Diospa shutin alläpa respëtowan alabashqa katsun
1. ¿Imataq 2012 watachö ishkë hunaq kaq asambleapa tëman kanqa, y imapitataq horqakämushqa?
1 1931 watapita patsëmi Jehoväpa testïgon neq shutita apantsik, y alläpa kushikïpaqmi ciëlochö y Patsachö autoridadpa shutinta apëqa. Kikinmi tsë shutitaqa churamarquntsik (Isa. 43:10). Hina Jesuspis alläpa respëtowanmi rikaq Teytampa shutintaqa, tsëmi qateqninkunata mañakuyänampaq yachatsirnin, Teytampa shutin respëtowan alabashqa kanampaqraq puntata mañakuyänampaq yachatsirqan (Mat. 6:9). Tsëmi 2012 watachö ishkë hunaq kaq asambleapa, “Diospa shutin alläpa respëtowan alabashqa katsun” neq tëmanqa, tsë mañakïpita horqakämushqa.
2. Asambleachö, ¿imakunapitaraq yachatsikayämunqa?
2 ¿Imakunapitaraq yachatsikayämunqa? Sábado hunaqmi, “Llapan tiempontsikwan Diosta servirnin shutinta musyatsikushun” nishqan discursochö, llapan tiempontsikwan Diosta servinqantsik imanir alläpa kushikïta apamunqanta yachatsikayämunqa. “Ama rakchatäshuntsu Jehoväpa shutinta” nishqan atskaman rakishqa discursochö yachatsikayämunqannam, chusku reqishqa toqllakunaman mana ishkinapaq yanapamäshun. Y, “¿Imanirtaq Diospa shutin respëtowan alabashqa kanan?” nishqan discursochönam rikäshun, Diospita yachatsikïnintsikchö masta ruranarëkur, y nunakuna wiyakïta mana munayaptimpis kushishqa yachatsikunarëkur ima yanapamänapaq kaqta. Domingo hunaqnam, chuskuman rakishqa discursochö yachatsikayämunqa: yarpënintsikwan, parlakïnintsikwan, kawënintsikchö akranqantsikkunawan y portakïnintsikwampis Diospa shutinta respetanqantsikta imanö rikätsikunapaq kaqta. Y Diospita tsëraq yachakïkaqkunataqa mëraq gustanqa, “Jehoväqa Armagedonchömi hatun shutinta respetatsikunqa” neq discursota wiyakï.
3. ¿Ima hatun rurënintsiktaq kan, y imachötaq ishkë hunaq kaq asambleachö yachatsikayämunqankuna yanapamäshun?
3 Ichik tiempollachönam Jehoväqa shutinta respetatsikamunqa (Eze. 36:23). Tsëyaqqa huk alläpa hatun rurënintsikmi kan: Diospa shutinta tukïpita washänantsik. Tsëmi ishkë hunaq kaq asambleachö yachatsikayämunqankunaqa yanapamäshun, Jehoväpa shutinta alläpa respëtowan apanqantsikta rikätsikunapaq.