¿Precursor auxiliar kankimantsuraq?
1. ¿Imanirtaq Jesus Wanunqan Yarpë witsankunaqa más yachatsikïta puëdintsik?
1 Jesus Wanunqanta Yarpë witsankunachöqa masmi yachatsikïta puëdintsik. Tsë tiempochöqa masmi yarpachakushwan Jehová alläpa kuyamarnintsik wamranta salvamänapaq kachamunqanman (Juan 3:16). Tsënö ruranqanta shonqupita patsë agradecikurninmi, nuna mayintsikta Jehoväpita y imata pëkunapaq rurëkanqankunapita parlapantsik (Is. 12:4, 5; Luc. 6:45). ¡Imanö kushishqam invitakuntsik familiantsikta, vecïnontsikta y reqinakushqantsikkunata Jesus Wanunqan Yarpëman! Jinamampis, shamushqakuna yachakur sïguiyänampaq yanapar sïguishwanmi. ¿Puëdinkimantsuraq marzo, abril o mayo killakunachö precursor auxiliar këta?
2. ¿Imanirtaq marzoqa alli killa kanqa precursornö yanapakunapaq?
2 Marzo killata provechë. Marzoqa alli killam kanqa precursor auxiliarnö kanapaq, porque 30 o 50 hörakunata cumplinapaqmi akrëta puëdishun. Congregacionkunata watukaq marzochö visitayäshuptikiqa, precursor regular y especialkunawan ruranqan llapan reunionmanmi precursor auxiliarkunapis ëwëta puëdiyanqa. Jinamampis, 1 de marzo killapitam invitakur qallëkushun 26 de marzo Jesus Wanunqan Yarpë junaqyaq, tsëmi pasaq watakunapitapis más tiempo invitakunapaq kanqa. Jina yarpäshun, marzo killachöqa pitsqa semänakunam kanqa. Marzo killata alli provechashqaqa allipaqmi noqantsikpa kanqa.
3. ¿Imakunataraq patsärëkätsinkimanna más tiempo yachatsikunëkipaq?
3 Kananllapitana tiempota pasatsi. Kanampitana rikë precursornö yanapakunëkirëkur tiempïkichö ima cambiokunata ruranëkipaq. Familiëkipa yanapakïninta necesitarnin, ¿imanirtaq Familiachö Diosta Adorana hörachö mëtëkikunapaq y juk horariota patsätsiyänëkipaq parlayankitsu? (Prov. 15:22.) Precursor axiliarnö këta mana puëdirninqa ama desanimakïtsu. ¿Yachatsikoq ëwarnin más tiempo quedakamunkimantsuraq? ¿Semänachö juk kuti yarqunkimantsuraq?
4. ¿Ima bendicionkunataraq chaskishun marzo, abril y mayo killakunachö más yachatsikurninqa?
4 Marzo, abril y mayo killakunachö masta rurarninqa, más kushishqam Jehoväta y nuna mayintsikta sirwishun (Juan 4:34; Hech. 20:35). Pero tsëpitapis más alliqa kanqa tsë ruranqantsikkunapita Jehová kushikunqanmi (Prov. 27:11).