Gobiernokuna maytaña rimanakunkuman chaypas, ¿atinkumanchu kay pachaq cambiasqan sayachiyta? | ¿Imatapas Biblia willashanmanchu chaymanta?

Kay 2022 watapin domingo 20 noviembrepi tukurqan Conferencia de las Naciones Unidas sobre el Cambio Climático (COP27) nisqa juñunakuy. Chaypin gobiernokuna, juj autoridadkuna, yachayniyoq runakuna ima rimanakurqanku clima nisqa nishuta cambiasqan causa imaymanapi ñak’ariq nacionkunaman yanapaykuna apachinankupaq. Allinña chay ruwasqanku karqan chaypas, wakinqa “manan chaywanqa imapas allichakunmanchu” nispan ninku.

• Naciones Unidas nisqapi secretario wiraqocha António Guterresmi kay 2022 watapi sábado 19 noviembrepi nirqan: “Kusikunin Ilakipi tarikuq nacionkunata yanapakunapaq rimanakusqanta uyarispa […]. Ichaqa manan chayllaqa imatapas cambianqachu […]. Kay jallp’anchisqa nishu onqosqapas kashanman jinan kashan”, nispa.

• Ñaupaq watakunapi Irlanda nacionpi presidenta, jinallataq ONU nisqapi ñaupaq jatun autoridad Mary Robinson sutiyoq señoran nillantaq: “Kay mundonchisqa nishutapunin sufrishan, nishutapunin clima nisqaqa cambiashan”, nispa.

Wayna-sipaskunan aswan llakisqa kashanku imaynatachus kay pacha cambiapushan chaymanta. ¿Atinkumanchu gobiernokuna chaykuna sayachiyta, rimanayukuspa kuskamanta llank’ayta? ¿Imanishanmanmi Biblia chaykunamanta?

¿Atinkumanchu gobiernokuna chaykuna sayachiyta?

Bibliaq willasqanman jinaqa, maytaña wakin runakuna kallpachakunqachu chaykunata cambianankupaq chaypas manan atinqakuchu. ¿Imarayku? Chaypaq qhawarisun imatachus Biblia nishan chayta.

• Eclesiastés 1:15 textopin nishan: “Q’ewisqa kaqtaqa manan rectoyachiyta atikunmanchu”, nispa.

  ¿Ima ninantaq chayri? Gobiernokunaqa kallpachakunkuña chaykunata cambianankupaq chaypas fracasankupunin. Paykunaqa manan jujkunata gobiernanankupaqchu kamasqa karqanku (Jeremías 10:23). Gobiernokuna imaynamantaña rimanakunqaku chaypas manan kay pachapi ima llakitapas ni ñak’ariytapas chinkachiytaqa atinqakuchu.

• 2 Timoteo 3:2, 3 textopin nishan: “Runakunan kanqa paykuna kikinkuta munakuqkuna, qolqe sonqokuna [...], mana uyakuq k’ullukuna”, nispa.

  ¿Ima ninantaq chayri? Kay tiempo runakunaqa paykunallapin piensananku karqan, munaynillankutan ñaupaqman churananku karqan, manataqmi ima acuerdomanpas jaykuyta munanankuchu karqan. ¿Chhaynan kashanku runakunaqa riki?

Chaykunaqa manan chhaynallachu kanqa, cambianqan

Manan runakunamantachu kay pacha imaynachus kanqa chayqa, aswanpas Jesucristomantan chayqa kashan. Paytan Jehová Dios churan llapa kay pachata gobiernananpaq, payqa allin preparasqan kashan chaypaq. Paymantan Biblia nin:

• “Paypa makinpin kamachikuyqa kanqa, paytan sutichanqaku: Sumaq Yuyaychaq, Atiyniyoq Dios, Wiñaypaq Tayta, Thaj Kaywan Kamachikuq, nispa” (Isaías 9:6).

Jesusmi kashan Diospa gobiernonpi kamachikuq rey, payqa janaq pachamantan kamachikamunqa (Mateo 6:10). Payqa atiyniyoq yachayniyoq reymi. Chaymantapas payqa maytapunin munashan kay pacha munayman tukupunanta, chaypi tiyaqkunapas kusisqa tiyananchista (Salmos 72:12, 16) Payqa gobiernamuspa jinan “jallp’a pacha malograqkunata ch’usaqman” tukuchipunqa, tukuy imatataq munayta allichapunqa (Apocalipsis 11:18; Isaías 35:1, 7).

Kay pachapiqa ruphaypas, parapas imapas manan igualñachu. Imaynatas chaykuna allichakapunqa chayta astawan yachay munanki chayqa leey “¿Qué dice la Biblia sobre el cambio climático y nuestro futuro?” nisqa yachachikuyta.