Tapukïkuna kaq

◼ Internetpa o publicacionkunapa, ¿pikunataq mañakuyanman publicacionkunata o yachatsiyänampaq?

Wakin publicacionnintsikkunachöqa ushanan päginachömi publicacionta o Diospita yachakïta munaqkuna qellqayänampaq huk recuadro yarqamun. Hina www.watchtower.org Internetpapis huk estudio biblicota mañakïta puëdeyanmi. Wakin nunakunaqa estudio biblicota tsënö mañakurmi Diospita yachakuyashqa. Pero Testïgokuna kastankunapa o reqinakuyanqankunapa shutinkunachö kë solicitudta sucursalman apatsiyaptinmi, höraqa pëkunaman wakin Testïgokuna chäyaptin piñakuyashqa.

Alli tantearinapaq, wakin nunakuna publicacionkunata mana munëkäyaptimpis sucursal chätsiptinmi obliguëkäyanqanta pensayashqa, y wayinkunapa direccionninkunata listantsikchö katsinqantsiktam pensayan. Hinamampis wayiyoq alläpa piñakuptinmi watukaq publicador penqakïchö kashqa mana imëpis visitanampaq nishqa kaptin. Tsëmi, ni mëqan Testigo hukpa shutinchö qellqanmantsu Internetman ni publicacionkunaman, tsëtaqa kikin yachakïta munaqkunallam qellqayanman. Yarpäriyë, sucursalqa hukpa shutinchö qellqashqa solicitudkunataqa manam contestantsu.

Tsëqa, ¿imataraq rurankiman kastëkita o reqinakushqëkita Diospita yachatsita munarqa? Huk publicacionta chaskinanta munarqa, ¿imanirtaq kikiki qararinkitsu? Diospita yachakïta munar huk Testigo watukananta munaptinqa, tsë territoriota rikaq congregacionpa anciänonkunawan parlë. Pëkunawan parlëta mana puëderqa, formulario Sírvase visitar (S-43) nishqanman qellqë, nïkurna congregacionnikipa secretarionta qorï, pënam qellqanqëki alli o mana alli kanqanta rikëkur sucursalman apatsinqa. Wakin nunakunaqa carcelchömi llawirëkäyan, wakinkunanam machakoqkuna o drogädokuna yachayänan wayichö täräyan y hospitalchöpis këkäyan, hina manam pëkunapa direccionninkunatapis sucursalman apatsishwantsu. Pëkuna Diospita yachakïta munayaptinqa, kikinkuna sucursalman qellqayänampaq y tsë wayikunata watukaq wawqikunawan parlayänampaqmi nishwan.