Esterca paipaj pueblotami salvarca

Esterca Judamanta shuj joven huarmimi carca. Paica Persia llajtapi saquirij Susa pueblopimi causarca. Achca huatacuna ñaupami Nabucodonosorca Esterpaj familiataca Jerusalenmanta apashca carca. Estertaca paipaj primo Mardoqueomi huiñachirca. Paica Persiapaj rey Asuerota sirvijmi carca.

Asueroca mushuj reinatami charisha nirca. Chaimi paita sirvijcunaca chaipi tiyaj ashtahuan alaja huarmicunata paipajman pusharcacuna. Paicunapurapica Esterpishmi carca. Reyca Estertami agllarca. Mardoqueoca Estertaca: ‘Can judía cashcataca ama piman huillanguichu’ nircami.

Mandajcunamanta ashtahuan autoridadta charij Hamanca yallitaj jatun tucushcami carca. Paica paipaj ñaupajpi tucuicuna cumurichunmi munarca. Pero Mardoqueoca mana cumurircachu. Chaimantami yallitaj pꞌiñarishpa paita huañuchisha nirca. Mardoqueo judío cashcata yachaj chayashpacarin Hamanca Persiapi causaj tucui judiocunata ima shina huañuchinatami yuyarca. Chaimantami reymanca: ‘Judiocunaca peligroso gentecunami. Tucuicunatami huañuchina canchij’ nirca. Chaimi Asueroca: ‘Can imata rurasha nishcata rurailla’ nishpa shuj leyta churachun permisota curca. Chai leypica: ‘Adar quillapaj 13 punllapica tucui judiocunatami huañuchina canchij’ nircami. Pero Jehová Diosca chaitaca ricucurcami.

Esterca chai ley llujshishcataca mana yacharcachu. Chaimantami Mardoqueoca paiman shuj copiata cachashpaca: ‘Reyhuan rimagri’ nirca. Esterca: ‘Pipish mana cayajpi reypajman rijpica huañuchingami. Ña shuj quillatami ñucataca mana cayashca. Pero rishami. Paipaj varata ñucapajman chutajpica causashami. Mana cashpaca huañushami’ nircami.

Esterca rey Asueropaj palaciomanmi rirca. Asueroca paita ricushpaca paipaj varatami chutashpa ricuchirca. Ester cꞌuchuyajpica: ‘¿Imatataj ningui?’ nircami. Esterca: ‘Shuj jatun micuitami ruragrini. Canpish, Hamanpish shamunguichij’ nircami. Ña micucushpaca cayapish micunaman shamuichij nishpami invitarca. Cayandij punlla micucushpaca Asueroca cutinmi: ‘¿Ester imatataj ningui?’ nirca. Paica: ‘Shuj runami ñucatapish, ñuca pueblotapish huañuchisha nin. Chaita rurachunca ama saquihuaichu’ nircami. Chaimi Asueroca: ‘¿Pitaj huañuchisha nicun?’ nirca. Shina nijpimi Esterca: ‘Cai millai runa Hamanmi’ nirca. Chaimantami reyca achcata pꞌiñarishpa Hamanta huañuchichun mandarca.

Hamán llujchishca ley ña firmashca cashcamantami reypish mana imata rurai tucurca. Chaimantami Hamanpaj randi Mardoqueota mandachun churarca. Shuj mushuj leyta churachunpishmi permisota curca. Chai leypica judiocunaca paicunata llaquichisha nijpi difindiri tucushcatami nirca. Adar quillapaj 13 punllapimi judiocunaca contracunata ganarcacuna. Chai punllataca cada huatami cushicuihuan yuyarijcuna carca.