“Pelyacho alli ratatseq” cuenta kashun
1. ¿Imatataq yachakuntsik 1 Corintios 9:26 ninqampita?
1 Apóstol Pablum kënö nir qellqarqan: “Noqalläqa alli pensecur tse coreq nuna cuenta[m] ewanqäman chänäpaq yarparäquicä, y pelyacho alli ratatseq nuna cuentam quecäpis” (1 Cor. 9:26). Kënö nirqa, Diosta sirwirnin más sinchikunampaqmi Pabluqa nikarqan. Y këqa noqantsik Diospita más alli yachatsikunapaqpis yanapamantsikmi. ¿Imanötaq tsëtaqa rurashwan?
2. ¿Imanötaq Pablu y wakin yachatsikoqkuna rurayanqanta qatishwan yachatsikunqantsikchö?
2 Nunakuna kayanqanman ëwashun. Apostolkuna kawayanqan witsanchöqa, Pablu y wakin yachatsikoqkunapis nunakuna kayanqanmanmi ëwayaq yachatsiyänampaq (Hech. 5:42; 16:13; 17:17). Territoriontsikchö nunakuna paqaspa wayinkunachö kayaptinqa, tsë höram más alli kanman wayin wayin yachatsikoq ëwanantsik. ¿Tardepaku o qoyapaku agenciakunachö o paradërokunachö trabäjonkunaman ëwar o kutimurpis nunakuna más kayan? ¿Imë hörataq mercädokunachö nunakuna más atskaq kayan? Cällekunachö yachatsikushqaqa, tsë hörakunam más alli kanman yachatsikunapaq.
3. ¿Imatataq rurashwan territoriontsikchö yachatsikunapaq sinchikunqantsik más alli yarqapamänapaq?
3 Territoriochö yachatsikunapaq alli rikäshun. Yachatsikunapaq sinchikunqantsik más alli yarqunampaqqa, mëpa qallanapaq kaqtapis alliraqmi dirigeq rikänan. Këllaman pensarishun, huk territoriollaman atska publicadorkuna ëwar witsikashqa mana puriyänampaqmi, yachatsikïta dirigeq alliraq rikänan y tsëpaqqa tiempotam wanan. ¿Manatsuraq ichik grüpokunaman rakiri más alli kanman? Hinamampis ichik grüpokuna kaptinqa territoriota más rasmi usharayämunqa y más nunakunawanmi parlayanqa. Y, ¿manatsuraq wayiki amänunllachö yachatsikunëkipaq huk territoriota mañakunkiman? Tsënö kaptinqa, manam karuta ëwar tiempïkita perdinkinatsu.
4. ¿Imataq yanapamäshun “pescaduta” tsareq cuenta nunakunata tarinapaq?
4 Jesusqa nirqan, yachatsikoqkunaqa imëka “pescaduta” tsareq nunakunanö kayanqantam (Mar. 1:17). Huk alli pescadorqa manam mällata hitëkunqanllawantsu kushikun, sinöqa pescädokunata tsarinqanwanmi, tsëpaqqa alli hörata y alli sitiota akrarirmi raslla pescar qallëkun. Awmi, pescanqan alli yarqunampaqmi sinchikun. Hina tsënöllam noqantsikpis alli sinchikushwan yachatsikunqantsikchö (Heb. 6:11).