Callari quimsa plagacuna

Egipciocunaca israelitacuna paicunapaj esclavocuna cajpimi sinchita trabajachun obligarcacuna. Chaimantami Diosca Moisestapish, Aarontapish faraonmanca: ‘Israelitacuna shitashca pambaman rishpa ñucata adorachun saqui’ nichun cacharca. Faraonca jatun tucushca cashcamantami: ‘Jehová nishcaca mana importanchu. Israelitacuna richunca mana saquishachu’ nirca. Chaimi faraonca israelitacunataca ashtahuan trabajachirca. Shinapish Jehová Diosca pi pai cashcatami faraonman ricuchisha nirca. Chaipajca Egiptomanmi diez jatun plagacunata cacharca. Jehová Diosca Moisesmanca: ‘Faraonca ñucataca mana cazunchu. Paica caya tutamantaca Nilo yacumanmi shamunga. Ñuca pueblo richun mana saquishcamantami Nilo yacuca yahuar tucunga nigri’ nircami. Moisespish, Aaronpish faraonman rishpaca Aaronca caspihuanmi Nilo yacuta huajtarca. Chaimi yacuca yahuar tucurca. Chai yacu ashnai callarijpimi pi mana ubyai tucurcacuna. Pescadocunapishmi huañurca. Tucui chaita ricushpapish faraonca israelitacuna richunca mana saquisha nircachu.

Siete punllacuna qꞌuipaca Diosca Moisestaca cutinmi faraonman cashna nichun cacharca: ‘Israelitacuna richun mana saquijpica sapocunami jundanga’ nirca. Faraón cutin mana cazushcamantami Aarón caspita alzajpica tucui Egiptopi sapocuna jundarca. Sapocunaca huasicunapi, camacunapi, micuna platocunapipishmi jundarca. ¡Tucui ladocunapimi carcacuna! Chaimi faraonca Moisestaca: ‘Sapocunata anchuchichun Diosta mañai. Israelitacuna richun saquishami’ nirca. Jehová chai plagata anchuchijpica egipciocunaca huañushca sapocunataca achca montoncunatami tandarcacuna. Chaimi Egiptoca ashnai callarirca. Pero cutinmi faraonca israelitacuna richunca mana saquirca.

Qꞌuipaca Diosca Moisestaca: ‘Aarontaca: “Cambaj varata chutashpa pambapi huajtai. Chashna huajtajpimi ñutu allpaca tucui Egiptopi uchilla chuspicuna tucunga” ni’ nishpami mandarca. Dios nishca shinami tucui ladocunapi gentecunata canij uchilla chuspicuna ricurirca. Chaimi huaquin egipciocunaca faraontaca: “Caitaca Diospaj maquimari ruracun” nircacuna. Chashna nijpipish faraonca israelitacuna richunca mana saquircachu.