¿Jehová alistanqan mikïpaq listonaku këkanki?
1. ¿Imakunatataq alistapakuntsik hatun mikïkunata ruranapaq?
1 Hatun mikïpaq alistapakïqa alläpa ajarämi, tukïtaraqmi wanantsik, mishkïnampaqqa imëkakunatam winantsik, churkupakunantsik, arukunantsik, qarakunantsik; hina mësata y localtapis alistapakunantsikmi. Invitädokunapis karutaraq ëwayänan kaptenqa alistakuyänanraqmi. Ajarämi alistapakunan, pero familiakunawan y amïgokunawan shumaq mikurinantsikrëkurqa, imëkatapis rurashwanmi. Tsënö kaqllam ichikllana pishin, Jehová alistanqan mikïta chaskiyänanrëkur hinantin Patsachö Jehoväpa testïgonkuna ëllukäyänampaq. Tsë kushishqa shuyarëkäyanqan Hatun Asambleapa tëmanqa: “Mäkoq mäkoqlla këkäyë” ninmi. Kananyaqqa imëkakunatanam rurayashqa yachatsikayämunampaq y asamblea kanampaq wanayanqankunatapis alistapakïkäyannam. Pero tsë asambleaman llapantsik ëwanapaq y yachakunapaqqa, cada ünum alistakunantsik (Pro. 21:5).
2. Jehová alistanqan mikïta chaskinantsikrëkur, ¿imakunatataq rurëkänantsik?
2 Alli yachakïta tïrë: Jehová alistanqan mikïchö alli yachakunëkirëkur, ¿musyankinaku imakunata ruranëkipaqpis? Asamblea qallanqampita ushanan hunaqyaq ëwanëkipaq kananllapitana patronnikiwan parlë. Y, ¿rikëkäyankinaku ima cärrowan ëwayänëkipaq y mëchö posadakuyänëkipaq kaqtapis? Awkinkuna, chakwankuna o qeshyëkaqkuna asambleaman ëwayänampaq anciänokuna rikäyänanmi, hina yanapëpaq kaqkunatapis manam qonqayänantsu (Jer. 23:4; Gál. 6:10).
3. ¿Atska nacionkunapaq asambleaman imanirtaq ëwashwantsu mana invitashqa këkarqa?
3 Musyanqantsiknöpis, wakin markakunachöqa atska nacionkunapaq asambleam kanqa. Localman ëkaq yëkuyänampaq kaqta y posädakunatapis yupëkurlla sucursal invitakonqanta ama qonqayëtsu, tsëmi rogariyaq asambleaman invitashqa congregacionlla y huk nacionpita invitashqa wawqi panikunalla ëwayänampaq. Tsë asambleaman mana invitashqa kaqkuna ëwayaptenqa, itsa tsë localman alläpa huntakurkuyanman.
4. ¿Imakunataraq rurashwan asamblea manaraq qallaptin?
4 Manaraq asamblea qallaptin chänëkipaq y täkunata tarinëkipaqqa, manam hörallachötsu alistapakunëki. Manaraq asamblea qallaptin progrämata shumaq leipäri, tsënöpa llapan yachatsikayämonqanta alli wiyakunëkipaq (Esd. 7:10). Música qallanampaq wawqi willakaramuptenqa, täkunëkichönam këkänëki cantanëkipaq y qallanan mañakïta shumaq wiyakunëkipaq.
5. ¿Imanötaq familiëkiwan asambleachö yachatsikayämonqanta alli wiyakuyankiman?
5 Asambleachö familiakuna junto hamakuyaptenqa, teytakunam wambrakunata shumaq rikäyanqa llapan discursokunata alli wiyakuyänampaq (Deu. 31:12). Textokunata leiyämuptin Bibliëkikunachö qatiyänëkipaqmi willapäriyaq o anyayä. Yachatsikayämonqanta qellqarqa allim wiyakushun, y tsë qellqanqantsikkunam yanapamäshun discursokunata yarpänapaq. Yachatsikayämonqan höraqa ama ardëpaqa imatapis parlakïtsu ni täkunëkipita sharkur purikachëtsu. Wakinkunaqa celularninkunawanmi asambleata shumaq wiyakuyantsu ni wakinkunatapis wiyatsiyantsu, ama tsëtaqa rurëtsu. Y, ¿imanirtaq asamblea ushariptin parlariyankitsu yachatsikayämonqanta?
6. ¿Imapaqtaq asambleantsikkunaqa, y imatataq rurashwan?
6 Hatun asambleakunaqa wawqintsikkunata panintsikkunata alli reqir más kuyanapaqmi, y Diosta mana reqeq nunakunaqa manam tsëta rurayantsu (Sal. 133:1-3; Mar. 10:29, 30). Lädikichö täkamoq wawqikunata y panikunata reqita tïrë y hamë höra shumaq parlakuriyë. Tsënö shumaq karinapaqmi asambleamanqa mirkapantsik apakurkur ëwantsik, tsënöpa restaurantekunaman mikï ranteq mana yarqunapaq. Ama qonqëtsu huknintsik huknintsikpis Diosman markäkïnintsikchö o yärakuynintsikchö shumaq yanapanakunapaq kaqta (Rom. 1:11, 12).
7. ¿Imanö vestishqataq ëwanantsik asambleaman?
7 Vestikonqantsik: Unë tiempochömi israelïtakunata Jehová nerqan faldankunapa kuchunman shalshan o shamshilnin churayänampaq y azul hïlota churayänampaq (Núm. 15:37-41). Tsë churayanqanta rikarmi yarpäyaq Diosllata adorayänampaq akrashqa marka kayanqanta. Tsënöllam kanankunapis asambleachö cristiänonö vestikur, wakin nunakunapita hukläya kanqantsikta rikätsikuntsik; vestikïnintsikwanqa asamblea ushariptin mikoq ëwarpis musyatsikuntsik cristiano kanqantsiktam. Tsëmi imanö vestikushqa ëwanapaqpis alliraq rikänantsik.
8. ¿Asamblea kanan markachö imanötaq yachatsikushwan?
8 Yachatsikunantsik: Asamblea kanan markachö Diospita yachatsikunapaqqa kananllapitanam pensarëkänantsik. Asamblea ushariptinshi huk wawqi warminwan ëwanaq huk restauranteman. Mikï servikoqta parlapar qallanampaqshi, soläpanta rikäratsirnin tapunaq: ¿Kënö tarjëtayoq nunakunata rikarqonkiku? nirnin. Tsënash awmi rikarqömi ninaq, pero manash musyanaqtsu imanir tsënö soläpashqa puriyanqanta. Tsënam wawqiqa ichik parlapärirnin asambleaman invitarerqan.
9. ¿Jehová ruranqanta imanötaq agradecikushun?
9 Asambleachö yarqamoqkuna, discursamoqkuna y demostracionta ruramoqkuna wawqikunalla kayaptimpis, kikin Jehová Diospam yachatsikïnenqa (Isa. 65:13, 14). Ruranqanta agradecikorqa, llapan hunaqmi asambleaman ëwashun y mishki mikïta kushishqa mikoqnömi yachatsikayämonqanta wiyakushun. Tsëqa, ¿listonaku këkanki Jehová alistanqan mikïta chaskinëkipaq?
[6 kaq päginachö recuadru]
Hatun asambleapaq yarpätsikïkuna
◼ Asambleapa horarion: Ishkan hunaqmi asamblea qallanqa 9:20 qoyapa o wärëpa. Y punkunam kicharanqa 8:00 qoyapa. Música qallëkuptinllam llapantsik hamakurinantsik, tsënöpam rikätsikushun Jehová Diosta respetanqantsikta. Säbadoqa 4:00 ushanqa, y domingonam 4:55 ushanqa.
◼ Carro cuadrakunan: Manam atska carro cuadrakunampaq sitio kanqatsu, tsëmi huk cärrollachö atskaq ëwëta tïrashwan.
◼ Asientokuna: Noqantsikwan cärrochö ëwaqkunallapaq y wayintsikchö täranqantsikkunallapaqmi asientonqa guardapushwan. Tsënö rurarqa, awkin wawqikunata, chakwan panikunata, qeshyëkaqkunata, y tsëraq shamoqkunata kuyanqantsiktam rikätsikushun.
◼ Mikï hora: Ichik täperkunallacho mikïnikikuna apayë mana kichkipäyäshunëkipaq, y tsënöpa mikï ranteq waqtaman mana yarquyänëkipaq. Manam asambleaman ëwashwantsu atska mikïnintsik aparipäkushqa, ni manam apashwantsu pakina botëllakunata, ni washkutapis.
◼ Qellëwan yanapakushun: Hatun asambleapita agradecikonqantsiktaqa rikätsikushun, Yachatsikuyänan Wayichö o asambleachö ëkallatapis cäjakunaman winarmi, tsënöpa hinantin Patsachö yachatsikïta yanapakunapaq.
◼ Imapis pasamashqa y qeshyakurkushqa: Asambleachö këkashqa imapis pasëkuptin, willë tsëchö këkaq acomodadorta, pënam raslla willanqa Primeros Auxilios nishqanta, tsënöpa hampikïta yachaq wawqi o pani rikänampaq y imata karpis rurayänampaq.
◼ Grabadörakuna: Manam ni ima grabadörakunata enchufashwantsu asamblea këkaq wayimanqa, ni imatapis rurashwantsu wiyakïkaqkunata tsaparnenqa.
◼ Sírvase visitar formulariokuna: Asamblea hunaqkuna pillatapis parlaparqa, Sírvase visitar (S-43) nishqan formulariomanmi qellqashwan shutinta y mëchö täranqantapis. Llapan publicadorkunam apayanman huk o ishkë formulariota asambleaman ëwar. Asambleapita kutirninnam, alli qellqashqa formulariota qoyanki congregacionpa secretarionta (rikäri Nuestro Ministerio del Reino de febrero de 2005, página 6).
◼ Posada: Posadatsikïta munarqa congregacionpa secretarionwan parlashun, y tsëpita raslla formulariota qellqarkur pëta qoshun. Huk markachö asambleaman ëwëta munar y posädata wanarqa, secretariowan parlë y solicitudta qellqarïkur tsë wawqita qoyki, pënam apatsenqa asambleaman ëwanëki markaman. Kë formulariota qellqanëkipaqqa ama asamblea chämunantaraqqa shuyarëtsu, tsëqa posäda asheqkunapaqmi sasa o aja kanqa (1 Cor. 14:40). Posadakoqkuna y wambrankunaqa respetayänanmi posadatsikoqpa wayinta, imantapis mana ashipakurnin, ni pakipakurnin, hina manam yëkuyanmantsu cuartonkunamampis. Yarpäshun, posäda wayiqa asamblea hunaqkunallapaqmi. Manam allitsu kanman wakin markakunata reqipakïta munarnin, posädacho unë quedakïta munëqa.