Estudio biblicota qallanapaq mushoq yachatsikï
1. ¿Ima mushoq yachatsikïtaq yarqamunqa nunakunata qonapaq kaq Täpakoq revistachö, y imachötaq yanapamäshun?
1 Febrero killapita qallëkurmi nunakunata yachatsinapaq kaq Täpakoqchö estudio biblicota qallanapaq mushoq yachatsikï yarqamunqa. “Diospa Palabrampita yachatsikïkuna” ninqam tïtulon. Cada killa yarqamoqta kikin nunakuna kushishqa leiyänan kaptimpis, tsë mushoq yachatsikïkunaqa rurakämushqa, publicadorkuna nunakunata tsëwan yachatsiyänampaqmi.
2. ¿Imanötaq Täpakoqchö mushoq yachatsikï kanqa?
2 ¿Imanöraq kanqa tsë mushoq yachatsikï? Tïtulon y subtïtulonkunapis tapukïmi kanqa nunakunata yachatsirnin tapunapaq. Y kikin nunakuna Diospa Palabranta leir alli yachakuyänampaqmi, textokunaqa copiaranqatsu. Wayinkuna punkunllachö nunakunata yachatsinapaqmi, pärrafonkunapis wallka wallkalla. Hina cada yachatsikïpa ushananchömi willakun Yachatsikun libropa mëqan yachatsikïninmampis ëwanapaq, tsënöpa revistapita librowan yachatsir qallanantsik mana sasa kanampaq.
3. Wayin wayin yachatsikurnin, ¿imanötaq revistapa mushoq yachatsikïninwan nunakunapa wayin punkunkunallachö estudio biblicota qallashwan?
3 ¿Imanöraq yachatsikushwan? Pitapis revistata haqipunëkipaqqa, tsë mushoq yachatsikï imapita parlanqanta más musyëta munanampaqnö huk shumaq tapukïta rurari. Maslla musyarinapaq, 1 de febrero kaq Täpakoqpa mushoq yachatsikïninmi parlanqa, Biblia alläpa yanapakunqampaq. Tsëqa kënömi nirinkiman: “Ima ninkitaq, ¿Bibliaqa Diospa Palabrantsuraq o wakin librokunanöpis shumaq librollatsuraq? [Shuyäri contestashunëkita.] Tsëpaq parlaq shumaq yachatsikïmi kapaman”. Rikäratsi punta kaq tapukïta, nïkur qallanan kaq pärrafota leiri y tsëchö këkaq textota ashiri. Yapë tapukïta leiri y imata yachakunqanta parlakaramunampaq niri. Qatinallaman numerashqa tapukïninkunawan, alli rikëkur ëka pärrafotapis yachatsi. Manaraq ëwakurnin qateqnin kaq tapukïta rurarir, imë kutinëkipaqpis parlariyë, yapë kaqchö tsëpita yacharatsinëkipaq. Llapan semänakuna yachatseq kuti, tsënöpa llapan pärrafonkunapita yacharatsir qateqnin kaq revistapitana yachatsinëkipaq. Hina huknöpaqa punta visïtallachömi Bibliapita estudiatsinapaq nirishwan. Tsëpaqqa, revistapa mushoq yachatsikïninwanmi Bibliata imanö estudiana kanqanta rikarätsishwan.
4. Yachakï munaqkunaman kutirnin, ¿imanöraq yachatsikushwan revistapa mushoq yachatsikïninwan?
4 Hina, kë mushoq yachatsikïqa yanapamäshunmi imëpis revistata haqipunqantsik nunakunata qonapaq, y yachakï munaqkunaman kutirnin apapunapaqpis. Kënömi ninkiman: “Kananqa huk mushoq yachatsikïnam kan Täpakoq revistachö. Imanö kanqantapis rikäratsishqëki”. Jehovämanmi mañakuyä kë mushoq yachatsikïwan nunakuna “rasonpa caq yachatsiquicunata musyayänan[paq]” (1 Tim. 2:4).