Imëpis yachatsikunapaq tratado
1. ¿Imapaqtaq yanapakun ¿Rasumpa kaqta musyëta munankimantsuraq? tratado?
1 ¿Rasumpa kaqta musyëta munankimantsuraq? tratädoqa, estudio biblicota qallanarëkur yanapamänapaq rurashqam, pero manam tsëllapaqtsu, hina muruta maqtseq cuenta rasumpa kaqta më tsëman chätsinapaqpis yanapamantsikmi (Ecl. 11:6). Qateqninchömi rikärishun kë tratädowan imanö yachatsikunapaqpis.
2. ¿Imanötaq tratädowan parlapäkur qallashwan?
2 Imanöpis parlapar qallanapaq. Tratädon tsaräratsirmi, qallanan kaq päginachö këkaq hoqta tapukïkunata rikäratsir kënö nirinkiman: “¿Këchö këkaq tapukïkunapita mëqanllatapis tapukushqankiku?”. Ima nishunqëkitapis shumaq wiyarir, Biblia ima ninqanta tratädochö rikäratsi y tsëchö këkaq mëqan textotapis leirapï. Nïkurna leirapï o yacharatsi ushanan kaq päginachö këkaqpita y Yachatsikun libron qori. Librota mana chaskishuptikipis, itsa haqipunqëki tratädoqa rasumpa kaq yachatsikï shonqunman chänampaq yanaparinman (Mat. 13:23).
3. ¿Imataraq rurashwan pitapis imëka rurëyoqta tarirninqa?
3 Imëka rurëyoqta tarirnin. Kënömi nirinkiman: “Itsa yapëchöna shumaq parlakurishwan, pero kë tratadïki haqirapushqëki. Këchöqa hoqta tapukïkunam kan, tsëkunataqa itsa qampis tapukushqanki y kikin Bibliapitam kë tratädoqa yachatsikun. Allichi kanman yapë kutimuptï imata yachakunqëkipita parlakurishqa”.
4. ¿Imanöraq cällekunachö tratädowan yachatsikushwan?
4 Cällekunachö yachatsikurnin. Hina kënöpis nishwanmi: “¿Imanöllataq këkanki? ¿Imëllapis këkunata tapukushqankiku? [Shuyäri contestashunëkita.] Kë tratädom tsë tapukïkunapa respuestanta Bibliawan shumaq yachatsikun”. Mana apurädo kaptinqa, itsa mëqan tapukïkunapa respuestanta tratädochö yacharatsinkiman y Yachatsikun librompis haqirapunkiman.
5. Wayinkunachö pitapis mana tarirqa, ¿imatataq tratädowan rurashwan?
5 Pitapis wayinchö mana tarirnin. Wakin territoriokunachö pitapis wayinchö mana tarirqa, pureqkuna mana rikäyänanllamanmi ima publicaciontapis publicadorkuna haqirayäpun. Congregacionnikichöpis tsë costumbre kaptinqa, ¿imanirtaq ¿Rasumpa kaqta musyëta munankimantsuraq? tratädota tsënö haqiriyankitsu? Kutirnam kënö niyankiman: “Tutë wayikichö mana tarirnikim kë tratädota punkïkichö haqiyarqä. ¿Munankimantsuraq kë tratädochö hoqta tapukïkunapita mëqanllapitapis yachakurita?”.
6. ¿Rasumpa kaqta musyëta munankimantsuraq? tratado, ¿imanirtaq alläpa yanapakun?
6 ¿Rasumpa kaqta musyëta munankimantsuraq? tratädoqa shumaq y clärom Bibliapita yachatsikun. Tukï costumbreyoq y religionyoq nunakunam tsë tratädopita yachakïta gustayan. Hinamampis manam sasatsu yachatsikunan: Joven y mushoq publicadorkunapis yachatsikïta puëdeyanmi. ¿Kë tratädowan imëpis yachatsikïkankiku?