Georgette Douwma/Stone via Getty Images
ÑUCANCHI PLANETAHUANGA ¿IMASHI PASANGA?
OCÉANO
OCEANOCUNA tiaimandami huaquin micunacunatapash charinchi. Shinallata oceanocunapimi jambicunata rurangapaj ashtaca cosascunaca tian. Ashtahuanbash oceanocunamandami cai planetapica ashtaca oxígeno tian. Shinallata gentecuna shitashca mapa aireta o dióxido de carbonotami chupan. Oceanocunaca na chaitalla ruranllu. Climacunapash ali cachunmi ayudan.
Oceanocunaca peligropimi can
Climapi cambiocunaca arrecifes de coral nishcacunata, mariscocunata y yacupi tiashca shuj shuj causaicunatapashmi peligropi churan. Yacupi tiajcunamanda yacupi causajcunamanda 25 porcientoca arrecifes de coralcunamandami causashpa cati ushan. Cientificocunaca cazi tucui cai arrecifecunaca 30 huatacuna jipaca tucuringa ninmi.
Animalcunata estudiajcuna nishcashnaca, cada huatami ashtaca millón marpi causaj animalcuna plasticocunata micuimanda huañun. Shinallata, marpi causaj pajarocunamandaca 90 por cientomi plasticocunata micushca.
Naciones Unidasmanda secretario general António Guterresca nircami: “Oceanocunapica nunca na preocuparishcanchichu. Chaimandami cunanbica ‘emergencia oceánica’ nishcata yalinajunchi” nishpa.
Ñucanchi planetaca causai tiachun rurashcami can
Oceanocunapash chaipi causaj animalcunapash limpio, sano causachunmi rurashca can. Chaipaca oceanocunataca na contaminanachu canchi. Shuj libropi nishcashnaca: “Fabricacunapa culpamanda marpa shuj parte huaglishca cajpipash, cutin ali cachun arreglajpica chaipi causaica cutinmi tiai ushan” (Regeneration: Ending the Climate Crisis in One Generation). Huaquin ejemplocunata ricupashun:
Oceanocunapica fitoplancton nishca uchilla jamzi jurugucunami tian. Chai jurugucunami dióxido de carbonota chupan y alichin. Dióxido de carbonomandami calentamiento globalca mirashpa catin. Cai alpapi quirucuna, plantacuna dióxido de carbonota tandachishca tantotallatami fitoplanctonlla tandachin.
Yacupi causaj microbiocunami huañushca pescadocunata micushpa oceanocuna ama mapayashpa catichun ayudan. Cutin cai microbiocunataca yacupi causaj shuj animalcunami micun. Oceanocunamanda parlaj Smithsonian Institution nishcashnaca, “cai ciclo tiashcamandami yacupi tiaj tucui animalcuna beneficiarin, oceanocunapash limpio cashpa catin”.
Yacupi causaj ashtaca animalcunaca paicunapa sistema digestivota utilizashpami ácido yacucunataca, alcalinas yacuman tigrachin. Chaimi coralcuna, mariscocuna, shuj animalcunapash sano cachun ayudan.
¿Imata ayudai ushan?
Cutin utilizai ushanalla bolsacunata, botellacunata utilizashpaca, oceanocunapi ama yapa plástico cosascuna tiachunmi ayudanchi.
Oceanocunaman basuracuna na chayajpica limpianaca nunca na minishtirinmanllu. Oceanocunata estudiajcunaca plástico cosascunata shuj viajella utilizajunapa randica, cutin utilizai ushashca shuj cosascunatami utilizana canguichi ninmi.
Chaitallaca na ruranachu canchi. Chairallami oceanocunata cuidaj shuj organizacionga, shuj huatapilla 8 mil 300 tonelada basuracunata 112 playacunapi tandachirca. Oceanocunapi cada huata tiashca tucuilla basuracunahuan ricujpica, cai tandachishca basuraca ashagullami can.
Oceanocunamanda parlashpaca National Geographic revistaca, “ácido yacucunaca pundashna cutin limpio yacumanga na tigrangachu” ninmi. Shinallata “gentecuna aceitehuan, gashuan, carbonhuan oceanocunata ashtacata contaminajpimi yacupi causaj animalcuna, plantacunaca oceanocunata limpio charitaca na ushan. Shinapash aceitemanda, gasmanda, carbonmandami mundopica culqui tian” ninmi.
Esperanzata charingapaj razonguna. Bibliaca ¿imatata nin?
“Cai pachaca, can carashca alicunahuan jundami. Ricui, cai jatun mama cuchapipash, na cuentai ushanalla animalcunami causan. Uchilla animalcunapash, jatun animalcunapashmi chaipi causan” (Salmo 104:24, 25).
Tucuita ruraj Taita Diosca oceanocunataca paicunallata limpio chari ushachunmi rurarca. Pensaripai: Tucuita ruraj Taita Dios mar ucuta, mar ucupi tucui ima tiashcata alipacha rijsishpaca ¿nacha oceanocuna contaminashca cajpipash pundashna cutin limpiota rurai ushanman? “Taita Diosca ñucanchi planetataca alichisha ninmi” temata cai revistapa página 15pi ricupangui.