Catij 6 plagacuna

Moisespish, Aaronpish cutinmi faraonpajman rircacuna. Paicunaca: “Diosca: ‘Ñuca pueblo richun mana saquijpica tábano chuspicunatami cachasha’ ninmi” nircacunami. Tabanocunaca jatun, canij chuspicunami carca. Chaicunaca charijcunapaj, pobrecunapaj huasicunamanmi yaicurcacuna. Chuspicunaca Egiptopimi junda carca. Pero israelitacuna causacuj Gosén llajtapica shujllapish mana yaicurcachu. Cai plagamanta callarishpaca egipciocunallatami llaquichirca. Chaimi faraonca Moisestaca: ‘Chuspicunata anchuchichun Jehovata mañai. Qꞌuipaca cancunaca ringuichijllami’ nishpa rogarirca. Chuspicunata anchuchijpica faraonca cutinmi mana cacharca. Shinapish ¿faraonca israelitacuna richun saquishcangachu?

Qꞌuipaca Jehová Diosca: ‘Paicunata richun mana saquijpica egipciocunapaj animalcunami ungushpa huañunga’ nircami. Cayandij punllaca Dios nishca shinami tucurca. Pero israelitacunapaj animalcunaca ima mana tucurcacunachu. Chashna cajpipish faraonca rumi shungu tucushpami mana cachasha nirca.

Chaimi Diosca Moisestaca cutin faraonpajman rishpa ushpata huairaman shitachun mandarca. Jahuata shitajpica ñutujlla polvo tucushpami tucui Egiptota taparca. Chai ñutu polvoca gentecunatapish, animalcunatapish achcatami chugrichirca. Shinapish faraonca israelitacunataca cutin mana cachasha nircachu.

Diosca cutinmi Moisestaca faraonman cashna nichun cacharca: ‘“Ñuca pueblo richunca manaraj saquishcanguichu. Cayaca achcatami runduchisha” ningui’ nircami. Cayandij punllaca Dios nishca shinami cꞌulun nishpa, nina achijnishpa rundurca. Tucui granocunata, yuracunatami tucuchirca. Egiptopica nunca mana chashna rundushcachu carca. Pero Gosenpica mana ima tucurcachu. Chaimi faraonca Moisestaca: ‘Rundu pararichun Jehová Diosta mañai. Cancuna richun saquishallami’ nirca. Pero ña usiyarijpica faraonca cutinmi yuyaita cambiarca.

Chaimantami Moisesca: ‘Langostacunaca rundumanta saquirishca granocunatapishmi tucuita micunga’ nirca. Langostacunaca jatun saltamonte shinami can. Achca langostacunami rundumanta saquirishca yuracunata, granocunata tucuita micurcacuna. Chaipimi faraonca Moisestaca: ‘Langostacunata anchuchichun Diosta mañai’ nishpa rogarca. Pero Dios langostacunata anchuchijpica faraonca cutinmi rumi shungu tucurca.

Qꞌuipaca Diosca Moisestaca: ‘Cambaj maquitaca jahuata chutai’ nircami. Chai ratomi yallitaj amsa tucurca. Quimsa punllacunatami egipciocunaca imata mana ricurcacuna. Israelitacunapaj huasicunallapimi achijlla carca.

Faraonca Moisestaca: ‘Canpish, israelitacunapish richijlla. Pero cancunapaj animalcunataca saquichij’ nircami. Chaimi Moisesca: ‘Diosman ofrendata cungapajmi animalcunataca apashpa rina canchij’ nirca. Chaipica faraonca yallitaj pꞌiñarishpami: ‘¡Caimanta llujshi! Ñucata ricunaman shamujpica huañuchishami’ nishpa caparirca.