Diospita yachatsikïqa puntachömi kanan
1. ¿Imanötaq Jesus rikätsikurqan Diospita yachatsikïta alläpa precisatsinqanta?
1 Jesusqa Diospita yachatsikïtam imëkapitapis puntaman churarqan. Tsëta alläpa precisatsirmi, llapan nunakunaman chätsinanrëkur hinantin Palestïnachö chakipa purirqan. Y alli yachatsikunampaq y tsë rurëpaq más tiempota tarinampaqmi hukkunataqa puntaman churarqantsu (Mat. 8:20). Qeshyëkaqkunataraq kachakätsinanta munayaptimpis kënömi huk kuti nirqan: “Jinantin marcacunachomi alli willaquita yachatsicunä presisan. Que patsamanmi Dios cachamashqa, pepa mandaquinincho nunacuna imano cayänanpaq canqanta willacunäpaq” (Luc. 4:43).
2. ¿Imanirtaq Jesuspaqqa Diospita yachatsikï alläpa precisarqan?
2 ¿Imanirtaq Jesusqa Diospita yachatsikïta alläpa precisatsirqan? Diospa shutin alabashqa kananta munarmi (Mat. 6:9). Hina ciëlochö këkaq Teytanta alläpa kuyarmi, Pë munanqanta y llapan ninqanta rurarqan (Juan 14:31). Hinamampis, alläpam nunakunata kuyarqan y yanapëtam munarqan (Mat. 9:36, 37).
3. ¿Imanöraq rikätsikushwan Diospita yachatsikïta puntaman churanqantsikta?
3 ¿Imanöraq pënö rurashwan? Kë mundochö imëka rurëkunawanqa itsa ajarä o sasaraq kanqa Jesusnö Diospita yachatsikïta puntaman churanapaq (Mat. 24:37-39; Luc. 21:34). Tsëmi, alli kaq rurëta puntaman churëkanqantsikta o mana churëkanqantsiktapis alli rikänantsik precisan, tsënöpa alli preparakïkur y mana haqita yachatsikoq yarqunarëkur tiempontsikta shumaq patsätsinapaq (Fili. 1:10). Hinamampis, wananqantsikllawan kawëta y kapoqyoq këta mana puntaman churëtam tïranantsik (1 Cor. 7:31).
4. ¿Imanirtaq kanan witsan Diospa yachatsikïninta puntaman churanantsik alläpa precisan?
4 Huk yachaq nuna wallka tiempoyoq karqa, musyanmi ima rurëkunata puntaman churanampaqpis. Këman pensarishun, ¿imataraq tsë yachaq ruranman lloqlla yarqanëkämoqta rikarqa? Imëka rurëtapis haqirïkurchi tukïnöpa familianta salvëta y vecïnonkunata willëta tïranman. Wakin rurëkunataqa tsëpitapis rurakunmannachi, ¿awku manaku? Hina tsë cuentallam Armagedón chämunampaqpis ichikllana pishin (Sof. 1:14-16; 1 Cor. 7:29). Tsëmi, salvakunapaq y wiyamaqnintsikkunapis salvakuyänampaqqa, mëchö tsëchöpis o congregacionchöpis, kikintsikta alli cuidakunantsik y alli yachatsikunantsik (1 Tim. 4:16). Tsëqa rasunmi, mana ushakänapaqqa Diospita yachatsikïtam puntaman churanantsik.