Jesuspa Wanïnin Yarpëpaq alli alistakushun
Jesuspa Wanïnin Yarpëpaq alistakïnöqa manam imapis kantsu, y alläpa kushikïpaqmi noqantsikpaqqa (Luc. 22:19). ¿Imakunatataq alistapakunantsik puntallapitana?
◼ Mëchö y imë hora: Jesuspa Wanïnin Yarpë imë höra y mëchö kanantapis llapanmi musyayänan. Huk Yachatsikuyänan Wayillachö ishkë congregacionkuna Jesuspa Wanïninta Yarpäyaptenqa, manaraq qallaptinmi chänantsik y manam unëqa kakunantsiktsu, tsënöpa huknin congregacionpis hörachö qallanampaq. Carro cuadrakunanchö, Yachatsikuyänan Wayipa yëkunankunachö ama kichkitäkushuntsu.
◼ Invitacionkuna: ¿Llapan publicadorkuna chaskiyashqanaku invitacionkunata y musyayannaku ima nenqantapis? ¿Yachakurerqonkinaku imanö invitakunëkipaqpis? ¿Pitataq huk invitacionnin qonki? Llapan qoyäshonqëki invitacionta ushatsita tïrë.
◼ Apamunapaq: Yarpäyë, shamïta munaq nunakuna o wawqintsikkunapis itsa wanayanqa cärrota o pipis apamunanta. ¿Pëkunata yanapayänëkipaq imatataq yarpëkäyanki?
◼ Tantawan vino: Anciänokuna, tantatawan vïnotaqa manam pasatsiyänëkitsu manaraq Rupay o Inti heqaptenqa. Hina, ungïdokuna qeshyarnin Jesuspa Wanïnin Yarpëman mana ëwayaptenqa, tantanwan vïnonmi apapuyänëki. Y tsë celebracionpaqnömi tantatawan vïnota listo këkätsiyänëki (rikäri La Atalaya del 15 de febrero de 2003, páginas 14 y 15, párrafos 14 y 17).
◼ Yachatsikuyänan Wayi: Puntallapitanam parlayänëki Yachatsikuyänan Wayita alli pitsapakuyänëkipaq y shumaq altsapakuyänëkipaq, hina plätokunata, cöpakunata, huk mësata y mantelta listona katsiyänëkipaqpis. Jesuspa Wanïnin Yarpëta huk wayichö celebrarqa, shamoqkuna alli wiyayänampaqmi parlantekunata micröfonokunata rikäyänëki. Puntallapitanam akrayänëki acomodadorkunata y tantatawan vïnota pasatseqkunata, hina yachatsiyänëkim imanö rurayänampaq y shumaq vestikushqa y alli altsakushqa shayämunampaqpis niyänëkim.
Jesuspa Wanïnin Yarpënöqa manam imapis kantsu, tsëmi congregacionchö y kikintsikpis alli alistakunantsik. Ama qonqashuntsu, kuyë Tsurin Jesus nunakunapaqrëkur wanunampaq Jehová haqinqanta yarpaqkunataqa, atska bendicionkunatam qonqa.