Hatun asambleakunaqa Jehoväta kushishqa adoranapaqmi
1. ¿Imachötaq hatun asambleantsik unë Israelchö fiestakunanölla kayan?
1 Josëwan Maria, wambrankuna y wakin Diosta kuyaqkunapis Jerusalenmanmi Jehoväpa fiestankunaman imëpis ëwayaq. Tsë hunaqkunaqa Diospa kaqllatam pensayaq, y manam hukkunamanqa yarparäkïkäyaqnatsu. Jehová kuyakoq kanqanta parlayänampaq y Leykunapita yachakuyänampaqmi, tsë fiestakunaqa karqan. Tsaq tsënöllam shamoq hatun asambleantsikkunapis Jehoväta kushishqa alabanapaq kanqa.
2. ¿Imatataq rurëkashwanna shamoq hatun asambleapaq?
2 Kanampitana alistakushun. Jesuspa familiampaqqa, Nazaretpita fiestaman ëwayänan y kutiyänan 200 kilömetrosnöraqmi karqan. Jesuspa wawqinkuna y paninkuna ëka kayanqanta noqantsik mana musyashqapis, alli unëpitachi tsë fiestankunapaq alistapakuyaq Josëwan Marïaqa. ¿Y qamqa alistakorqunkinaku shamoq hatun asambleaman ishkan hunaq ëwanëkipaq? Itsa vacacionta mañakunëki, patronnikita nirëkänëki o wambrëkikunapa profesorninta parlapärëkänëki tsë hunaqkuna estudiaq mana ëwayänampaq. Posadakïta wanarqa, ¿mañakorqunkinaku? Edäyashqa o qeshyëkaq wawqikunata panikunata, ¿manatsuraq asambleaman ëwayänampaq yanaparinkiman? (1 Juan 3:17, 18.)
3. ¿Unë Israelchö fiestakunaqa imachötaq yanapakoq?
3 Huknin hukninmi shumaq yanapanakuyaq. Judïokunapa fiestan hunaqkunaqa karqan, Diosta sirveq mayinkunawan shumaq parlakuriyänampaqwanmi. ¡Imanöraq Jesuspa familiankuna punta amïgonkunawan fiestankunachö yapë tinkurita munayaq! Hina nänipa ëwëkar, o markankunaman kutikar, y Jerusalenchö atska judïokunawan o judïoman tikrashqakunawampis itsa amigo këman chäyanman karqan.
4. ¿Imanötaq rikätsikushwan kuyanakunqantsikta ichikllapaq mana churanqantsikta?
4 Papel-llachö qellqashqata mana yachakunapaqmi, mäkoq mäkoq cumplido sirveqqa asambleakunata y discursokunata ruramun. ¿Imapaq? Tsënö ëllukëkur huknintsik huknintsik shumaq yanapanakunapaqmi (Heb. 10:24, 25). Tsëmi, ishkan hunaq qoyalla chäyänëkipaq, y müsicata manaraq churayaptin y asambleata qallaq wawqi manaraq willakamuptin hamakuyänëkipaq niriyaq. Hina mana rantiyänëkirëkur mirkapëkikuna apayänëkipaq y localpita mana yarqushpa wakinkunawan shumaq parlakuriyänëkipaqmi niriyaq. Cristiänopura kuyanakunqantsikqa Jehoväpa qarëninmi, tsëmi ichikllapaqqa churashwantsu (Miq. 2:12).
5. ¿Imatataq rurashwan asambleapita alli yachakunapaq?
5 Alli yachakunapaq hunaq. Wambra kanqampitam Jesusqa tsë fiestakunachö Teytan Jehoväpita alli yachakïta tïraq (Luc. 2:41-49). Y, ¿imataraq rurashwan familiantsikwan asambleachö alli wiyakunapaq? Yachatsikayämunqan höraqa, ama purikïtsu y ardëpa parlakurpis kakïtsu. Hina, celularwan o imawampis kikiki y wakinkunapis shumaq wiyakuyänanta tsapëtsu. Hinamampis, discursamoqta rikarë y yachatsikamunqanta qellqë. Teytakuna y mamakunaqa wambrakuna shumaq wiyakuyänampaqmi yanapayänan, tsëmi familiayoq kaqkunaqa juntolla täkuyanman. Y mëqan yachatsikï gustayäshunqëkipita ampipa parlariyë.
6. ¿Imatataq yarpänantsik vestikïnintsikpaq y altsakïnintsikpaq?
6 Vestikonqantsik y altsakunqantsik. Tsë nänipa viajaq huk nacionpita negociantekunaqa, rasllachi reqiriyaq fiestaman ëwëkaq o kutikaq Jesuspa familianta y Diosta sirveq wakin judïokunatapis. ¿Imanir? Faldankunapa kuchunchö shalshan o shamshilnin kaptin, y ichik más hananchö azul hïloyoq kaptimpis (Núm. 15:37-41). Kanan cristiänokunapa ratashninqa o latsapanqa manam unënötsu, pero shumaq vestikunqantsikpita, altsakunqantsikpita y limpio kanqantsikpitam reqimantsik. Tsëmi asamblea kanqan markachö këkar, ëwëkar o markantsikman kutikarpis, imanö vestikunqantsikta rikänantsik. Hina asamblea ushariptin huk ratashta cambiakurpis, shumaqmi vestikunantsik y tarjëtantsiktapis manam horqanantsiktsu. Tsënöpam, wakin nunakunapita hukläya kashun y rikämaqnintsikkunapis allita parlayanqa.
7. ¿Imanirtaq asambleachö shumaq yanapakushwan?
7 Atska yanapakoqkunatam wanayan. Asamblea alli yarqunampaqqa, atska yanapakoqkunatam wanayan. ¿Yanapakïta munankimantsuraq? (Sal. 110:3.) Asambleakunachö trabajëqa Jehoväta adorëmi, y rikämaqnintsikkunapis Diosnintsikpaq allitam parlayan. Asambleapaq pletayanqan localpa gerentenmi, yanapanakur shumaq pitsapakoqta rikar espantakur kënö nirqan: “Alläpam agradecikü këchö ëllukäyanqëkita, manam ni imëpis tsëläya shumaqtaqa rikashqatsu kä. Testïgokunapaqqa alläpa alli nuna kayanqampitam parlayaq, y localkunata tariyanqampitapis más limpiota haqiyanqampitam reqiyaq. Qamkunam kë markächö localta más shumaqyätsiyarqunki y alläpa respetakoq nunakunawanmi trabajayarqunki, tsënö nunakunataqa kananraqmi reqirë”.
8. ¿Imatataq ruranantsik asamblea kanan markachö?
8 Diospita yachatsikushwanmi. Asamblea kanan markachö yachaq nunakunaqa, shumaq vestishqa y soläpayoq testïgokunata rikäyanqam. Tsëqa, itsa imanir tsënö kanqantsikta musyëta munayanqa, tsënöpa Diospita yacharatsinapaq. Huk wambram asambleachö chaskinqan librota restauranteman apar mikïta servipakoq warmita rikärätsirqan, tsënöpanam teytanwan maman asamblëamampis invitariyarqan.
9. ¿Imanötaq Jesuspa familiannölla Diospa qarëninta rikashwan?
9 Diospita más yachakïta munaq judïokunapaqqa, alläpa kushikïpaqmi fiestankuna karqan (Deu. 16:15). Jesuspa familiankunaqa, fiestaman ëwayänampaq tukïtam kushishqa rurayaq. Y noqantsikpis, Jehová ruratsimunqan hatun asamblëantsikkunapaq alläpam kushikuntsik (Sant. 1:17). Tsëmi, ¡kananllapitana alistakï shamoq hatun asamblëachö kushishqa Jehoväta alabanëkipaq!
[7 kaq päginachö recuadru]
Hatun asambleapaq yarpätsikïkuna
◼ Asambleapaq. Punkuqa las 8:00 kicharanqa. Música qallëkuptinllam llapantsik hamakurinantsik, tsënöpam Jehová Diosta respetanqantsikta rikätsikushun.
◼ Carro cuadrakunan. Manam atska carro cuadrakunampaq sitio kanqatsu, tsëmi huk cärrollachö atskaq ëwëta tïrayänëki.
◼ Asientokuna. Noqantsikwan cärrochö ëwaqkunallapaq, o junto yachanqantsikkunallapaq y qamwan Bibliata estudiaqkunallapaqmi asientonqa guardapunëki (1 Cor. 13:5).
◼ Mikï hora. Mana kichkipäyäshunëkipaq taksha täperllachö mirkapëkikuna apayë, waqtaman mikï ranteq mana yarquyänëkipaq. Manam asambleaman ëwashwantsu atska mikïnintsik aparipäkushqa, ni manam apashwantsu pakina botëllakunata, ni washkutapis.
◼ Qellëwan yanapakushun. Hatun asambleapita agradecikunqantsiktaqa rikätsikushun, Yachatsikuyänan Wayichö o asambleachö ëkallatapis cäjakunaman winarmi, tsënöpa hinantin Patsachö yachatsikïta yanapakunapaq.
◼ Imapis pasamashqa y qeshyakurkushqa. Asambleachö këkashqa imapis pasëkuptin, willë tsëchö këkaq acomodadorta, pënam raslla willanqa Primeros Auxilios nishqanta, tsënöpa hampikïta yachaq wawqi o pani rikänampaq y imata karpis rurayänampaq.
◼ Grabadörakuna. Manam ni ima grabadörakunata enchufashwantsu asamblea këkaq wayimanqa. Grabarqa, mana pitapis tsaparmi grabashwan.
◼ Sírvase visitar formulariokuna. Asamblea hunaqkunaqa, huk o ishkë formulario Sírvase visitar (S-43) nishqanta allichi apankiman, tsënöpa pitapis parlapaptiki shumaq wiyaptinqa shutinta y mëchö täranqantapis qellqanëkipaq. Asambleapita kutirninnam, alli qellqashqa formulariota congregacionpa secretarionta qoyanki (rikäri Diospita Yachatsikunapaq noviembre de 2009, pág. 4).
◼ Posada: Posadatsikïta munarqa congregacionpa secretarionwan parlashun, y tsëpita raslla formulariota qellqarkur pëta qoshun. Huk markachö asambleaman ëwëta munar y posädata wanarqa, secretariowan parlë y solicitudta qellqarïkur tsë wawqita qoyki, pënam apatsinqa asambleaman ëwanëki markaman. Kë formulariota qellqanëkipaqqa ama asamblea chämunantaraqqa shuyarëtsu, tsëqa posäda asheqkunapaqmi sasa o aja kanqa (1 Cor. 14:40). Posadakoqkuna y wambrankunaqa respetayänanmi posadatsikoqpa wayinta, imantapis mana ashipakurnin, ni pakipakurnin, hina manam yëkuyanmantsu cuartonkunamampis. Yarpäshun, posädaqa asamblea hunaqkunallapaqmi. Manam allitsu kanman wakin markakunata reqipakïta munarnin, posädacho unë quedakïqa.
◼ Yanapakïta munaqkunapaq. Asamblea alli kanampaq tukï rurëchö shumaq yanapakushqaqa, más kushishqam asambleaman ëwashun (Hech. 20:35). Y Departamento de Servicio Voluntario nishqanmanmi witiriyänan imachöpis yanapakïta munaqkunaqa. Hina teytan maman o wätaqnin o pipis mayor kaq rikëkäyaptinqa, 16 watayoq wambrakunapis yanapakuyanmanmi.