Tawa kaq parte: ¿Imaynatam estudianteta yachachina preparakunanpaq?
Diosta servinankupaq hina estudiota qosun
1 Estudiana leccionta puntata leespa, kutichiykunatapas marcaspa, entiendesqanman hina rimananpaq piensaq estudianteqa, utqayllam espiritual kaqkunapi wiñanqa. Chayrayku, estudiota qallarispaqa estudianapaq huk leccionllata paywan kuska preparakuychik, chaynatam yachachinki imayna preparakunanta. Allinmi kanman sichus tukuwaqchik leccionta otaq capitulotapas.
2 Imakunatam marcanman hinaspa qellqanmanpas. Estudianteta yachachiy qellqasqa tapuykunapaq kutichikuykunata tariyta. Estudiasqaykichik folletopi otaq libropi marcasqayki palabrakunata qawachiy. Estudiasqaykichikman hina paypas munanqachá, kutichikuykunapa yuyarichiq palabrakuna marcayta (Luc. 6:40). Kunanqa entiendesqanman hina kutichichun. Chaynapim yachanki maykama entiendesqanta.
3 Preparakuchkaspaqa, Bibliapim allinta maskanman mana qellqasqa textokunata (Hech. 17:11). Estudianteqa allintam entiendenan, sapakama textokunapa nisqanqa yanapan parrafopa yachachisqanta. Yachachinam, libronpa otaq folletonpa patanpi asllata qellqananpaq. Estudiopi imapas yachasqanqa Bibliapa yachachisqanmi, chayta allinta entiendechispa, kallpanchay textokunapa nisqanman hina comentananpaq.
4 Imakunamantam yachanqa, imakunamantataq yuyarinqapas. Manaraq preparakuyta qallarichkaspam, estudianteqa yachanman ima estudiananta. Chaypaqmi qawanman capitulopi titulonta, subtitulonkunata, dibujonkunatapas. Preparakuyta tukuykuspa importante puntokunata yuyarichun, kaptinqa yuyaymanarinapaq recuadrowan yanapachikuchun. Chaykunata ruraspam mana qonqanqachu yachasqanta.
5 Sichus estudianteta preparakunankupaq yachachisunchik hinaptinqa congregacionpipas allintam comentanqa, estudiayta tukuruptinpas tukuy rikchaq estudiananpaqmi preparakunqa.