CAI MUNDOPI LLAQUICUNATA CHIMBAPURANGAPACA

4 | Jipa punllacunapi ali causaigu tianata yaria causapashunchi

¿IMAMANDATA IMPORTANTE CAN?

Cai mundopi shuj shuj llaquicunata charimandami huaquinbica mentepipash, cuerpopipash nali sintirishpa unguita ushanchiman. Ashtaca llaquicunata charishpaca esperanzatapashmi chingachishun. Esperanzata chingachishpaca ¿imashi pasanga?

Huaquingunaca jipa punllacunapi ima pasanataca na yachangapaj munanllu.
Cutin shujcunaca drogarishpalla, machashpallami causan.
Huaquingunaca cai mundopi causashpa catina na valinllu yashpami ñana causashpa catingapaj munan.

¿Yachaparcanguichu?

Huaquin problemacunaca na yashcapimi mejoraita ushan.
Problemata charishpa chai problema na tucurijpipash aguantangapaj usharishcaguta rurapai.
Bibliapica tucui problemacunami tucuringa nijunmi.

¿Imatata ruraita ushapangui?

Bibliapica ninmi: “Cayandi punllamandaca nunca na pinarijunachu capanguichi. Porque cayandi punllapashmi imapash pinarinacunaca tianga. Quiquingunaca cunan punlla tiashca problemacunapillami pensarina capanguichi” (Mateo 6:34).

Cayandi punllapa problemacunapi na yapa preocuparishpami cunan imata rurana cashpapash ruraita ushapangui.

Cayandi punllapa problemacunapilla pensarishpaca, estresarishpami esperanzatapash chingachishun.

CAI MUNDOPI LLAQUICUNATA CHIMBAPURANGAPACA: Cai consejocunata catipashunchi

PROBLEMACUNAPILLA AMA YAPATA CONCENTRARIPAI

Bibliapica ninmi: “Llaquilla causajuj runapaj causaipica, punllandimi ashtahuan llaqui shamun. Ashtahuangarin cushilla causajuj runapaj shungupica, punllandi jatun micuita ruranshnami causanajun” (Proverbios 15:15). Problemacunapilla yapata concentrarishpaca chai problemata arreglai ushashcataca na cuenta japinguimanllu. Shinapash positivo yuyaicunata charishpaca chai problemacunahuanmi chimbapuraita ushapangui.

Noticiacunataca ama yapata ricupanguichu.
Punlla tucurijpica imamandalla agradecido cashcata pensaripai.
Punllapi imagutalla rurana cashcata shuj listaguta rurapai. Imapash difícil ruraicunata rurana tucujpica chaicunata pactachingapaj imacunatalla rurana cashcata ricungapaj escribipangui. Shinami imatalla rurashcata cuenta japipangui.

AYUDATA MASCAPANGUI

Bibliapica nin: “Shujcunamanda caruyaj runaca paipa munaitalla rurangapaj munashpami ima alitaca na ricunayachin” (Proverbios 18:1, TNM). Por ejemplo, shuj jatun utujupi urmashpaca na ñucanchilla llujshita ushanchimanllu. Pipash ayudajpimi chaimanda llujshita ushanchiman.

Familiacunapa, amigocunapa ayudata mascaita ushapangui.
Quiquinbashmi familiacunata, amigocunata ayudai ushapangui. Shujcunata imagupipash ayudashpaca quiquinba problemacunapica na yapata preocuparipanguichu.
Ñanapacha causangapaj munajushpaca uchallami doctorpaman rina capangui. Huaquinbica chai sentimientocunaca depresión unguimanda o imapash shuj unguicunamandami japin. Depresión unguita charij gentecunaca doctorpaman rishpa shuj tratamientota catishpami ali tucushca.a

a ¡Rijcharipaichi! revistaca ima tratamientota japinataca na ninllu.

Bibliata yachajushpami esperanzata charipanchi

Bibliapi Salmos libropica: “Cambaj Shimica, ñuca chaqui sarunata punchayachijuj lamparagushnami, ñuca ñanda punchayachijuj michagushnami” nin (Salmo 119:105). Cai shimicunaca ¿imatata ningapaj munan?

Yana tutapi shuj lamparaguca maipi sarunata ricuchishpami ayudaita ushan. Shinallatami Bibliapica ali consejocunata taripanchi, chai consejocunami jatun decisionda japigrijushpaca ali decidichun ayudan.

Michaguca ñucanchi ñanbi imagutapash punchalla ricuchunmi ayudan. Shinallatami Bibliapica jipa punllacunapi ali causaigu tianatapash villajupan.

Bibliaca gentecuna imashna tiai callarishcata, jipa punllacunapi ali causaigu tianatapashmi villajun. Cai tapuicunatapashmi contestan:

¿Imashinata?

¿Imashinata llaquicunaca tiai callarirca? Bibliapica ninmi: “Shujlla runamandami, pecadoca cai mundopi tiai callarirca. Pecado tiashcamandami, huañuipash tiai callarirca. Shinami huañuica tucui gentecunaman yalirca. Porque tucui gentecunami pecadota rurashcarca” (Romanos 5:12).

¿Imamandata?

¿Imamandata gentecunaca llaquicunata na tucuchi ushashca? Bibliapica ninmi: ‘Pipash paipa causaitaca na mandai ushanllu’ (Jeremías 10:23). Cai mundopi tiashca llaquicunata ricushpami cai shimicuna cierto cashcata cuenta japipanchi.

¿Imatata?

Llaquicunata tucuchingapaca Taita Diosca ¿imatata ruranga? Bibliapica ninmi: “Paimi gentecunapa ñavimandaca, tucuilla viquita fichachinga. Huañuipash nunca más ñana tiangachu. Ima llaquipash, huacaipash, ima nanaipash nunca más ñana tiangachu” (Apocalipsis 21:4).