¡Octubrechö estudio biblicota qallashun!
1. ¿Ima publicacionkunawanraq octubrechö yachatsikushun?
1 Octubrechöqa Täpakoq y ¡Despertad! revistakunawanmi yachatsikur purishun. Pipis más yachakïta munaptinqa, ¿Rasumpa kaqta musyëta munankimantsuraq? follëtowanmi estudio biblicota qallarinapaq kutirishwan. Imanöpis ruranapaq rikärishun.
2. Revistata chaskimaqnintsikkunaman kutirqa, ¿imanötaq estudio biblicota qallashwan ¿Rasumpa kaqta musyëta munankimantsuraq? tratädowan?
2 ¿Imanötaq tratädowan yachatsikushwan? Kënö nirmi parlapar qallankiman: “Pasaqchö haqipunqaq revistaqa Bibliapita yachakuyänampaqmi pï mëta yanapan. [¿Rasumpa kaqta musyëta munankimantsuraq? tratädota qorir hanachö këkaq tapukïkunata rikäratsi.] Kë tapukïkunapa respuestanqa Bibliachömi këkan. ¿Mëqampitataq yachakïta munanki?”. Imatapis nishunqëkita shumaq wiyë. Nïkurna tratädochö këkaq respuestanta pëwan leiri y tsëchö këkaq textokunata ashiri. Maskunatapis Biblia yachatsikunqanta niri. Tsëpita Yachatsikun libron haqirapï. Nïkurna Indicechö mëqan capïtulotapis akrarinampaq niri y qallanan pärrafokunapita yacharatsi. Mana tsënö rurarqa, tratädochö yachëkätsinqëkipita parlaqllata Yachatsikun librochö ashi. Tsëpaqqa, tratädopa tapukïninkunapa respuestantam Yachatsikun librochö ashinantsik, tsëmi mëqan päginankunachö këkanqanta qateqninchö rikärishun:
● ¿Diosnintsik kuyamantsiktsuraq? (págs. 10, 11 párrs. 6-10)
● ¿Imëllapis ushakärenqatsuraq wanutsinakïkunawan hipakïkuna? (pág. 12 párrs. 12, 13)
● ¿Imaraq pasamantsik wanurishqa? (págs. 59, 60 párrs. 7, 8)
● ¿Imataq wanushqakunata shuyaran? (pág. 71 párrs. 13-15)
● ¿Imanöraq mañakushwan Diosnintsik wiyamänantsikpaq? (págs. 166, 167 párrs. 5-8)
● ¿Imanötaq kushikïta tarishun? (pág. 9 párrs. 4, 5)
3. ¿Imanöyantaq estudio biblicota qallashwan?
3 Punta visïtallachö Yachatsikun librowan estudio bíblico qallëta mana puëderqa, yapëchö más parlakuriyänëkipaqmi nirinkiman. Y nuna más yachakïta munaqtanö rikarqa, allim manaraq librota haqipurnin tratädopa más tapukïninkunapita cada kutirnin yacharatsinkiman. Kë alli yanapakoq tratädowanqa tukïnöpa estudio biblicota qallëta tïrashun octubre killachö, tsënöpa alli shonquyoq nunakuna rasumpa kaqta yachakuyänampaq (Juan 8:31, 32).