Jesus Wanunqanta Yarpë witsanqa mas kushikïta tarinapaqmi
1. ¿Imanötaq Jesus Wanunqanta Yarpë witsankuna mas kushikïta tarishwan?
1 ¿Imanötaq marzu, abril y mäyu killakunachö mas kushikïta tarishwan? Tsëtaqa rurashun mas yachatsikoq yarqurnin y puëdirninqa precursor auxiliarnö yanapakurninmi. ¿Imanötaq tsëta ruranqantsik mas kushikunapaq yanapamäshun?
2. ¿Imanötaq mas yachatsikoq yarqunqantsik mas kushikïta tarishun?
2 Mas kushikïta tari. Pëta adorarnin y pëpa kaqchö wananqantsikta tarirnin kushishqa kanapaqmi Jehoväqa kamamashqantsik (Mat. 5:3, NM). Jina wakinkunata yanapar kushikunapaqmi ruramashqantsik (Hëch. 20:35). Yachatsikoq yarqurninqa Diosta adoranqantsikta y nuna mayintsikta kuyanqantsiktam rikätsikuntsik. Tsëmi mas yachatsikoq yarqurninqa: 1) Mas kushikïtam tarishun, 2) Mas alli yachatsikoqmi kashun y mana mantsakushpam yachatsikushun y 3) Mas estudiukunatam qallashun y mas nunakunatam yanapashun. Y tsë llapanta ruranqantsikqa mas kushishqa kanapaqmi yanapamäshun.
3. ¿Imanirtaq marzu y abril killakunaqa alläpa alli kanqa precursor auxiliarnö yanapakunapaq?
3 Marzu y abril killakunaqa alläpa allim kanqa precursor auxiliarnö yanapakunapaq, porqui 30 o 50 hörakunata ruranapaqmi akrëta puëdishun. Jina Jesus Wanunqanta Yarpëpaqmi nunakunata invitakushun. Tsëtaqa rurashun säbadu 22 de marzupita hasta lünis 14 de abrilyaqmi, tsë junaqmi Jesus wanunqanta yarpäshun. Tsë witsankunaqa imëka rurëyoqmi kashun, llapantsikmi “juknölla yanapanakur” patsätsishqa tiempuchö territoriuntsikta ushanapaq yanapakunantsik (Sof. 3:9).
4. ¿Imatataq ruranëki precursor auxiliarnö yanapakïta munarninqa?
4 Kananllapitana alistakï. Manaraq rurashqa karninqa: 1) Tiempïkita shumaq patsäratsi juk o mas killakunapis mas yachatsikoq yarqunëkipaq, 2) Jehoväman mañakï (Sant. 1:5) y 3) Familiëkiwan y congregacionchö cristiänu mayikikunawan tsëpaq parlariyë (Prov. 15:22). Jina qeshyapäkurnin o llapan tiempïkiwan trabajarnimpis, precursor auxiliarnö kushishqa yanapakïta puëdinkim.
5. Jesus Wanunqanta Yarpë witsankuna mas yachatsikoq yarqurninqa, ¿imatataq lograshun?
5 Sirweqnin kaqkunaqa kushishqa kanantsiktam Jehoväqa munan (Sal. 32:11). Jesus Wanunqanta Yarpë witsankuna mas yachatsikoq yarqurninqa: Mas kushikïtam tarishun, y ciëluchö këkaq Teytantsikpa shonquntam kushitsishun (Prov. 23:24; 27:11).