Cullquita ama yanga gastangapaj

IMA RURANATA ALLI YUYAI

BIBLIAMANTA CONSEJO: “Imatapish alli yuyarishpa chai yuyai trabajaj runaca causaipaj charintajmi. Ashtahuanpish yuyarishcahuan ucui jahua imatapish rurajcunaca, ashtahuan huajchayashpami catincuna” (Proverbios 21:5).

¿IMATATAJ NISHA NIN? Cullquita mana maipish cachun gastasha nishpaca ima minishtirishcallapi gastanatami ricuna cangui. Por ejemplo, tucui can munashcataca mana randi tucunguichu. Chaimantami cullquita gastangapajca alli yuyarinaraj cangui.

¿IMATATAJ RURAI TUCUNGUI?

• Imacunata randinata ricui. Imalla minishtirishca cosascunata ricushpami shuj listapi churana cangui. Chai qꞌuipami chaipi mashna cullquita gastanata ricuna cangui. Chaicunata randingapaj ashtahuan cullqui minishtirijpica shujtaj cosascunapaj charicushca cullquihuanmi randina cangui. Por ejemplo, gasolinata randingapaj ashtahuan cullqui minishtirijpica callepi micunapaj charicushca cullquihuanmi randi tucungui.

• Ama degana dibiyaichu. Mana yangamanta dibiyanallachu cangui. Chaipaj randica cullquita ahorrashpami can minishtishcata randi tucungui. Shuj prestamota rurashca cashpaca ama ashtahuan dibiyangapajmi puntual pagana cangui. Cutin, ña dibiyashca cashpaca ima punlla pagasha nishcatami pajtachina cangui.

  Shuj prestamota rurashpaca ashtahuanmi cullquita gastashun. Chaimantami manaraj dibiyashpa alli yuyanaraj canchij.

ALLICUNATA RURANGAPAJ ESFORZARI

BIBLIAMANTA SHUJ CONSEJO: “Qꞌuilla runaca tamiacunmi nishpa mana yapunchu. Chai runaca chagrata tandana punlla llujshirishpapish, imata mana japinchu” (Proverbios 20:4).

¿IMATATAJ NISHA NIN? Qꞌuilla cashpaca pobrellami causashun. Chaimantami trabajador canata, cullquita mana maipish cachun gastanata yachana canchij. Chaimi shamuj punllacunapipish imalla minishtishcacunata randingapaj cullquita charishun.

¿IMATATAJ RURAI TUCUNGUI?

• Alli trabajador cai. Sinchita trabajanata yachashpa, responsable cashpaca casi siempremi shuj trabajota charingui.

• Honrado cai. Mana honrado cajpica mana alli persona cashcatami ricungacuna. Chaimantami trabajo illaj saquiringui.

• Charijyanallapi ama yuyaichu. Cullqui charina solopi yuyashpaca cambaj saludtami dañai tucungui. Shujtajcunahuanpish apanacunatami saquingui. Yuyari: Causaipica mana cullquichu ashtahuan valishca can.

BIBLIAMANTA SHUJTAJ CONSEJOCUNA

TIEMPOTA, CULLQUITA VICIOCUNAPI AMA GASTAICHU

“Machajcunapish, yalli micujcunapish huajchayanllami. Yalli dormishpami, llachapallata churarincuna” (PROVERBIOS 23:21).

AMA YALLITAJ SUSTARICHU

“Chaimanta cashnami nini: Cancunapaj causaipi, imatataj micushun, imatataj ubyashun, cuerpopipish imatataj churashun nishpa, ama chai yuyailla huañuricuichijchu” (MATEO 6:25).

AMA MITSA CAICHU

“Mitsa runaca utca charijyanallatami munan. Chashna cashpapish huajcha tucunataca mana yachanchu” (PROVERBIOS 28:22).