Yachaq nunanö kawashun
1 Chuskoq pescaqkunata Jesús qatiyämë niriptin, qatïmantsuraq o manatsuraq nishpa manam pensakïkäyarqantsu, tsëpa rantenqa “tsë höram [...] qatiyarqan” (Mat. 4:18-22). Tarso markapita Saulo nuna cristiano këman tikrarïkur y wisku kanqampita kachakärirmi, discipulokunanö “tsëllana Jesuspita willapäkurnin qallëkorqan qorikäna o ëllukäna wayikunachö” (Hech. 9:20). Tiempoqa rasllam ewkun; pasarirnenqa manam imëpis kutimunnatsu. Tsëmi alli yachaq nunanö kawanantsik, y tiempontsiktapis alleq rakinantsik (Efe. 5:15, 16).
2 Manam musyantsiktsu ima pasamänantsikta: Jehovata servikanqantsikqa warë ushakärinmanmi (Sant. 4:14). Huk kaq, “ima pasakunampitapis” manam ni pï libretsu (Ecl. 9:11). Ishkë kaq, warmi ollqupis tsatsayëkantsiknam. Watakuna pasanqanmannömi “mana alli tiempokuna” chämun, tsëmi sasa o aja Jehovata servinan (Ecl. 12:1). Alläpaqa manam shuyarashwantsu Diosman dedicakunapaq, ni alli kawakï chämunantaraqtsu shuyarashwan willapäkïman alleq yarqunapaq (Luc. 9:59-62). Abrahán llapan kawëninchö Jehovata servishqa karninmi, awkinyärerqan y wanorqampis “kushishqa”, ¿imanir? alli yachaq nunanö kawarnin: llapanchö Jehovallapaq kawashqa karnin (Gén. 25:8).
3 Manam tiempo kannatsu: ‘Tiempoqa ichikllamannam rurakashqa’; tsëmi tiempontsikta alleq rakishwan (1 Cor. 7:29-31). Ichikllanam pishin mana alli nunakuna ushakäyänampaq, y “chacracho murukïkuna ëllupakunan o qoripakunan” ushakärenqanam: tsë ninanqa üshanö kaq nunakuna ëllunan ushakëkannam (Apo. 14:15). Tsëmi llakikïkuna ni wakin rurëkunapis, willapäkuna tiempontsikta qochimashwantsu (Luc. 21:34, 35). ¡Imanöraq kushikushun tsë ëllupakïcho alli yanapakonqantsikta yarparkur!
4 Jehovapaq imata ruranapaq nimashqapis kushishqam chaskikushwan. Tsëmi imëkanöpis tïrashun alleq Jehovata servinapaq, “Kanan” tiempo kanqanyaq (Heb. 3:13). Tsënöpam alli yachaq kënintsikta rikätsikushun, “Diospa munëninta ruraq nunaqa wiñeypam kawanqa” (1 Juan 2:17).