Jatun asamblëakunaqa rasun kaqtam musyatsikun
1. ¿Imakunamantaq yarpachakuyaq israelïtakuna Diosta adorayänan fiestankunachö?
1 Israelïtakunaqa watachö kima o kimsa kutim ëllukäyaq o qorikäyaq Diosta adorayänan fiestankunapaq. Ollqu kaqkunalla ëwayänan kaptimpis, llapan familiankunawanmi tsë fiestaman Jerusalenyaq viajayaq (Deu. 16:15, 16). Tsëchömi Diospita yachakuyanqanman yarpachakïta puëdeyaq. Maslla tantearinapaq, yarpachakuyaq Jehoväqa kuyakoq Dios kar necesitäyanqankunachö yanapanampaq kaqman (Deu. 15:4, 5); o imëpis tsapänampaq y yachatsinampaq kaqman (Deu. 32:9, 10), o Diospa akrashqan marka karnin alli kaq rurëta rikätsikuyänampaq kaqmammi (Deu. 7:6, 11). Kanan witsan jatun asamblëantsikkunapis tsëkunaman pensanapaqmi yanapamantsik.
2. ¿Imanötaq asamblëachö discursokuna yanapamantsik rasun kaqta entiendenapaq?
2 Tsëchö yachatsikïkunam yanapamantsik rasun kaqta entiendenapaq. Jatun asamblëakunachö discursokunata, drämakunata, demostracionkunata y intrevistakunata wiyakunqantsikmi yanapamantsik rasun kaqta Biblia ninqanta yachakunapaq (Juan 17:17). Jehoväpa markanqa unëpitanam alistëkämushqa llapantsik shuyaranqantsik yachatsikïkunata (Mat. 24:45-47). ¿Manaku kushikuntsik tsë llapan yachakunantsikpaq kaqman pensar?
3. ¿Imataq yanapamäshun asamblëachö alli yachakunapaq?
3 Asamblëachö yachatsikayämunqanta alli yachakunapaqqa, ishkan junaqmi ëwanantsik y shumaqmi wiyakunantsik. Yarpë, kananllapitana trabäjopita permisota mañakunëkipaq kaqta. Ishkan junaq yachatsikayämunqanta alli wiyakunëkipaqqa, paqaspam alleq pununëki. Wakinkunataqa yanapashqa discursamoqta rikaräyanqan y cuadernonkunaman precisaq kaqta apuntayanqanmi. Tsëmi celularniki kaptinqa mana büllaq kaqllaman programanëki wakinkunata o qamtapis mana pantatsishunëkipaq. Y asamblea höraqa procurë mana parlanëkipaq, mensäjetapis mana apatsinëkipa ni mikunëkipaq o mana upunëkipaq.
4. ¿Imanötaq teytakuna wamrakunata yanapayanman asamblëapita yachakuyänampaq?
4 Qanchis kaq watakunachöqa israelïtakuna ëllukäyaq o qorikäyaq ramäda wayinkunata rurëkur celebrayänan fiestachö Leyta leiyanqanta wiyakuyänampaqmi. Llapan familiakunam jina wamrakunapis yachakuyänampaq y wiyakuyänampaq juntakäyaq (Deu. 31:12). Kanan witsampis alläpa kushikïpaqqa llapan familiakuna y wamrakunapis mana punurlla asamblëata shumaq wiyakuyanqanmi. Allim kanman wayiman chärirnin apuntanqantsikkunata yapë rikärishqaqa y imachöpis yanapamanqantsikta parlarishqaqa. “Wamrakunapa shonqunchöqa upa këmi këkan”, tsëmi teytakunaqa wamrakunata ‘llutaqa’ dejariyanmantsu. Allichi más jövenna kaqkunatapis rikäyanman asamblëachö y posädakunachöpis (Pro. 22:15; 29:15).
5. ¿Imanötaq alli portakïnintsik rasun kaqta shumaqyätsin?
5 Alli portakunqantsikmi rasun kaqta shumaqyätsin. Asamblea kanan markachö këkar shumaq portakunqantsikmi rasun kaqta shumaqyätsin (Titu 2:10). Hotelchö trabajaqkunaqa alläpam kushikuyan posadakoqkuna respetöso kayaptinqa (Col. 4:6). Pasaq wata sucursalpita asamblëaman ëwaqkuna juk hotelchö quedakuyänampaq conträtota rurëkaqta rikarmi, tsë hotelchö trabajaq warmi kënö nirqan: “Alläpam kushikuyä Jehoväpa testïgonkuna kë hotelchö quedakuyaptin, pëkunaqa alläpa kuyakoq y respetöso nunakunam o runakunam kayan. Jina këchö trabajaqkunatapis respetayanmi y imëkatapis kikinkunapatanömi cuidayan”.
6. Asamblea kanan markachö këkar shumaq vestikunqantsik, ¿imanötaq rasun kaqta shumaqyätsinman?
6 Soläpata churakunqantsikqa manam pï kanqantsikta o asamblea kanqanta musyatsikunallapaqtsu sirwin, sinöqa rasun kaqta musyatsikunapaqwanmi. Rikämaqnintsikkunaqa cuentata qokuyanqam imanö vestikushqa kanqantsiktapis, tsëmi cristiänonö shumaq vestikunantsik (1 Tim. 2:9, 10). Asamblea kanan markachö, y posädachö këkarpis shumaqmi vestikunantsik. Lluta vestikushqa mëmampis chashqaqa Jehoväpaq manam allitatsu parlayanqa. Asamblea local imanö kaptimpis noqantsikqa shumaq vestikushqam ëwanantsik. Y ushariptin mikoq ëwanapaq röpantsikta cambiakurpis, ama qonqashuntsu asamblëaman shamunqantsikta.
7. ¿Imanötaq cristiano mayintsikkunawan shumaq pasarintsik?
7 Israelïtakunaqa alläpa kushishqam pasayaq juk markakunapita y juk nacionpita fiestaman shamoqkunawan, tsënöpam rikätsikuyaq juknölla kayanqanta (Hech. 2:1, 5). Y kanan witsan jatun asamblëantsikkunachöpis tsëtam claro rikantsik. Diosta alabar cristiano mayintsikkunawan shumaq pasarinqantsiktaqa wakin nunakuna o runakuna rikämarnintsik espantakuyanmi (Sal. 133:1). Jina waqtata mikoq yarqunapa rantinmi local-llachö mirkapantsikta mikur, mana reqinakunqantsik cristiano mayintsikkunawan reqinakur parlarintsik.
8. ¿Imanirtaq puëderqa asamblëakunachö yanapakushwan?
8 Nunakunaqa espatakuyanmi asamblëantsik alli yarqunampaq patsätsiyanqanta o rurëkayanqanta rikarnin, masnäqa trabajaq kaqkuna pägota mana chaskirlla yanapakuyanqanta rikarninmi. ¿Qampis asamblëachö yanapakïta ‘munankimantsuraq’? (Sal. 110:3.) Atskaq teytakunam wamrankunawan yanapakuyan, tsënöpam yanapakoq këta yachatsiyan. Si qam, amigo rurëta mantsakoq kaptikiqa, asamblëachö yanapakunqëkim yanapashunki. Juk panim kënö nirqan: “Familiata y juk ishkë amïgokunallatam reqirqä. Pero asamblëachö pitsapakur yanapakurqa, más atskaqwannam reqinakuriyarqä. ¡Alläpa shumaqmi karqan!”. Asamblëachö yanapakur maskunawan reqinakurqa más kushishqam kashun (2 Cor. 6:12, 13). Imëpis mana yanapakushqa karqa anciänokunata tapuri imanö ruranëkipaq kaqtapis niriyäshunëkipaq.
9. ¿Imataq rurakanqa wakin nunakunatapis asamblëantsikman invitakunapaq?
9 Wakinkunatapis invitashun rasun kaqta wiyayänampaq. Pasaq watakunanöllam, kë watapis asamblëapaq kima o kimsa semana pishikaptim pï mëta invitashun. Congregacionkunaqa territorionkunachö këkaqkunatam llapankunata invitëta tïrayanqa o kallpakuyanqa (rikäri, “¿Imanötaq invitakushun?” neq recuadrota). Invitacionta sobrapakurqa asamblëamanmi apashwan wakinkunapis tsëwan invitakayämunampaq.
10. Asamblëapaq invitakunqantsik imanö yanapakunqantapis willakaramï.
10 ¿Yanapakunku invitakunqantsik? Juk asamblëachömi juk acomodador shumaq chaskirirqan juk matrimoniota. Pëkunam willakuyarqan invitacionta chaskirir imanö kanqantapis musyëta munar shayämunqanta. Y 300 kilömetrospitapis mastam asamblëaman autowan viajayarqan. Juk kutichönam juk pani wayin wayin invitakur purikar juk nunata o runata invitacionnin qoykurqan. Shumaq wiyaptinmi invitación imapita parlanqanta yacharatsirqan. Y asamblëachönam paniqa tsë invitanqanta amïgontawan rikärirqan, y mushoq publicaciontam këkätsiyarqan.
11. ¿Imanirtaq alläpa precisan jatun asamblëantsikkunaman wata wata ëwanantsik?
11 Israelïtakunapa fiestankunaqa Jehoväpa qarëninmi karqan, tsëmi yanapaq “rasumpa y limpio” sirwiyänampaq (Jos. 24:14). Tsënö kaqllam kanan witsan jatun asamblëantsikpis yanapamantsik imëpis ‘rasonpa caqcho puricanapaq’ y alläpam precisan Diosta alabanapaq (3 Juan 3). Rasumpa kuyaqkunata y alli yachakuyänanrëkur wata wata asambleakunaman imëkanöpapis ëwaqkunata Jehová bendecïkunantam munayä.
[4 kaq päginachö ninqan]
Asamblea kanan markachö këkar shumaq portakunqantsikmi rasun kaqta shumaqyätsin
[5 kaq päginachö ninqan]
Asamblëapaq kima o kimsa semana pishikaptinmi pï mëta invitashun
[5 y 6 kaq päginakunachö recuadru]
2012 wata jatun asamblëapaq yarpätsikïkuna
◼ Asamblea qallanampaq. Punkuqa las 8:00 a.m. kicharëkanqanam. Música qallëkuptinllam llapantsik jamakurinantsik, tsënöpam Jehová Diosta respetanqantsikta rikätsikushun.
◼ Carro cuadrakunan. Manam atska cärrokuna cuadrakuyänampaq sitio kanqatsu, tsëmi juk cärrollachö atskaq ëwëta procurayänëki.
◼ Asientokuna. Qamwan cärrochö ëwaqkunallapaq o junto yachayanqëkikunallapaq y qamwan Bibliata estudiaqkunallapaqmi asientotaqa rakinëki (1 Cor. 13:5).
◼ Mirkapa. Waqtaman ranteq mana yarquyänëkipaq y mana kichkipäyäshunëkipaq täperkunallachö mirkapëkikuna apakuyë. Manam asamblëaman ëwashwantsu atska mikïnintsik aparipäkushqa, ni manam apashwantsu pakina botëllakunata ni washkutapis.
◼ Qellëwan yanapakushun. Jatun asamblëapita agradecikunqantsiktaqa rikätsikushun, asamblëachö ëkallatapis cäjakunaman winarmi, tsënöpa entero Patsachö yachatsikïta yanapakunapaq. Chëquechö qoyta munaqkunaqa “Christian Congregation of Jehovah’s Witnesses” nirmi churayänan. Kë watapita qallëkurqa tarjeta de dëbitowan y crëditowampis yanapakïta puëdentsikmi.
◼ Imapis pasamashqa y qeshyakurkushqa. Asamblëachö këkashqa imapis pasëkuptin, willë tsëchö këkaq acomodadorta, pënam raslla willakunqa Primeros Auxiliosman, tsënöpa jampikïta yachaq wawqi o pani rikänampaq y imata karpis rurayänampaq.
◼ Jampikuna. Médico jampita recetashushqa kashuptikiqa mana qonqëllata asamblëaman apë, porque tsëchöqa manam tsë jampikuna kanqatsu. Diabético karnin agüjakunata y jeringakunata utilizarqa, asamblëachö o hotelchö këkarpis basurërokunaman manam jitarinëkitsu, tsëkunaqa alläpa peligrösom kayan.
◼ Sírvase visitar formulariokuna (S-43). Asamblea junaqkunaqa, juk o ishkë formulario Sírvase visitar nishqanta allichi apankiman, tsënöpa pitapis parlapaptiki shumaq wiyaptinqa jutinta y mëchö täranqantapis qellqanëkipaq. Nïkurnam qellqashqa formulariota Departamento de Publicaciones nishqanta o congregacionnikipa secretarionta entreganëki (rikäri Diospita Yachatsikunapaq mayo de 2011, pág. 3).
◼ Restaurantekuna. Restaurantekunaman mikoq ëwarnin shumaq portakunqantsikwanmi Diosnintsikpa jutin reqishqa kanqa.
◼ Posada. Posadatsikïta munarqa congregacionnintsikpa secretarionwan parlashun, y tsëpita raslla formulariota qellqarkur pëta qoshun. Juk markachö asamblëaman ëwëta munar y posädata munarqa, secretariowan parlë y solicitudta qellqarïkur tsë wawqita qoyki, pënam apatsinqa asamblëaman kanan markaman. Kë formulariota qellqanëkipaqqa asamblea chämunantaraqqa shuyarëtsu, manaqa posäda asheqkunapaqmi sasa o aja kanqa (1 Cor. 14:40). Posadakoqkuna y wamrankunaqa respetayänanmi posadatsikoqpa wayinta, imantapis mana ashipakurnin, ni pakipakurnin, jina manam yëkuyanmantsu cuartonkunamampis. Yarpäshun, posädaqa asamblea junaqkunallapaqmi. Manam allitsu kanman wakin markakunata reqipakïta munarnin unë quedakïqa.
◼ Yanapakïta munaqkunapaq. Asamblëachö yanapakïta munarqa Departamento de Servicio Voluntario nishqanman witirishun. Jina teytan maman o wätaqnin o pipis mayor kaqkuna rikëkäyaptinqa, 16 watayoq wamrakunapis yanapakïta puëdeyanmi.
[5 kaq päginachö recuadru]
¿Imanötaq invitakushun?
Llapan territoriontsikta ushanapaqqa, rasllam parlakurishwan. Kënöllam nirishwan: “¿Allillaku? Entero Patsachömi invitakïkäyä. Y qampaqpis juk invitacionta apayämurqömi. Imapaq kanqantaqa leirirmi más musyarinki”. Kushishqalla invitakï. Semana ushëkuna invitakurqa, precisaptinqa revistankunapis qoykunkimanmi.