“¡Cristo ruranqanta qatishun!” Asamblea de Distritopaq willakuna campaña
Yapëmi publicadorkuna puritsiyanqa especial invitacionta
1 Pasaq watachö “¡Liberacionnintsikqa këllachönam!” Asamblea de Distritopaq invitakur purinqantsikmi, yanapashqa yachaki munaqkunata. Especial invitacionta chaskirir asambleaman ewaqkunaqa, Jehovapa testigonkuna chaskiyanqan atska espiritual kaq mikïtam chaskiyarqan (Isa. 65:13). Shumaq kuyakoq wawqi panintsikkunawan ëllukärirmi kushishqa kayarqan (Sal. 133:1). “¡Cristo ruranqanta qatishun!” Asamblea de Distritopaqpis, yapëmi kë wata hinantin Patsapa puritsishun kë especial invitacionta.
2 Pasaq watachö rurakanqan: Hinantin Patsapita willakayämonqanmi rikätsimantsik pasaq watachö, “¡Liberacionnintsikqa këllachönam!” Asamblea de Distritopaq invitakonqantsik alli kanqanta. Atska markakunachömi wiyarqontsik, asambleapita allita parlayanqanta. Huk markachömi, atska qellqashqa yarqamorqan periodicocho willakonqantsik campañapaq. Kënömi nerqan: “Manaraq asamblea qallaptinmi Testigokuna kallpachakuyashqa llapan vecinokunata visitayänampaq: atska horam willapäkuyashqa, karu markakunapam ewayarqan y rasllam nunakunawan parlayarqan”. Alli arreglota rurëkur testigokuna invitacionta puritsiyanqampaqmi, parlayämorqan televisionpa, radiopa y periodicopapis, tsëtam llapan markachö wiyayarqan. Kima periodicokunam allita parlayarqan ruranqantsikkunapita manaraq asamblea qallaptin. Huk periodistam qellqanaq ishkë paginapitapis masta, domingopa yarqamoq periodicocho. Tsë periodicocho parlarqan asambleapita, creinqantsikpita, imanö kanqantsikpita y asambleapaq invitakonqantsikpitapis. Huk pani willapäkonqancho manaraq parlar ushaptinmi, wayiyoq kaq këno nerqan: “Kanan horam këpita periodicocho leikarqo”. Huk nunanam këno nerqan: “Qamkunapita leir tsëraqmi usharerqö, ¡y kanan hora chärayämunki! ¿Këku invitacionnï?”. Tsëpitanam nerqan: “Qamkuna rurayanqëkiqa alläpa shumaqmi”.
3 Atskaq yachaki munaqkunam asambleaman chäyarqan invitacionninkuna tsarashqa. Wakinkunaqa karu markakunapitam ewayarqan asambleaman. Kallpachakur, nunakunata invitanqantsikmi yanaparqan asambleaman atskaq shayämunampaq. Huk nacionpitam willakayämorqan 27% más ewayanqanta asamblea de distritoman pasaq watachö.
4 Imanöraq llapan territorioman chashwan: Kima semana asambleapaq pishïkaptinmi publicadorkuna invitacionta puritsiyanqa, congregacionpa llapan territorioman chäyanampaq. Huk semanallana asambleapaq pishïkaptenqa y alläpa hatun territorio kaptenqa invitacionta churekuyankimanmi wayikunaman. Llapan congregacionkunam kallpachakuyanman llapan invitacionkunata nunakunapa wayinkunacho haqiyänampaq y llapan territoriotam ushëta tïrayanman. Invitacionkuna kaptinraqqa precursorkunanachi repartiriyanman.
5 Imaraq nishwan: Itsa këno ninkiman: “Hinantin Patsapam llapan nunakunata alläpa especial celebracionman invitakur purikäyä. Këmi qampaq invitacionniki. Këchömi tarinki más musyëta munarqa”. Raslla willapäkorqa más atska territoriokunamanmi chanki. Hina wayiyoqpa tapukïnin kaptenqa, tiempota raki tapukïninta contestanëkipaq y shumaq wiyaptenqa qellqarinki shutinta, mëcho täranqantapis, tsëpita raslla kutinëkipaq.
6 ¡Alläpa allim Cristota qatir kallpachakuntsik! (Juan 3:36.) Shamoq asambleantsik de distritom yanapamäshun llapantsik ewaqta tsënö ruranapaq. Pasaq watachö asambleapaqnömi kë watapis, “¡Cristo ruranqanta qatishun!” Asamblea de Distritopaq yapë invitakushun, tsëqa kanampis nunakuna allitam parlayanqa. Tsëmi, kallpachakï llapankunata invitanëkipaq. Jehová bendicïkuyäshi kë campañacho yanapakuyanqëkipita, hinantin Patsachö wawqi panikunawan kallpachakuyanqëkipita.