Ishkë hunaqmi kushishqa këta y yamë këta taririshun
1. ¿Imataraq tarishun kë wata hatun asambleachö?
1 Kë mundo Satanaspa makinchö kaptinmi tiempokunapis alläpa llakinëpaq, tsënö kaptimpis, Jehoväqa kushishqa këta y yamë këta taritsimantsikmi (Isa. 58:11). Y tsëtaqa hatun asambleakunachömi Jehová llapan watakuna taritsimantsik. Tsëqa, ¿imanöraq alistakushwan kushishqa këta y yamë këta tarinapaq y wakinkunatapis yanapanapaq? (Pro. 21:5.)
2. ¿Imakunachötaq listona këkänantsik?
2 Imëka rurënikikunapita o trabäjïkipita tiempïkita manaraq shumaq patsätsishqa karqa, kanankunallapitana shumaq patsëkätsi tsë asambleachö llapan hunaqkuna kanëkipaq. ¿Musyankinaku asamblea kanan localman ëka tiempochö chänëkipaq kaqta, tsënöpa tempränolla char mëchö täkunëkipaq kaqta ashinëkipaq? Mikïnintsik qaramaqnintsik cuenta Jehová yachatsimanqantsiktaqa, ¡manam ni ichikllatapis perdekïta munantsiktsu! (Isa. 65:13, 14.) ¿Posädëki mañakurqunkinaku y musyankinaku ima cärrowan ëwanëkipaq kaqta?
3. ¿Imakunaraq yanapamäshun asambleachö alli yachakunapaq y yachakunqantsiknö ruranapaq?
3 ¿Imaraq yanapashunki asamblea hora imamampis mana yarparäkïkänëkipaq? Asamblea paqaskuna temprano patsäkï, yachatsikëkämoqta rikarë, niyämunqan textokunata ashi y yachakunqëkikunata qellqë. Teyta kaqkunaqa familiëkiwan junto hamakuyë, tsënöpa wambrëkikunata shumaq rikar llapan discursokunata wiyakuyänanrëkur yanapayänëkipaq (Pro. 29:15). Allim kanman llapan yachakuyanqëkita familiëkiwan cada paqas yarpäriyaptikiqa. Asamblea pasariptimpis, tsë hunaqkunanölla familiëkiwan kushishqa Jehoväta serviyänëkirëkur kallpata tariyänëkipaqqa, Familiachö Diosta Adorayänëki Hörapita allichi wallkalla tiempota rakiyankiman, asambleachö yachakuyanqëki imakunachö yanapayäshunëkipaq kaqta parlakuriyänëkipaq.
4. ¿Imanöraq yanapakushwan wakinkunapis asambleachö kushishqa këta y yamë këta tariyänampaq?
4 ¿Imanöraq wakinkunatapis yanapashwan? Wakinkunapis kushishqa këta y yamë këta tariyänantam munantsik. ¿Congregacionnikichö kanku asambleaman ëwayänampaq yanapayänanta wanaq edäyashqakuna o huk publicadorkuna? ¿Puëdenkiku pëkunata yanapëta? (1 Juan 3:17, 18.) Anciänokuna, y masqa, yachatsikïta rikaq anciänokunam yarpachakuyänan yanapayänanta wanaqkuna atendishqa kayänampaq.
5. ¿Imanöraq utilizäshun asambleapaq invitacionkunata? (Rikäri recuadrota.)
5 Pasaq watakunanöllam, asambleapaq kima semana pishikaptin, nunakunata invitanapaq campaña kanqa. Congregacionkunaqa llapan invitacionninkunata qokïta y llapan territorionkunaman chëtam tïrayänan. Pero familiëkichö invitacionkuna sobraptinqa, asamblea kanan markaman apakuyë tsëwan tinkuyanqëki nunakunata invitayänëkipaq. Sobranqan invitacionkunata familiëki asamblea kanan markachö mana utilizänan kaptinqa, asamblea qallanan hunaqmi yëkunachö këkaq acomodadorta entregayänëki. Kikikikunapaq huk invitacionnikikuna rakiyë, porque domingo hunaq asambleachömi tsëpita parlayämunqa.
6. ¿Imanötaq alli portakunqantsikta asambleachö rikätsikushwan?
6 Alli portakunqantsikpis kushitsikunmi. Kanan witsan nunakunaqa, “kikinkunalla kuyakoqkuna[m]” kayan y manam ni pitapis respetayantsu. Pero ¡imanö kushikïpaqmi alli portakïta yachaq cristiänokunawan ëlluräriqa! (2 Tim. 3:2, QKW.) Alli portakoq kanqantsiktaqa rikätsikuntsik, asamblea localta las 8:00 a.m. kichayämuptin mana kumanakurnin shumaq yëkur, y noqantsikwan yachaqkunallapaq o estudiantentsikkunallapaq asientokunata rakirmi. Hina asambleata qallamoq wawqi, qallanan müsicata wiyakunarëkur shumaq täkunapaq nimanqantsiktapis wiyakunantsikmi, y tsëchö këkaqkuna wiyakuyänanta mana pantatsinapaqpis celularnintsiktam upitsinantsik. Hina yachatsikayämunqan hora mana parlar, mana mikur, mana mensäjeta mandar o pasïllokunachö mana purikacharpis, alli portakunqantsiktam rikätsikuntsik.
7. ¿Imanö masraq kushishqa këta y yamë këta tarishwan, y wakinkunatapis taritsishwan?
7 Kushishqam ëllurärintsik o qorirärintsik. Hina asambleakunachöqa alläpa kushishqam cristiano mayintsikkunawan ëllurärintsik (Sal. 133:1-3). ¿Imanirtaq ‘shonqïkita kichar’ huk congregacionpita wawqikunata y panikunata reqinkitsu? (2 Cor. 6:13, NM.) Allichi churakankiman cada hunaq huk wawqita, huk panita, o huk familiata reqinëkipaq. Pullan hunaq hamë höram tsëpaqqa alli. Tsëmi mirkapata aparqa, wakinkunawan junto mikur y reqinakur karintsik, y mananam waqtaman o restaurantekunamanqa yarquntsiknatsu. Tsëmi yanapamäshun rasumpa y mana ushakaq amistadta tarinapaq.
8. ¿Imanirtaq asambleachö yanapakunantsik, y imatataq yanapakunapaq rurashwan?
8 ¡Imanö kushikïpaqmi Diosnintsikta sirveq mayintsikkunawan trabajëqa! ¿Manatsuraq awnikurinkiman imallachöpis yanapakunëkipaq o congregacionnikiwan pitsapakïchö yanapakurinkiman? (Sal. 110:3.) Imachö yanapakunëkipaqpis mana niyäshushqa kayäshuptikiqa, witirillë Departamento de Servicio Voluntario nishqanman. Maki maki yanapanakurqa raslla y kushishqam imatapis rurarintsik.
9. ¿Imanirtaq asamblea hunaqkuna alli vestishqa y alli altsakushqa kashwan?
9 Mana Testïgokunatapis gustanmi alli portakunqantsikqa. Manam yachatsikayämunqan hörakunallatsu asambleista kantsik, sinöqa, llapan asamblea hunaqkunam. Asamblea kanan markachö rikämaqnintsikkuna cuentata qokuriyanqam mana Testigo kaqkunapitaqa, portakïnintsik hukläya kanqanta (1 Ped. 2:12). Asambleachö, posädantsikchö y restaurantekunachöpis alli vestikonqantsik, y shumaq altsakunqantsiqa, Jehoväta alabanqantsiktam rikätsikunan (1 Tim. 2:9, 10). Soläpata apashqaqa nunakuna cuentata qokuriyanqam Jehoväpa testïgonkuna kanqantsikta, itsa tsënöpa asambleantsikpita y Diosnintsikpitapis yacharatsishwan.
10. ¿Ima pasanqankunataq rikätsikun alli portakunqantsik alläpa alli kanqanta?
10 ¿Ima niyantaq wakinkuna asambleachö alli portakunqantsikpita? Huk periödicochömi yarqamurqan, asambleapaq localta alquilakoq nuna Testïgokunapaq kënö ninqan: “Alläpa alli portakoqmi kayan. Alläpam kushikuyä cada wata shayämunqanta”. Qanyan watam, asambleaman ëwaq Testïgokuna posadakuyanqan hotelchö huk mana Testigo nuna billetëranta oqrakïkunaq. Mana imantapis yatarlla tsë billetërata hotelta cargotsakoqta entregëkuyaptinshi, oqrapakoq nunata kënö ninaq: “Jehoväpa testïgonkunapa asamblean kë markachö kanqanta kushikï, kë hotelchöqa casi pëkunallam këkäyan. Mana tsënö kaptinqa, mananachi billetërëkita tarinkimannatsu karqan”.
11. Asamblea chëkämuptinnaqa, ¿imatataq ruranantsik, y imanir?
11 Kë wata hatun asambleakunaqa chëkämunnam. Tiempopitanam kallpachakayämushqa tsë asambleachö tukïta yachatsikayämunampaq y kushishqa ëllurärinapaq. Llapan hunaqkuna tsëchö këta tïrë, y Jehoväwan markan rurayämunqanta alli provechanëkipaq alistakï. Shumaq portakï y kushi kushilla amistadta ashi, tsënöpa wakinkunapis yamë këta y kushiqa këta tariyänampaq. Tsënö rurarqa, qam, y wakinkunapis, huk wawqi sientekunqannömi sientekuyanki, tsë wawqim kënö nirqan: “¡Manam mëchöpis kanannö alläpa shumaqqa pasashqätsu!”.
[4 kaq päginachö ninqan]
Pasaq watakunanöllam, asambleapaq kima semana pishikaptin, nunakunata invitanapaq campaña kanqa.
[5 kaq päginachö ninqan]
Asambleachö, posädantsikchö y restaurantekunachöpis alli vestikonqantsik, y shumaq altsakunqantsiqa, Jehoväta alabanqantsiktam rikätsikunan
[6 kaq päginachö ninqan]
Shumaq portakï y kushi kushilla amistadta ashi, tsënöpa wakinkunapis kushiqa këta y yamë këta tariyänampaq
[7 kaq päginachö recuadru]
2011 wata hatun asambleapaq yarpätsikïkuna
◼ Asambleapaq. Punkuqa las 8:00 a.m. kichakanqa. Música qallëkuptinllam llapantsik hamakurinantsik, tsënöpam Jehová Diosta respetanqantsikta rikätsikushun.
◼ Carro cuadrakunan. Manam atska cärrokuna cuadrakuyänampaq sitio kanqatsu, tsëmi huk cärrollachö atskaq ëwëta tïrayänëki.
◼ Asientokuna. Qamwan cärrochö ëwaqkunallapaq, o junto yachayanqëkikunallapaq y qamwan Bibliata estudiaqkunallapaqmi asientonqa guardapunëki (1 Cor. 13:5).
◼ Mikï. Mana kichkipäyäshunëkipaq taksha täperllachö mirkapëkikuna apayë, waqtaman mikï ranteq mana yarquyänëkipaq. Manam asambleaman ëwashwantsu atska mikïnintsik aparipäkushqa, ni manam apashwantsu pakina botëllakunata, ni washkutapis.
◼ Qellëwan yanapakushun. Hatun asambleapita agradecikunqantsiktaqa rikätsikushun, asambleachö ëkallatapis cäjakunaman winarmi, tsënöpa hinantin Patsachö yachatsikïta yanapakunapaq. Chëquechö qoyta munaqkunaqa “Asociación de los testigos de Jehová” nirmi churayänan.
◼ Imapis pasamashqa y qeshyakurkushqa. Asambleachö këkashqa imapis pasëkuptin, willë tsëchö këkaq acomodadorta, pënam raslla willanqa Primeros Auxilios nishqanta, tsënöpa hampikïta yachaq wawqi o pani rikänampaq y imata karpis rurayänampaq.
◼ Hampikuna. Doctor hampita qoshushqa kashuptikiqa, wananqëki kaqkunata mana qonqëllata apë asambleaman, porque tsëchöqa manam tsë hampikuna kanqatsu.
◼ Grabadörakuna. Manam ni ima grabadörakunata enchufashwantsu asamblea localmanqa. Grabarqa, mana pitapis tsaparmi grabashwan.
◼ Sírvase visitar formulariokuna. Asamblea hunaqkunaqa, huk o ishkë formulario Sírvase visitar (S-43) nishqanta allichi apankiman, tsënöpa pitapis parlapaptiki shumaq wiyaptinqa shutinta y mëchö täranqantapis qellqanëkipaq. Asambleapita kutikurnam, alli qellqashqa formulariota congregacionpa secretarionta qorinkiman (rikäri Diospita Yachatsikunapaq noviembre de 2009, pág. 4).
◼ Posada. Posadatsikïta munarqa congregacionpa secretarionwan parlashun, y tsëpita raslla formulariota qellqarkur pëta qoshun. Huk markachö asambleaman ëwëta munar y posädata wanarqa, secretariowan parlë y solicitudta qellqarïkur tsë wawqita qoyki, pënam apatsinqa asambleaman ëwanëki markaman. Kë formulariota qellqanëkipaqqa ama asamblea chämunantaraqqa shuyarëtsu, tsëqa posäda asheqkunapaqmi sasa o aja kanqa (1 Cor. 14:40). Posadakoqkuna y wambrankunaqa respetayänanmi posadatsikoqpa wayinta, imantapis mana ashipakurnin, ni pakipakurnin, hina manam yëkuyanmantsu posadatsikoqpa cuartonkunamampis. Yarpäshun, posädaqa asamblea hunaqkunallapaqmi. Manam allitsu kanman wakin markakunata reqipakïta munarnin, posädachö unë quedakïqa.
◼ Yanapakïta munaqkunapaq. Asamblea alli kanampaq tukï rurëchö shumaq yanapakushqaqa, más kushishqam asambleaman ëwashun (Hech. 20:35). Y Departamento de Servicio Voluntario nishqanmanmi witiriyänan imachöpis yanapakïta munaqkunaqa. Hina teytan maman o wätaqnin o pipis mayor kaq rikëkäyaptinqa, 16 watayoq wambrakunapis yanapakïta puëdeyanmi.
[5 kaq päginachö recuadru]
¿Imanötaq invitakushun?
Llapan territoriontsikta ushanapaqqa, rasllam parlakurishwan. Kënöllam nirishwan: “¿Yamëllaku? Hinantin Patsachömi kë invitacionta qokïkäyä. Qampaqpis apayämurqömi. Imapaq y mëchö kanampaq kaqtaqa kë invitacionchömi tarinki”. Invitacionpa hananchömi huk shumaq yachatsikï kan, tsëmi nunakunata entregarqa, tsëta rikänampaqnö aptatsinëki. Kushi kushilla invitakï. Semana ushëkuna invitakurqa, precisaptinllam revistakunata qokunantsik.