“Mana creikoqkunapa rikëninchö alli portakushun”
1. ¿Imanirtaq alläpa precisan shamoq asamblëantsikman o atska nacionkunapaq asamblëaman ëwar shumaq portakunantsik?
1 Cada wata jatun asamblëantsikman ëwashqam, imanö portakunqantsikta nunakuna rikäyan. Tsëmi alläpa precisan shumaq portakïnintsikwan Diosnintsikpa nunankuna kanqantsikta rikätsikunantsik (Lev. 20:26). Shumaq portakur y altsapäkurmi rikätsikushun Jesuspa rasumpa qateqninkuna kanqantsikta. ¿Imanötaq shamoq jatun asamblëaman o atska nacionkunapaq asamblëaman ëwar “mana creikoqkunapa rikëninchö” alli portakïnintsikwan Jehoväta alabashwan? (1 Pëd. 2:12, NM.)
2. ¿Jatun asamblëaman ëwarnin imanötaq cristiänu kanqantsikta rikätsikushwan?
2 Cristiänu kanqantsikta rikätsikushun. Kuyanakunqantsik y mana creikoqkunata shumaq tratanqantsikmi rikätsikun, mana creikoqkunapita jukläya kanqantsikta (Col. 3:10; 4:5; 2 Tim. 3:1-5). Alläpam precisan kuyakoq kanantsik. Hotelkunachö y restaurantikunachö imapis pasakuptinqa pacienciayoqmi trabajaqkunawan kanantsik. Y costumbri kaptinqa propïnankunapis qorishwanmi.
3. ¿Imatataq teytakuna cuentachö katsiyänan y imanir?
3 Teytakunaqa wamrankunatam cuidayänan asamblëa localchö, restaurantichö y hotelchö këkarpis (Prov. 29:15). Restaurantiyoq hotelchö trabajaq nunam, juk parëja cristiänuta kënö nirqan: “Jehoväpa testïgunkunaqa yachanëpaqmi kayan. Wamrankunapis alläpa respetakoq y alli portakoqmi kayan. Llapan trabajaqkunam qamkunapitaqa allita parlayan, cada sëmana ushëkuna kutikayämuptikiqa, ima alliraq këkunman”.
4. Asamblëa kanan markachö këkarninqa, ¿imatataq cuentachö katsinantsik?
4 Limpiu y shumaq vistikushun. Asamblëapaq vistikunqantsik röpaqa, manam kë munduchö vistikuyanqannötsu kanan, sinöqa shumaq y sencïllullam kanan (1 Tim. 2:9). Jina posädakunqantsikman ëwanapaq y asamblëachö mana këkarpis shumaqmi vistikunantsik. Tsënöpam soläpantsikta churakïta ni Jehoväpita nunakunata parlapëta penqakushuntsu. Kë wata jatun asamblëantsikpaq o atska nacionkunapaq asamblëaman ëwanapaq shumaq altsapäkunqantsik y alli portakunqantsikmi yanapakunqa, nunakuna Bibliapita yachakuyänampaq, jina Jehoväpis alläpam kushikunqa (Sof. 3:17).