Jatun asamblëapaq invitakïqa allim yarqushqa

Jatun asamblëapaq kima semänakuna pishikaptinmi, markantsikchö llapan nunakunata invitakur purishun, tsë rurëqa alläpam precisan. Pasaq watakunachö invitacionta chaskir asamblëaman shamoq nunakunaqa, alläpam espantakuyashqa Bibliapita discursukunata wiyar, llapankuna shumaq ordenädu trabajaqta rikar, shumaq portakuyaptin y llapankunapis jukllëllanö kayaptin (Sal. 110:3; 133:1; Is. 65:13, 14). ¿Kë jatun asamblëapaq invitakïqa alliku yarqushqa karutaraq asamblëaman ëwayänan kaptimpis?

2011 wata jatun asamblea pasariptinmi, Testïgukunata mana chaskita munaq warmi juk sucursalman cartakurqan, pëqa wayin punkunchömi juk invitacionta tarishqa kanaq. Kënömi cartan nirqan: “Shumaq wayiyoq y alläpa kuyakoq majayoq karmi, kushishqa kawakunapaq llapannï kapamanqantam creirqä. Peru manam kushishqallatsu kawakoq kä. Tsënö karmi, 320 kilömetrusta manejëkar ëwanä kaptimpis, säbadu junaq asamblëaman ëwanapaq churakarqä”. Asamblea alläpa shumaq kaptinmi, domingupaqwan quedakïta munar tsë paqas mana kutinampaq kaqta willanampaq nunanta qayarqan. Pëmi kënö nin: “Llapan discursukunatam wiyakurqa y mëtsikaq Testïgukunatam reqirqa. Maslla durëkunman nirqäraqmi”. Markanman kutirnam, Bibliapita yachakur qallëkurqan y chusku killa pasariptinnam manaraq bautizakur wayin wayin yachatsikur qallëkurqan. Y kënömi nin: “¡Alliraq tsë invitacionta wayï punkuchö dejëkuyarqan! Kananqa musyämi imanir y imapaq kawanqäta.”

Quiza invitacionta chaskeqkunaqa asamblëaman ëwayanqa. Tsëmi asamblëantsikpaq kushishqa invitakur purishwan. Invitacionta sobrapakushqa karqa asamblëaman ëwarqa apakï invitakunëkipaq.

[5 kaq päginachö recuadru]

¿Imanötaq invitakushun?

Llapan territoriuntsikta ushanapaqqa, rasllam parlakurishwan. Kënöllam nirishwan: “¿Allillaku? Entëru Patsachömi invitakïkäyä. Y qampaqpis juk invitacionta apayämurqömi. Imapaq kanqantaqa leyirirmi mas musyarinki”. Kushishqalla invitakushun. Semana ushëkuna invitakurqa, revistatapis qokushwanmi.