Alli portakunqantsikqa Diostam alaban
1. ¿Imanirtaq asamblëaman ëwashqaqa pï mëpis rikëkämantsik?
1 Asamblëaman ëwaqtaqa pï mëmi rikämantsik. Wakin markakunachöqa, asamblëapaq chanqantsiktam noticiakunapa willakuyan. Hotelkunawan restaurantikunapis Testïgukunawan juntashqam kayan y cällikunachöpis atska cristiänukunam soläpan churakushqa puriyan. Rikärishun asamblea kanan markachö Diosta alabanarëkur imanöpis portakunapaq yarpätsikïkunata (1 Ped. 2:12).
2. ¿Imanöraq Diosta alabanqa asamblea kanan markachö këkar shumaq vistikunqantsik?
2 Limpiu y shumaq vistikushun. Asamblëaman limpiu y shumaq cristiänuno ëwanqantsiktam nunakunaqa rikäyan. Tsënö kaptimpis, hotelman chashqa, mikoq yarqushqa o rantipakoq ëwashqa imanöpis vistishqa këkanqantsiktaqa nunakuna rikëkäyanqam. Asamblëapaqnö mana vistishqa yarqurpis, cristiänunömi limpiu y shumaq vistikushwan. Rikämaqnintsikkunaqa vistikïnintsikchömi cuentata qokuriyanqa cristiänu kanqantsikta (Rom. 12:2). Jina precisanmi soläpantsik churakushqa purinantsik, tsënöpam musyatsikushun asamblea kanampaq kaqta, Diospita willakïta puëdishun y cristiänu mayintsikkunapis rasmi reqiramäshun.
3. ¿Mëchötaq pacienciayoq y agradecikoq kanqantsikta rikätsikushwan?
3 Pacienciayoq y agradecikoq kashun. Kanan witsanqa kikinkunallapaq imatapis asheq y agradecikïta mana yachaqmi nunakuna kayan. Tsëmi hotelchö y restaurantikunachö atiendeqkunapaq y jukkunapaqpis alläpa alli kanqa pacienciayoq y agradecikoq kanqantsikqa (2 Tim. 3:1-5). Jina respetakoq kanqantsiktaqa rikätsikushun asientukunata rakirnin o publicacionkuna ëlloq ëwarmi (1 Cor. 10:23, 24). Asamblëaman ëwarirmi juk nuna kënö nirqan: “Yachatsikayämunqantaqa manam yarpätsu, peru Testïgukuna shumaq portakuyanqantaqa manam imëpis qonqätsu”.
4. ¿Imanirtaq asamblëachö yanapakunapaq listu këkashwan?
4 Yanapakunapaq listu këkäshun. Yanapanakuyänampaq listu kayanqampitam cristiänukunaqa reqishqa kantsik (Sal. 110:3). ¿Yanapakïta munankimantsuraq? Juk asamblëapaq alistapakïchömi 600 cristiänukuna localta limpiapakur yanapakuyarqan. Tsënam localta cuidaq espantakur kënö nirqan: “Kënötaqa manam ni imëpis rikashqatsu kä, mana creipaqmi tsënö voluntäninkunallapita yanapakuyanqanqa”. Alläpa kushishqam 2013 wata jatun asamblëantsiktaqa shuyarëkantsik, tsëchöqa manam shumaq wiyakur yachakushunllatsu, sinöqa yachatsimaqnintsik Jehovätapis alabashunmi.
[3-6 kaq päginakunachö recuadru]
2013 wata jatun asamblëapaq yarpätsikïkuna
◼ Asamblea qallanampaq. Punkuqa 8:00 a.m. kicharëkanqanam. Qallanampaq müsicaqa 9:20 a.m. kiman junaq qallanqa, qallëkuptinllam llapantsik jamakurinantsik, tsënöpam Jehoväta respetanqantsikta rikätsikushun. Viernischö y säbaduchöqa ushanan canticu y mañakïqa 4:50 p.m. kanqa, y dominguchönam 3:35 p.m. ushanqa.
◼ Cärru cuadrakunan. Manam atska cärrukuna cuadrakuyänampaq sitiu kanqatsu, tsëmi juk cärrullachö atskaq ëwëta procurayänëki.
◼ Asientukuna. Qamwan cärruchö ëwaqkunallapaq o juntu yachayanqëkikunallapaq y qamwan Bibliata estudiaqkunallapaqmi asientutaqa rakinëki (1 Cor. 13:5).
◼ Mirkapa. Waqtaman ranteq mana yarquyänëkipaq y mana kichkipäyäshunëkipaq täperkunallachö mirkapëkikuna apakuyë. Manam asamblëaman ëwashwantsu atska mikïnintsikwanqa, ni manam apashwantsu pakina botëllakunata.
◼ Qellëwan yanapakushun. Jatun asamblëapita agradecikunqantsiktaqa rikätsikushun, asamblëachö ëkallatapis cäjakunaman winarmi.
◼ Jampikuna. Doctor jampita recetashushqa kashuptikiqa mana qonqëllata asamblëaman apë, porqui Primeros Auxiliuschöqa manam tsë jampikuna kanqatsu. Diabëticu karnin awjakunata y jeringakunata utilizarqa, asamblëachö o hotelchö këkarpis basurërukunamanqa manam jitarinëkitsu, tsëkunaqa alläpa peligrösum kayan.
◼ Zapatu. Cada watam accidentikunaqa kan jatun täcuyoq ëwayanqanrëkur. Ladërakunachö, grädakunachö, rejïllakunachö o maskunachöpis fäcil-lla japanëkipaq zapatukunam mas alliqa kanqa.
◼ Mana alläpa wiyaqkunapaq. Wakin asamblëakunachöqa, local rurillachömi discursukunata frecuencia modulada (FM) nishqampa pasatsiyämun. Asamblëachö kaptinqa, asamblea qallanqan höram tsëta willakayämunqa. Tsëpa wiyanapaqqa pilayoq radiutawan audïfunutam ministishun.
◼ Llullu wamrata puritsina y doblana sïllakuna. Manam apashwantsu llullu wamrata puritsinapaq cöchikunata ni doblana sïllakunata. Peru asientu tinkoqlla wamrakunapaq sillïtakunataqa teytakuna apëta puëdiyanmanmi.
◼ Sírvase visitar formulayukuna (S-43). Asamblea junaqkunaqa, juk o ishkë formularyu Sírvase visitar nishqanta allichi apankiman, tsënöpa pitapis parlapaptiki shumaq wiyaptinqa jutinta y mëchö täranqantapis qellqanëkipaq. Nïkurnam qellqashqa formularyuta Departamento de Publicaciones nishqanman o congregacionnikipa secretaryunta entreganëki.
◼ Posäda. Posadatsikïta munarqa congregacionnintsikpa secretaryunwan parlë, y tsëpita raslla formularyuta qellqarkur pëta entreguë. Juk markachö asamblëaman ëwëta munar y posädata munarqa, secretaryuwan parlë y solicitudta qellqarïkur tsë wawqita qoykï, pënam apatsinqa asamblea kanan markaman. Kë formularyuta qellqanëkipaqqa asamblea chämunantaraqqa shuyarëtsu, manaqa posäda asheqkunapaqmi sasa o aja kanqa (1 Cor. 14:40). Posadakoqkuna y wamrankunaqa respetayänanmi posadatsikoqpa wayinta, imantapis mana ashipakurnin, ni pakipakurnin, jina manam yëkuyanmantsu jukpa cuartunkunamampis. Yarpäshun, posädaqa asamblea junaqkunallapaqmi. Manam allitsu kanman wakin markakunata pasyaq ëwëta munarnin unë quedakïqa.
◼ Yanapakïta munaqkunapaq. Asamblëachö yanapakïta munarqa Departamento de Servicio Voluntario nishqanman witirishun. Jina teytan maman o wätaqnin o pipis mayor kaqkuna rikëkäyaptinqa, 16 watayoq wamrakunapis yanapakïta puëdiyanmi.