18 GEDEÓN
Mana manchakuq allin yuyayniyoq runa
MANA manchakuq kanapaqqa allin yuyayniyoqmi kana, chhaynan karqan Gedeonpas. Gedeonpa tiyasqan tiempopiqa Israel llaqta runakunaqa karunchakapurqankun Jehová Diosmanta. Chaymi Jehová Diosqa paykunata Madián runakunaq makinman saqerparirqan, chay runakunaqa sinchitan Israel runakunata ñak’arichiqku; chajrankuman rinankupaqpas jark’asqan karqanku. Gedeonmi ichaqa mana manchakuspa trigota erarqan otaq k’uparqan llaqta runakunata mijuchinanpaq. Ichaqa allin yuyaywanmi chaytaqa ruwarqan, pakallapitaqmi ruwarqanpas. Yaqachus jina qaqa t’oqopi chaytaqa ruwanman karqan.
Israel runakunaqa arrepientekurqankun chaymi Jehová Diospa yanapayninta rogakurqanku. Chayraykun Jehová Diosqa juj profetata kacharqan imaraykuchus paykunata saqepurqan chayta willananpaq. Chaymantataq Gedeonman juj angelta kacharqan imaynatas Israel llaqtata salvanman chayta willananpaq. Chaymi Gedeonqa angelta nirqan juj señalta rikuchinanpaq. Jinan angelqa juj milagrota ruwaspa Gedeonpa preparasqan ofrendata qonqaylla ninawan ruphachirqan. Chaymantaqa chinkapurqanmi chay angelqa. Chay tutan Gedeonta Jehová Diosqa nirqan: “Papaykiq Baalpaq ruwachisqan altartan thuninki, ladonpi sayashaq k’ullutapas wit’unkin”, nispa. Chaymantataq Gedeonqa Jehová Diospaq juj altarta ruwarqan, jinaspa chaypi ofrendata jaywarqan. Ichaqa tutapin chaytaqa ruwarqan taytanpas juj runakunapas mana rikunanpaq. Chayta ruwananpaqqa mana manchakuqmi kanan karqan.
Madián runakunaqa Amalec runakunawan, inti lloqsimuy ladomanta runakunawan iman juñukurqanku Israel runakunawan maqanakunankupaq. Paykunaqa langostakuna jinaraqmi askhallaña Jezreel wayq’oman chayarqanku. Jehová Diosmi Gedeonta nirqan Israel llaqtamanta soldadokunata ajllananpaq, jinaspa guerraman rinankupaq. Gedeonqa yachaytapunin munasharqan Jehová Dios yanapanqachus icha manachus chayta, chaymi iskay milagrota ruwananpaq mañakurqan. Jehová Diosqa paypa mañakusqanman jinan ruwarqan. ¿Imatan ruwarqan? Chay tutan Gedeonqa willmata masarqan, paqaristinpaqqa chay “willmaqa ch’akin kasharqan muyuriqnin pampataq ch’aran kasharqan”. Qhepantin tutataq willmañataq ch’aran kasharqan pampañataq ch’aki kasharqan.
Gedeonpa ejercitonpi pisillaña karqanku chaypas Jehová Diosqa astawan pisiyachinanpaqmi kamachirqan
Chaykunawanmi Gedeonqa allinta kallpachakurqan jinaspa 32.000 runakunata guerraman aparqan. ¡Enemigon runakunan ichaqa 135.000 soldadokuna karqanku! Chaywanpas Jehová Diosqa Aroj pujyu-pujyu qayllapi kashaqtinkun Gedeonta kamachirqan soldadonkunata pisiyachinanpaq. Ñaupaqtaqa manchakuymanta khatatataqkunatan wasinkuman kutichipunan karqan. ¿Jayk’a runakunawanmi Gedeón qhepakurqan? 10.000 runakunallawanñan. ¡Chaywanpas Diosqa nirqanmi: “Askharaqmi soldadokunaqa kashan”, nispa! Jinan Gedeonqa imaynatachus unuta ujasqankuman jina ajllarqan. Llapa qonqorikuspa pampakama k’umuykuqkunatan wasinkuman kutichipurqan. Qhawa-qhawarikuspa makillankuwan unu ujaqkunatataq guerrapaq qhepachirqan. ¡Gedeonqa kinsa pachaj runakunallawanmi qhepakapurqan!
Chaywanpas Gedeonqa liston kasharqan guerrapi maqanakunanpaq. Chaymantapas Jehová Diosqa juj señaltawan rikuchispan kallpacharqan. Gedeontan nirqan tutapi enemigonkunaq kasqanman rinanpaq. Chaypin Gedeonqa uyarirqan juj soldado compañeronman mosqoyninta willashaqta, chaypin uyarirqan imaynas Israel runakuna paykunata atipankuman chayta. Chaywanmi Gedeonqa astawanraq Jehová Diospi confiarqan, chaymi runankunaman kutispa imachus ruwanankuta willarqan. Paykunatan nirqan: “Karpa-karpaman chayaspa imatachus ruwasaq chayta allinta qhawankichis, jinaspa noqa jina ruwankichis”, nispa. Jinan paykunaqa tutapi t’aqa-t’aqa rirqanku enemigonkuq kasqanman. Paykunaqa p’uyñuta, nina k’anchayta, waqrakunatawan apaykuspan rirqanku. Gedeonpa kamachisqanta uyarispataq waqrakunata tocarqanku, p’uyñukunata p’akirqanku; qaparirqankutaq: “¡Jehová Diospa, Gedeonpa espadan!”, nispa. Chay qaparisqankuta uyarispa k’anchaykunata rikuspa iman enemigonkuqa piensarqanku jatun ejército paykunaman jamushananpaq. ¡Paykunaqa sinchitan mancharikurqanku! Jinan Jehová Diosqa paykunapura wañuchinakunankupaq tanqarqan. Chhaynapin chay runakunaqa 15.000 soldadokunallaña salvakurqanku jinaspa ayqekurqanku.
Gedeonmi ichaqa chay runakunaman ayparqan, umalliqkunatapas wañuchirqanmi. Gedeonqa mana kasukuq Israel runakunatapas mana apoyaqkunatapas castigarqanmi. Chaymi runakunaqa Gedeonta rey kananpaq churayta munarqanku, paymi ichaqa nirqan: “Jehová Diosmi qankunataqa kamachisunkichis”, nispa. Jehová Diosqa bendecirqanmi Gedeonta mana manchakuq allin yuyayniyoq kasqanmanta. Chaymantapas juez kashaqtinqa Israel llaqtapiqa thajmi kausay karqan. Gedeonqa askha watakunatan kausarqan, sutintapas allin iñiyniyoq askha qharikunaq, askha warmikunaq kasqanpin apóstol Pabloqa churarqan (Heb. 11:32).
Kay textokunata leey
¿Imaniwaqmi?
¿Imakunata ruwaspan Gedeón rikuchirqan mana manchakuq kasqanta?
Astawan t’aqwiriy
1. Juj soldadon rikurqan “mosqoyninpi juj jatun cebada t’antata”, ¿imaynapin chay cebada t’anta tuparqan Gedeonpa ejercitonwan? (Jueces 7:13; it “Cebada” párr. 7 ).
2. ¿Imaraykun Madián runakunata mancharichirqan kinsa pachaj runakunaq waqra tocasqanku? (it “Cuerno” párr. 3). A
Imagen A: Oveja waqrata tocaqtinkuqa karumanraqmi uyarikuq.
3. ¿Imatan Gedeonpas ejercitonpas ruwarqanku Madián runakunata atipanankupaq? (w04 15/10 16 párrs. 9, 10). B
Imagen B: Gedeón Madián runakunata qatiparqan 80 kilómetros jina karuta, Jogbehá nisqakama (manan yachakunchu maynintapunis qatiparqan chaytaqa).
4. ¿Imakunan rikuchin Gedeonmanta willakuy cheqaqpuni kasqanta? (w05 15/4 32).
Imakunapin yanapawasunman
Gedeonpa umallisqanmi Diospa llaqtanqa paykunata ñak’arichiq runakunata atiparqanku. Chaywanpas Gedeonqa humilde sonqon karqan, kallpachakurqantaqmi jujkunawanpas thajpi kausananpaq (Juec. 8:1-3). ¿Imaynatan familiapi umalliqkunapas iñiq t’aqapi umalliqkunapas Gedeón jina kankuman pipas paykunawan phiñakuqtin?
¿Imakunapi tarikuspan mana manchakuq allin yuyayniyoq kananchis? C
Imagen C
¿Imakunata ruwaspan rikuchiwaq Gedeón jina mana manchakuq kasqaykita?
Kaykunapi astawan piensariy
¿Imatan kaypi yachasqayki Jehová Diosmanta yachachisunki?
¿Imaynatan kaypi yachasqayki tupan imatachus Jehová Dios munan chaywan?
¿Imatan tapuwaq Gedeón kausarimpuqtin?
Astawan yachanapaq
¿Imaynatan Gedeón jina kasqaykita rikuchiwaq Diospa llaqtanpi ima llank’aytapas chaskispa?
Juch’uyaykukuqkunan yachayta tarinku (w00 1/8 16-18 párrs. 11-15)
“Bibliamanta dibujokunawan yachanapaq” nisqawan yanapachikuy wawaykikuna astawan Diospi confianankupaq.