¿Imatataq rurashwan pitapis consejanqantsik yanapanampaq?

1. ¿Pikunatan consëjuta wanëkaqkunata consejayanman, y imanirtan consejayanman?

WAKINKUNAQA fäcil-llam pitapis consejariyan, peru wakinkunapaqqa manam fäciltsu. Peru llapantsikpis höra höraqa pita karpis consejanantsikmi. ¿Imanirtan consejanantsik? Jesusmi nirqan qateqninkunaqa kuyakoq kayanqampita reqishqa kayänampaq kaqta (Juan 13:35). Y kuyakoq kanqantsiktaqa rikätsikuntsik wanayanqan hörakuna wawqi panikunata consejarninmi. Diosnintsikpa Palabranchömi nin “shumaq consejariyaptin [alli] amïgu” tikrayanqanta (Prov. 27:9).

2. ¿Ima rurëtataq anciänukuna yachayanman, y imanir? (Leyi “¿Imanötan reunionchö anciänukuna consejakuyanman?” neq recuadruta).

² ¿Pikunatan masqa alli consejakoq këta yachayanman? Anciänukunam. Pëkunatam Jehoväwan Jesusqa churayashqa sirweqninkunata cuidayänampaq (1 Pëd. 5:2, 3). ¿Imanötan tsë cargunkunata cumpliyanman? Juknöpaqa discursayanqan höra Biblia ninqankunawan consejakurnin y cada ünuta consejarninmi, hasta Jehoväta sirwita dejashqakunatapis consejayänanmi. Peru ¿imanötan anciänukunapis y llapantsikpis alli consejakoq këta yachakushwan?

3. (1) ¿Pikunapitataq alli consejakoq këta yachakushwan? (Isaïas 9:6; leyi “Alli consejakoq këta Jesuspita yachakushun” neq recuadruta). (2) ¿Imakunatataq këchö yachakushun?

³ Alli consejakoq këtaqa yachakuyta puëdintsik Biblia willakunqan Diospa sirweqninkunapitam. Peru masqa Jesuspitam yachakuyta puëdintsik; pëpaqmi Bibliachöqa “Yachëwan Consejakoq” nin (leyi Isaïas 9:6). Këchömi yachakushun pipis consëjuta mañakamashqa imata ruranapaq kaqta, y mana mañakëkämashqa consejanantsik kaptin imata ruranapaq kaqta. Tsënöllam yachakushun imë y imanö consejanapaq kaqta.

PIPIS CONSEJANAPAQ NIMASHQA

4, 5. Pipis consëjuta mañakamashqaqa, ¿imatataq puntata pensarinantsik? Juk ejempluwan willakaramuy.

⁴ Pipis consëjuta mañakamashqaqa, ¿imatataq rurashwan manaraq contestarnin? Capazchi tapumanqantsikpita kushikurnin pensanqantsikta raslla o saslla nirishwan. Peru imatapis manaraq nirninmi kënöraq pensarinantsik: “Tsë pasëkanqan asuntutaqa, ¿alliku musyä o juktsuraq mas alliqa consejarinman?”. Höraqa mas alli kanqa, tsë asuntuta musyaqkunata tapukurinampaq yanapanqantsikmi.

⁵ Këllaman pensarishun: juk amïguntsik alläpa grävi qeshyawan qeshyanman. Y juk junaqqa willaramashwan tsë qeshyëkanqan asuntupaq atska tratamientukunata tarishqa kanqanta, y kënö niramashwan: “¿Mëqan tratamienturaq mas alli kanman?”. Capazchi noqantsikqa musyashwan imata ruranapaq kaqta. Peru mana doctor karqa y tsë tratamientukunapaq alli mana musyarqa, manam imata ruranampaq kaqta ninantsiktsu. Tsëpa rantinqa, amïguntsiktam yanapanantsik tsë asuntupaq alli musyaqkunata tapurinampaq.

6. ¿Imatataq ruranantsik pitapis manaraq consejarnin?

⁶ Capazchi höraqa pensashwan ima asuntutapis alli musyanqantsikta y pitapis consejëta puëdinqantsikta. Peru tsë asuntuta alli musyarpis, manam rasllaqa consejanantsiktsu. ¿Imanir? Proverbius 15:28 textuchömi kënö nin: “Allita ruraq nunaqa imata tapuyaptimpis alliran pensan contestanampaq”. Tsëmi tsë asuntuta alli musyanqantsikta pensarpis, manaraq consejarnin tsë asuntupaq parlaq publicacionnintsikkunata estudianantsik, Jehovä Diosnintsikman mañakunantsik y alliraq pensarinantsik. Tsëkunata rurashqaran consejanqantsikqa Jehovä munanqannö kanqa.

7. ¿Imatataq Natan rurarqan consëjuta mañakuyaptin, y imapitataq cuidakunantsik?

⁷ Diospa willakoqnin Natanpaq parlarishun. Gobernanti Davidmi Natanta nirqan Jehovä Diospaq juk templuta rurëta munanqanta, peru Natanqa manaraq pensarmi jinan höra nirirqan rurëta puëdinqanta. Peru Jehoväqa manam munarqantsu templuta David rurananta. Natanqa Jehoväta manaraq tapurmi jinan höra Davidta nirirqan templuta rurëta puëdinqanta (1 Crön. 17:1-4). ¿Imatataq yachakuntsik? Pipis consëjuta mañakamashqaqa, “manam rasllaqa” consejarinantsiktsu, tsëpa rantinqa alliran pensanantsik (Sant. 1:19).

8. ¿Imanir mastan pitapis manaraq consejarnin alliraq pensanantsik?

⁸ ¿Imanir mastan pitapis manaraq consejarnin alliraq pensanantsik? Consejanqantsikta rurayaptin mana alli yarquptinqa, noqantsikpis culpayoqmi kashun. Tsëmi manaraq consejarnin alliraq pensanantsik.

MANA MAÑAKËKÄMASHQA CONSEJANANTSIK KAPTIN

9. Juk wawqita o juk panita manaraq consejarnin, ¿imapitataq anciänukuna següru kayänan? (Gälatas 6:1).

⁹ Höraqa anciänukunam Gälatas 6:1 (leyi) ninqannö cuentata mana qokushpa “mana alliman” chëkaqkunata consejëta puëdiyan. Capazchi anciänukuna cuentata qokuriyanman decidinqan o rurëkanqan jutsa rurëman chätsinampaq kaqta. Tsëta rikarqa, anciänukunaqa jinan höram jutsa rurëman mana chänampaq y Jehoväpita mana rakikänampaq consejayänan (Sant. 5:19, 20). Peru ¿imapitataq següru kayänan manaraq consejarnin? Tsë rurëkanqan mana alliman chätsinampaq kaqtam següru kayänan. Tsënö kaptimpis yarpäyänanmi Jehovä Diosnintsikqa cada ünuta concienciantsik ninqanmannö imatapis decidinapaq permitimanqantsikta (Rom. 14:1-4). Peru rurëkanqan jutsa rurëman chätsinampaq kaqta alli musyarqa, ¿imatataq anciänukuna rurayanman manaraq consejarnin?

10-12. ¿Imatataq anciänukuna rurayanman consëjuta mana mañakuykäyaptin pitapis consejayänan kaptinqa? Juk ejempluwan willakaramuy (fötukunata rikäri).

¹⁰ ¿Imanirtan anciänukunapaqqa fäciltsu kanman consëjuta mana mañakuykaptin pitapis consejëqa? Apostol Pablu ninqannöpis capazchi cuentata mana qokushpa mana allikunata rurëkäyanman y consejayänanta mana wanayanqanta pensayanman. Peru ¿imakunatataq anciänukuna puntata rurayanman manaraq consejarnin?

¹¹ Këman pensarishun: juk murukoq nunaqa muruta manaraq mururmi puntataqa chakrataraq alli alistan. Y murunampaqnö chakra kaptinran murun. Y mururirqa, regarmi qallëkun. Tsënöllam juk anciänupis consëjuta mana mañakuykaptin pitapis consejanan kaptinqa, “imëka chakrata alistaqnö” tsë wawqita o panita kuyëllapa parlapar qallanan. Kuyëllapa parlapaptin amïguntanö rikarqa, tsë wawqipaqqa o panipaqqa consëjuta chaskikunampaq mas fäcil-llam kanqa. Tsëpitanam anciänuqa consëjuta chaskikunampaqtanöna rikarqa, pëpaq alläpa yarpachakunqanta y valoranqanta ninan, y tsëpitanam willarinan juk asuntupaq parlapëta munanqanta.

¹² Y parlapanqan höranam anciänuqa cuentachö katsinan llapantsikpis mana allikunata ruranqantsikta y höra höraqa consëjuta wananqantsikta. Tsëta yarparmi anciänuqa kuyëllapa parlapëta procuranan (Rom. 3:23). Y tsëpitanam Bibliawan alläpa respëtuwan entienditsinan rurëkanqan imanir mana alli kanqanta. Y rurëkanqan mana alli kanqanta cuentata qokuriptinnam, anciänuqa “imëka muruta muroq cuenta” alli entienditsinan corregikunampaq imata ruranampaq kaqta. Y tsëpitanam “imëka regaq cuenta” tsë wawqita o panita allikunata ruranqampita felicitänan y Jehovämanmi mañakunan (Sant. 5:15).

13. ¿Imatataq anciänukuna rurayanman consejayanqanta entiendishqa o mana entiendishqa kayanqanta segurakuyänampaq?

¹³ Höraqa capazchi anciänukuna pitapis ima asuntupaqpis consejariyanman, peru wiyaqnin kaqqa juknöpa entiendirinman. Tsëqa, ¿imatataq anciänukuna rurayanman rasumpa entiendishqa kanqanta segurakuyänampaq? Yachëllapam tapupäyänan consejayanqanta entiendishqa o mana entiendishqa kanqanta segurakuyänampaq y imata rurëta pensëkanqanta musyayänampaq (Ecl. 12:11).

¿IMËTAN Y IMANÖTAN CONSEJASHWAN?

14. ¿Imanirtan cölerashqa këkar pitapis consejashwantsu?

¹⁴ Llapantsikpis jutsasapam kantsik, tsëmi höraqa parlanqantsikkunawan o ruranqantsikkunawan pitapis ofendirishun (Col. 3:13). Y Bibliachöqa clärum nimantsik pitapis ofendirinapaq o ofendiramänapaq kaqta (Efes. 4:26). Peru ¿allitsuraq kanman cölerashqa këkar pitapis consejanqantsik? Manam. Teyta Diospa Palabranmi kënö nin: “Cölerakoq nunaqa, manam Teyta Diospa rikëninchö alli kaqta rurantsu” (Sant. 1:20). Cölerashqa këkar pitapis consejarqa, mas problëmamanmi chäshun. Rasunmi, ofendimanqantsikpita imanö sientikunqantsiktaqa nirishwanmi. Peru mas alliqa kanqa mas tranquïlu sientikunqantsik höra nirinqantsikmi.

15. ¿Imatataq Elihüpita yachakuntsik? (Dibüjuta rikäri).

¹⁵ Imë y imanö consejanapaqqa Jobta Elihü consejanqampitam yachakuyta puëdintsik. Elihüqa atska junaqkunapam wiyarqan amïgun tukoqkuna Jobta acusayaptin imanö defendikunqanta. Jobta alläpa llakiparpis, Jehoväpaq llutankunata parlaptinmi Elihüqa alläpa cölerakurqan. Peru cölerakurpis pacienciawanmi shuyararqan wakinkuna parlar ushayanqanyaq, y Jobta consejarninqa kuyëllapa y respëtuwanmi parlaparqan (Job 32:2; 33:1-7). ¿Imatataq Elihüpita yachakuntsik? Pitapis consejanantsik kaptinqa, imë parlapänapaq kaqmanmi alli pensanantsik y parlapanqantsik höraqa kuyëllapa y respëtuwanmi parlapänantsik (Ecl. 3:1, 7).

CONSEJAKOQ KËTA DEJASHUNTSU Y CONSEJAMASHQAPIS CHASKIKUSHUN

16. ¿Imatataq yachakuntsik Salmus 32:8 ninqampita?

¹⁶ Kë yachatsikuypa qallananchö textum nimantsik Jehovä Diosnintsikqa consejamänantsikpaq imë hörapis rikëkämanqantsikta (leyi Salmus 32:8). Kë textu ninqannömi Jehovä Diosnintsikqa, consejaskamarnintsikqa alkäbu këkan yanapamänantsikpaq. Noqantsikpis Jehovä Diosnintsiknömi pitapis consejarirqa, alkäbu këkänantsik tsë consëjuta cäsukunampaq yanapar sïguinapaq.

17. Bibliawan consejakuyta yachaq anciänukunaqa, ¿imanötan kayan? (Isaïas 32:1, 2).

¹⁷ Kë ushanan tiempukunachöqa alläpam wanantsik pillapis consejamänantsikta, tsënöllam jukkunatapis consejanantsik (2 Tim. 3:1). Bibliawan alli cläru consejakuyta yachaq anciänukunaqa alläpa “tsaki sitiuchö” yaku cuentam kayan (leyi Isaïas 32:1, 2). Y alläpam agradecikuntsik alli amïgukunayoq kanqantsikpita. Pëkunaqa mana fäcil kaptimpis y mana gustamänantsik kaptimpis, rasumpa wananqantsik kaqkunatam consejamantsik. Consëjunkunaqa “pläta metalpita rurashqa adornukunachö” churarëkaq örupita rurashqa manzänakunanöran alläpa välin (Prov. 25:11). Tsëmi alli consejakoq kanapaq yachakur sïguinantsik y consejamashqapis cäsukunantsik.