Dios nos habla mediante Jeremías
1. ¿Ima librotataq 2010 wata jatun asamblëachö chaskirqantsik, y imatataq tsë librowan rurashun?
1 ¡Imanö kushishqam Jeremías librota chaskirqantsik “Jehoväwan imëpis këkäshun” neq 2010 jatun asamblëachö! Tsë libroqa Jeremías y Lamentaciones nishqan librokunapita jorqashqam, y imanö kawakunantsikpaq yachatsikïkunatam tsëchöqa tarintsik (Rom. 15:4). Bibliapita Yachakunapaq reunionchö yachakunantsikpaqmi kë libroqa, tsëmi wakin congregacionkunaqa 2012 wata 5 de noviembre semänapita qallëkur tsë libropita yachakuyanqa.
2. ¿Imanirtaq alläpa yanapamäshun Jeremías libropita yachakunqantsik?
2 Tiempontsikpaq yanapakï. Jutinta apaq librota qellqaq profeta Jeremïasqa, alläpa sasa o aja tiempokunachömi imakuna pasanampaq kaqta Juda nacionchö willakurqan. Qallananchöqa tsëta rurëta mana puëdenampaq kaqtam pensarqan (Jer. 1:6). Jinamampis, Anatotpita marka mayinkunam pëtaqa qatikachäyarqan, quizaschi kastankuna y reqinakushqankunapis (Jer. 11:21, 22). Tsënö kaptinchi hora höraqa alläpa llakikïman charqan (Jer. 20:14). ‘Nunacunata [runakunata] willanapaq, y creyicoq caqtana bautisanapaq’ Jesus mandamanqantsikta rurarmi Jeremïasnö tukï mana allikunapa pasantsik y llakikuntsik (Mat. 28:19). Tsëmi qellqanqankunapita yachakunqantsikqa yanapamäshun markäkur o yärakur kushishqa Diospita yachatsikunantsikpaq.
3. Jeremías nishqan libro imanö kanqanta willakaramï.
3 ¿Imanötaq tsë libro? Yachakunqantsik hora leinantsikpaq kaq textokunaqa kinkishashqam këkan. Yachakunantsikpaq kaq pärrafokunapa ushananchömi yana letrawan juk o ishkë tapukïkuna kan precisaq kaqkunata yarpänantsikpaq. Tsëtam yachatsikoq wawqi ushananchö tapukamunqa. Jina entero librochömi shumaq dibüjokuna kan tsëkunata rikapärir parlakurinapaq.
4. ¿Imatataq rurashwan Jeremías nishqan libro alli yanapamänantsikpaq?
4 Alli yanapashunëkipaqqa, puntallapitana preparakï reunionchö yachakunantsikpaq kaqta. Kawënikichö y Diospita yachatsikunqëkichö yanapashunëkipaq kaq yachatsikïkunata ashi y reunionkunachö imëpis parlakuri. Jehová bendeciptinmi Jeremïasqa ruranampaq kaqta kushishqa rurarqan (Jer. 15:16). Diospa kaqpita kushishqa y shumaq yachatsikunantsikpaq kë publicación yanapamänantsiktam shuyantsik.