Tucuri plaga

Moisesca faraontaca cutin ricungapajca mana shamushachu nircami. Pero manaraj rishpami faraontaca: ‘Cunan chaupi tutatami Egiptopi causajcunapaj punta churicunaca huañunga. Faraonpaj churimanta callarishpaca paipaj esclavopaj churicamami huañunga’ nirca.

Jehová Diosca israelitacunataca: ‘Yuyarina micuita ruraichij. Shuj huatata charij ovejata cashpa, chivota cashpa huañuchichij. Chaicunapaj yahuarhuan huasi pungu caspicunata pintaichij. Aichataca cusashpa levadura illaj tandahuan micunguichij. Ringapajpish listo canguichij. Cunan tutami cancunataca quishpichigrini’ nircami. Israelitacunaca achcatami cushicushcangacuna.

Chaupi tutami Diospaj angelca Egiptopi tucui huasicunaman rirca. Huasi pungu caspipi yahuarhuan mana pintashca cajpica charijcunapaj, pobrecunapaj punta churicunami huañurcacuna. Pero pungu caspita yahuarhuan pintashca cajpica israelitacunapaj punta churicunataca angelca mana huañuchircachu.

Faraonpaj punta churipishmi huañurca. Chaimi faraonca Moisestapish, Aarontapish: ‘Caimanta llujshishpa richij. Cancuna nishca shinallataj Jehová Diosta adoranaman richij. Cancunapaj animalcunatapish apashpa richij’ nirca.

Israelitacuna llujshishca tutaca lunaca achijllami carca. Paicunaca familiacunapurami tandalla Egiptomanta llujshircacuna. 600.000 cꞌaricunapish, achca huarmicunapish, huahuacunapishmi llujshircacuna. Achca egipciocunapishmi paicunahuan Diosta adorangapaj rircacuna. Israelitacunaca ña mana esclavocunachu carca.

Jehová paicunata quishpichishcata yuyaringapajmi cada huata shuj micunata rurana carcacuna. Chai micuitami Pascua nishpa shutichircacuna.