2:9, 10).
5. Asamblea ushariptin, ¿imanötan vestikïnintsikwan rikätsikushun Jehová Diospa serviqninkuna kanqantsikta?
5 ¿Asambleaman ewarllatsuraq vestikushwan respëtowan? Yarpë, asambleapa shutinta tarjetachö apanqantsiktam rikäyanqa nunakuna tsë asamblea kanqan markachö. Wakin nunakunapita hukläya kanqantsiktam rikätsikunan vestikïnintsikqa. Tsëmi programa ushariptin mikoq yarqurpis respëtowan vestikunantsik Jehová Diosta serviqno, y manam ëwashwantsu shortyoq ni poloyoq tsënömi rikätsikushun asamblea rëkur tsë markachö këkanqantsikta. Tsëmi rikämaqnintsikkuna shumaq parlayanqa Jehová Diospita. Vestikïnintsikwanmi Jehová Diospa shonqunta kushitsishun, Pëpa serviqninkuna kanqantsikta rikätsikushun.
6. ¿Imanirtan llapan respëtowan ruranqantsik envanotsu kashqa?
6 Manam envanotsu kashqa: Asamblea de distritocho llapanta respëtowan rurashqaqa rikämaqnintsikkunatapis Bibliapita parlapëta puedeshunmi. Huk guardiakunapa mandakoqninmi asamblea ushariptin nerqan: “Manam ni imëpis rikashqantsiktsu këläya alli portakïyoq nunakunata. Qamkunaqa Dios munanqannömi kayanki”. Llapanta respëtowan rurarnenqa rikätsikushun kikintsikpura kuyanakonqantsikta y tsëmi Jehová Diosta glorificanqa (1 Ped. 2:12). Tsënö ruranqantsikqa, Teyta Jehovapa yachatsikïninkunaman agradecido kanqantsikta y respëtowan Pëta mantsanqantsiktam rikätsikonqa (Heb. 12:28). Asamblea de Distrito “¡Cristo ruranqanta qatishun!” nishqan asambleantsik chämonqanyaq, llapan rurënintsikcho rikätsikushun respëtota.
[5 kaq päginachö recuadru]
Asamblea de distritopaq yarpätsikïkuna
◼ Asambleapa horarion: Kiman hunaqmi asamblea qallanqa 9.20 qoyapa, punkunam kicharanqa 8.00 qoyapa. Música qallëkuptinllam llapantsik hamakurinantsik, tsënöpa asamblea shumaq respëtowan qallanampaq. Viernes y sabadoqa 5.05 ushanqa asamblea, y domingonam 4.10 ushanqa.
◼ Carro cuadrakunan: Manam atska carro cuadrakunampaq sitio kanqatsu, tsëmi kallpachakushwan, huk carrollacho atskaq ewanapaq.
◼ Asientokuna churaki: Noqantsikwan cärrocho ewaqkunallapaq y wayintsikcho täranqantsikkunallapaqmi asientonqa churapushwan.
◼ Mikï hora: Ichik täperkunallacho mikïnikikuna apayë mana kichkitäyäshunëkipaq, y tsënöpa waqtata mikï ranteq mana yarquyänekipaq. Manam asambleaman ewashwantsu atska mikïnintsik aparipäkushqa, ni manam apashwantsu pakina botellakunata, ni washkutapis.
◼ Qellë hitakï: Asamblea de distrito ruranan alläpa chaniyoq kaptinmi, agradecikonqantsikta rikätsikushwan ekallatapis cäjakunaman hitakurnin, këtaqa rurashun Ëllukäna Wayicho o asambleachöpis, tsënöpa hinantin Patsachö willapäkïta yanapakunapaq.
◼ Imapis pasamashqa y qeshyakurkushqa: Asambleacho këkashqa imapis pasëkuptin, willë tsëchö këkaq acomodadorta, pënam raslla willanqa Departamento de Primeros Auxilios nishqanta, tsënöpa alli tantiyaq wawqi rikänampaq y imata karpis ruranampaq.
◼ Grabadorakuna: Manam ni imanö grabadorakunata inshinapaq enchufashwantsu asamblea këkaq wayimanqa, ni imatapis inshishwantsu wiyakïkaqkuna puntampa tsaparnenqa.
◼ Sírvase visitar, formulariokuna: Sírvase visitar (S-43) nishqan formulariotam apashwan asambleacho këkanqantsikyaq, willapanqantsikkunapa shutinta y mëcho täranqantapis qellqanapaq. Llapan publicadorkunam apayanman huk o ishkë formulariota asambleaman ewar. Tsëpitana asambleapita kutirnin, alli qellqashqa formulariota qoyanki congregacionpa secretarionta (rikäri Nuestro Ministerio del Reino de febrero de 2005, página 6).
◼ Posäda: Posadatsikita munarqa congregacionpa secretarionwan parlashun, y tsëpita raslla formulariota qellqarkur pëta qoykushun. Huk markachö asambleaman ewëta munar y posadata wanarqa, secretariowan parlë y solicitudta qellqarïkur tsë wawqita qoyki, pënam apatsenqa asambleaman ewanëki markaman. Kë formulariota qellqanëkipaqqa ama asamblea chämunantaraqqa shuyarëtsu, tsëqa posäda asheqkunapaqmi sasa kanqa (1 Cor. 14:40). Posadakoqkuna y wambrankunaqa respetayänanmi posadatsikoqpa wayinta, imantapis mana ashipakurnin, ni pakipakurnin, hina manam yëkuyanmantsu cuartonkunamampis. Yarpäshun, posäda wayiqa asamblea hunaqkunallapaqmi. Manam allitsu kanman wakin markakunata reqipakita munarnin, posadacho unë quedakita munëqa.