CAI MUNDOPI LLAQUICUNATA CHIMBAPURANGAPACA

1 | Ñucanchi saludta cuidapashunchi

¿IMAMANDATA IMPORTANTE CAN?

Llaquicunaca ñucanchi saludtami afectaita ushan.

Llaquicunahuan cashpami estresarinchi. Chaimi estreshuan cashpaca shuj shuj unguicuna japita ushan.
Huaquinbica ungushcacunata jambingapaca doctorcunapash, jambicunapash na tianllu.
Shinallata ashtaca gentecunaca micunaguta, jambicunata randingapapash culquigutaca na charinllu.

¿Yachaparcanguichu?

Imapash unguihuan cashpa, estresado cashpami naliguta pensarishpa nali decisiongunata japi ushanchi. Nali decisiongunata japishcamandami ñucanchi saludpash afectarita ushan.
Imapash unguihuan cashpa doctorpaman na rishpaca ashtahuan empeorarishpami huañuitapash ushanchi.
Sano cashpami ima problemacuna ricurijpipash ali decisiongunata japi ushashun.
Na yapa culquiguta charishpapash ñucanchi saludta cuidangapami imagutapash rurai ushapanchi.

¿Imatata rurai ushapangui?

Aliguta pensarishpa imagutapash ruraj gentecunaca ama llaquicunapi urmangapami cuidarin. Unguicuna ama japichunmi limpioguta causangapaj ninanda esforzarina capanchi. Nara imapash pasajpillatami cuidarina capanchi.

Andreasca ninmi: “Limpio cangapaj esforzarimanda, huasigutapash limpio charingapaj esforzarimandami doctorcunapi, jambicunapipash na yapa culquita gashtanchi”.a

a Huaquin shuticunataca cambiashcanchimi.

CAI MUNDOPI LLAQUICUNATA CHIMBAPURANGAPACA: Cai consejocunata catipashunchi

Quiquinba saludta cuidangapaca cai consejocunatami catita ushapangui

LIMPIOGUTA CAUSANGAPAJ ESFORZARIPANGUI

Limpioguta causangapaj esforzaripangui

Bibliapica ninmi: “Ali yuyaita charij runaca, ima llaqui japinata ricushpaca pacajunmi” (Proverbios 22:3). Ñucanchi saludpa imapash nali cajpica chaicunata saquingapaj esforzaripashunchi.

Micunata nara tacarishpallata, bañoman rishca jipapash maquita jabonhuan maillana costumbreta charipashunchi.
Shinallata huasitapash ali limpiashpa charipashunchi, ashtahuanbachaca cutin cutin tacarina pushtucunata desinfectashpa charipashunchi.
Usharijpica contagioso unguicunahuan caj personacunahuanga ama tandanajupashunchichu.

SANO MICUNACUNATA MICUPANGUI

Sano micunacunata micupangui

Bibliapica ninmi: “Nunca na pipash paipa cuerpotallataca millanayachinllu. Sino, juyaihuan cuidashpa, aliguta micuchishpami charin” (Efesios 5:29). Ñucanchi cuerpota cuidangapaca ¿imatata rurana capanchi?

Yacuta seguido ufiapangui.
Frutacunata verduracunata micupangui
Virata, cachita, mishquitapash ama yapata micupanguichu.
Tabacota, drogacunatapash ama chupapanguichu, tragotapash ama yapata ufiapanguichu.

Carlosca ninmi: “Ama imapash unguihuan japi tucungapami sano micunaguta micungapaj esforzaripanchi. Sano micunaguta na micushpaca culquigutaca doctorpirami gashtanchiman. Chaipa randica culquigutaca sano micunaguta randingapami utilizanchi”.

ALIGUTA SAMAPANGUI, EJERCICIOTA RURAPANGUI

Ejerciciota rurapangui

Bibliapica ninmi: “Ishcai maqui jundata ninanda trabajashpa, yuyaita shaijuchingapaj randica, shuj maqui jundatalla trabajashpa, ashaguta samanami ashtahuan ali” (Eclesiastés 4:6). Trabajana cashpapash samangapaj tiempoguta llujchinami capanchi.

Ejerciciota rurapangui. Chaipaca callaripica puringapami seguido llujshita ushapangui. Ejerciciota rurashpami ña mayorlla cashpapash, ima unguita charishpapash quiquinba salud mejoraita ushan.
Aliguta samapangui

Aliguta samapangui. Nali puñushpaca estrés ungui japijpimi aliguta concentraritapash na ushapangui. Jipamangarin grave unguicunapashmi japita ushan.
Puñungapaca shuj horariota rurashpa chai horariota pactachingapami esforzarina capangui. Shinallata chai horasllata puñungapaj, jataringapapashmi esforzarina capangui.
Ña puñungapaj sirijushpaca teletapash, celulartapash, tablettapash na ricujunachu capangui.
Puñugrijushpaca na yapata micunachu canchi, cafetapash, tragotapash na ufianachu canchi.

Justinca ninmi: “Aliguta puñunami ñuca salud ali cachun ayudahuan. Nali puñushpaca umatapash, cuerpo enterotapashmi nanahuan. Pero ali puñushpaca fuerzata charishpami na yapa unguni”.