Febrero

Aguantashpa causanami ñucanchitaca ‘ima pandatapash na rurashpa’ causachun o Jesusta ashtahuan ali catichun ayudan (Sant. 1:4). Imapash problemata charishpaca pacienciata charinata, agradicinata, ashtahuan juyanatami yachajuna canchi. Chaimandami imapash problema ricurijpica Jehovata siempre cazuna canchi. Problema ricurishcandi Jehovata na cazungapaca na munanachu canchi. Ishcai ejemplota ricupashun. Nali pensamientocunata ama charingapaj esforzarinajushcanchiman. Na ushanichu nishpa nali pensamientocunata charishpa catinapa randica Jehovatami mañana canchi, nali pensamientocunata mishangapaj ayudahuai nishpa. Shinallata shuj familiaca, ñucanchicuna na Testigo cachun munashpa imapash jarcaicunata churashcanman. Na ushanichu nishpa shaijunapa randica Jehovata sirvishpami catina canchi. Jehová Dios bendiciachun munashpaca aguantashpa catinami canchi (Rom. 5:3-5; Sant. 1:12). w16.04 2:15, 16

Gentecunaca paicunapa llactamanda, costumbrecunamandami jariyashpa parlan. Shinapash Jehová Diosca shuj llactamanda gentecuna ashtahuan ali cashcataca na pensanllu. Tucuicunallatami shuj shuj laya gentecuna tiashcataca alicachishpa ricuita ushanchi. Jehová Diosca ñucanchi llactata, ñucanchi causaita ladoman saquichunga na munanllu. Shinallata, ñucami shujcunamanda ashtahuan ali cani yashpa pensachunga na munanllu (Rom. 10:12). Shina pensanajushpaca imapipash na chapurishca cashcataca na ricuchi ushashunllu. Jesusta punda catijcunata yaripashun. Hebreo shimita parlaj huauquipanicunaca, griego shimita parlaj viuda panicunatami nali tratanajurca (Hech. 6:1). ¿Ñucanchipashchu ñucanchi llactata yapata alicachi callarinajunchi? Pensaripashunchi: “Shuj llactamanda huauqui shuj consejota cujpica ¿imatata rurani? ¿Ñuca llactapimi cosascunataca ashtahuan ali ruranchi nishpachu, chai huauquipa consejotaca na chasquingapaj munani?” nishpa. Shina pensajushpaca cunan punllapa textopi Biblia ima nijtami yarina canchi. w16.04 4:12, 13

Jesusca paipa catijcunapash chai ali villaitallata villachichunmi munan. Shinaca ¿maijan religionda chaita rurajun? (Mat. 28:19). Testigo de Jehovacunallami Jesús villachishca ali villaicunataca villachinajun. Ñucanchita nalicachishpa ricuj gentecunapashmi shina nishca. Shuj jarica misionero, curami carca. Paica shuj Testigohuan parlashpaca nircami, cada llactapimi Testigocunataca tapun carcani ¿imata villachishpata puringuichi? nishpa. Shinapash Testigocunaca tucuillami muspashna nin, ‘Diospa Reinomanda ali villaicunatami’ villachinajunchi nishpa. Shinapash Testigocunaca na muspacunachu canchi. Ñucanchicunaca Jesusta ali catishpa tucuillacuna shujllashna tandanajushca caimandami, maipi cashpapash chaitallata villachinchi (1 Cor. 1:10). Cai revistapash Diospa Reinomandami ashtahuan parlan. Cai revistapa shuti completoca Jehová Diospa Reinomandami Villajun nishcami can. 254 shimicunapimi llujshin. Ashtahuangarin, cada quillami mundo enteropica casi 59 millón revistacuna llujshin. w16.05 2:6

Precursor cangapaj munashcanchiman. Villachingapaj tiempota charingapapash huaquin cambiocunata ña rurashca cashcanchiman. Shinapash tal vez pensarinajushcanchiman ¿ashalla culquihuan, ashalla cosascunahuan causashpaca cushilla causashacha? nishpa. Bibliapica na nijunllu, Jehovata sirvingapaca precursorcunami cana canguichi nishpa. Publicadorcuna cashpapash Jehovataca alimi sirvin. Shinapash Jesusca yachachircami, cangunapa munaicunata huashaman saquishpa Diospa Reinota pundapi churajpica Jehová Diosca bendiciangami nishpa (Luc. 18:29, 30). Ashtahuangarin paita alabangapaj esforzarijcunataca alicachishpami Jehová Diosca ricun. Jehová Diosca paita sirvishpa cushilla cachunmi munan (Sal. 119:108). Shinaca chai cosascunamanda Jehovata mañashpa, chai cosascunapi pensarishpaca ñucanchipallata ali cana decisiongunatami agllai ushashun. Chaimi Jehová Diospash bendicianga. w16.05 3:13

Ashata mayorllacuna cashpaca na pensanachu canchi, jovengunapa informacionda liinaca na minishtirinllu nishpa. Shina pensashpaca jatun tucushcacuna cashcatami ricuchishun. Mayorcunapashmi jovengunapa llujshishca temapi problemacunataca charinchi. Shuj ejemplota ricupashun. Tucuicunallatami ñucanchi crishcacunata difindina, ñucanchi munaicunata controlana, shujcunapa nishcacunata ama catingapaj esforzarina, nali cumbacunamanda cuidarina, nali diversiongunamanda caruyana canchi. Jovengunapa llujshishca informaciongunapash Bibliamanda japishcami can. Shinaca, jovenguna cashpa, mayorcuna cashpapash tucuicunami chai informaciondaca aprovechai ushanchi. Jovengunapa llujshishca temacunaca Jehovaman ashtahuan quimirichunmi paicunataca ayudan. Mayorllacunapapashmi jovengunapa publicaciongunaca ali can (Ecl. 12:13). w16.05 5:15, 16

Jehová Diosca ‘shujlla Diosmi’ can. Chaita yachanami ñucanchitaca ashtacata animan. Israelitacunaca Jehová Dios ‘shujlla Dios’ cashcata yarishpami Jehová carasha nishca alpacunaman chayashpa contracunata mishangapaca fuerzata chari usharca. Ñucanchipash Jehová Dios ‘shujlla Dios’ cashcata yarishpami Ninan Manllanai Llaqui Punllacunamanda salvaringapapash, Paraisopi tucuilla huauquipanicuna shujllashna tandanajushca cachun ayudangapapash fuerzata charishun. Shinaca Jehová Dios ‘shujlla Dios’ cashcataca ¿alichu intindinchi? Ali intindishpaca Jehovatalla adorashpa, paita tucui shunguhuan, tucui almahuan, tucui ushaihuan sirvishpa catishunchi. Shinallata tucuilla huauquipanicunahuan shujllashna tandanajushca cangapaj esforzarishpa catishunchi. Chaimi Jesusca paipa llamagucunatashna agllashpa ñucanchitaca ninga: ‘Ñuca Taita bendiciashcacuna shamupaichi’ nishpa (Mat. 25:34). w16.06 3:2, 20

Shungupi jariyashcacunaca, pretextocunata churashpami paicuna nalita ruranajushcataca na cuenta urman. Ñucanchicunapash shina rurashpaca Jehová Dios ñucanchita shuj alpa mangagutashna formachunga na saquinajushunllu. Shinaca, maijanbash huauqui llaquichijpi o congregacionbi privilegiocunata, quichujpica ¿imashinata shungu ucupica sintirircanchi? Ñucanchi huauquipanicunahuan tranquilo ali cana, Jehovata cazuna ashtahuan importante cashcatachu intindircanchi? (Sal. 119:165; Efes. 4:32). Juchata pacashpaca Diospa consejocunata chasquinaca na facilchu canga. Jahuallami juchatapash rurashpa catishun (Ecl. 8:11). Shuj huauquica, asha tiempotaca pornografía nishcata ricuna nali costumbretami charirca. Paica na cuenta japishpapash, asha ashami ancianocunataca nalicachishpa rimai callarirca, Jehovapa ñaupajpi ali ricuritapash ñana usharca. Shujcuna pai imata ricujujta yachaj chayajpimi, paica ancianocunapa ayudata chasquirca. Ñucanchita consejajcunata nalicachishpa huashalla rimai callarishpa o pretextocunata churai callarishpaca ñucanchi shungutami shinlliyachinajunchi. Chaimandami ñucanchi shungu ama shinlliyachunga, Jehovata perdonahuai, ayudahuai nishpa mañana canchi. w16.06 2:5, 6

Jesusca paipa catijcuna micunaguta tarinamanda o ropamanda preocuparinajujtaca alimi yacharca. Ropapash, micunapash minishtirishca cosascunami can. Shinapash chaicunapi yapata preocuparishpaca Jehovata sirvinatami paicunaca ladoman saquita ushanman carca. Chaita ali yachashpami Jesusca chuscu viajecaman advirtirca, ama chaicunata munanajuichichu, ama musparinajuichichu nishpa (Mat. 6:27, 28, 31, 34). Culqui na pactajujpi chai cosascunamanda preocuparinaca alimi can. Gentecuna cada punlla imata minishtijujtaca Jesusca alimi yacharca. ‘Cai tucurimui punllacunapi’ causana shinlli cashcatapash Jesusca alimi yacharca (2 Tim. 3:1). Cunan punllacunapi gentecunaca na trabajota tari ushanllu, cosascunapash ashtahuanmi valishpa catin. Huaquin llactacunapi gentecunacarin pobre pobrecunami can. Huaquinbicarin, micungapajpash nimata na charinllu. Shinapash Jesusca alimi yacharca, gentecunapa causai, cuerpo ashtahuan importante cashcata. w16.07 1:8, 9

Jehovata tucuipi cazuitaca pipash na ushanchichu. Chaimandami causana derechotaca pipash na charinchi. Jehová Dios ñucanchita llaquichunmi minishtinchi. Rey Salomonga nircami: ‘Cai pachapica, alitalla ruraj ima horapash juchata na ruraj runaca shujllapash napacha tianllu’ nishpa (Ecl. 7:20). Ashtaca huatacuna jipapash apóstol Pabloca nircami: “Tucuicuna juchata rurashcamandami, Taita Diospaj punchapambagumanda anchuchi tucushca” nishpa. Ashtahuangarin nircami: ‘Juchaca huañushpa chingagrinatami cujun’ nishpa (Rom. 3:23; 6:23a). Jehová Diosca juyaimandami paipa shujlla Churita ñucanchimanda huañuchun cachamurca. Shina rurashpami ñucanchita llaquishpa jahuan jahuan carashcata ricuchirca (Juan 3:16). Apóstol Pabloca nircami: ‘Ninan llaquita apashpa huañushcamandami Jesusca juyailla coronata churajushca’ can. ‘Taita Diospa ninan juyaimandami tucuicunamanda huañurca’ nishpa (Heb. 2:9). Shinaca “Jesusmandami causaita causagrinata Taita Diosca yanga caramujun” (Rom. 6:23b). w16.07 3:3, 4

Cazaranaca normalmi can. Adanda rurashpaca Jehová Diosca Adandaca nircami, tucui animalcunamanmi shutita churana cangui nishpa. Animalcunaman shutita churajushpaca, tucuilla animalcuna shuj cumba huarmiguta charijtami ricurca. Shinapash “Adanda cumbashpa paita ayudajca, na tiarcachu”. Chaimandami Jehová Diosca, Adanda puñuchishpa paipa costillasta llujchishpa shuj huarmita rurashpa Adanba huarmi cachun Adanmanga ricuchirca. Shinaca Jehová Diosmi cazaranataca churarca (Gén. 2:20-24). Ashtaca huatacuna jipapash, Jesusca nircami: ‘Jarica taitatapash, mamatapash saquishpami paipa huarmihuan causangapaj tandanajunga. Shina tandanajushpaca, ishcai cashpapash shujlla aicha tucushpami causanajunga’ nishpa (Mat. 19:4, 5). Jehová Diosca Adanbash, Evapash siempre igual causachun munashpami Evataca Adanba costillasmanda rurarca. Chai yuyaitami Adán y Evaca ali intindina carca. Jehová Diosca cazarashcacuna divorciarichun o cazarashca jahua tauca huarmita, tauca cusata charichunga nunca na munarcachu. w16.08 1:1, 2

Jesusca cada unohuan parlanatami alicachin carca. Paica cushilla quimirishpami parlan carca. Shuj punllaca, Sicar llacta ladopi tiaj pozopi yacuta llujchingapaj rij huarmiguhuan parlangapami Jesusca quimirirca (Juan 4:5-30). Cutin shuj punllaca impuestocunata cobrajuj Mateo shuti runaguhuanbash parlangapaj quimirishpami Jesusca ¿nachu ñucata catingapaj munahuangui? nirca. Shina nijpimi Mateoca ari munanimi nishpa jipamanga Jesustapash shujcunatapash paipa huasipi micungapaj richun invitarca. Chaipimi Jesusca tandanajushca ashtaca gentecunahuan parlarca (Mat. 9:9; Luc. 5:27-39). Natanael shuti runagu Jesushuan parlajushpaca, Nazaret llactamanda gentecunataca nalicachishpami parlarca. Nazaret llactaca Jesuspa llactami carca. Shina parlajpipash Jesusca ali shimicunahuanmi parlashpa catirca. Chaimandami Natanael runaguca Nazaret llactamanda Jesús cajpipash paitaca alicachishpa ricui callarirca. Ashtahuangarin Jesusmanda ashtahuan yachajungapami munarca (Juan 1:46-51). Shinaca Aliguman cushilla parlajpica gentecunaca tal vez ñucanchita uyangapaj munangami. Gentecunahuan imashina parlanata yachachijpimi mushujcunapash villachingapaj rinataca ashtahuan ashtahuan alicachinga. w16.08 4:7-9

Huaquin cusahuarmicunaca jatun problemacunata na arreglai ushashpami separarin o divorciarin. Shinapash ¿imatata Jesusca separarinamandaca nirca? Jesusca cusahuarmicunamanda Jehová Dios imata nishcata parlashpami nirca: ‘Taita Dios tandachishcataca runaca napacha shicanyachinachu’ can nishpa (Mat. 19:3-6; Gén. 2:24). Imashinami ricunchi, Jehová Diosca cazarashcacuna separarichunga na munanllu (1 Cor. 7:39). Tucuicunami Jehová Diospa ñaupajpi imata rurashcata ricuchinataca na cungana canchi. Chaita yarinami problemacuna nara ashtahuan mirajpillata uchalla arreglachun cusahuarmicunataca ayudanga. w16.08 2:10, 11

Tucui tiempomi rijchariashna causana canchi. Ñucanchi contracunaca na yashcapi o espiritualmente irquilla cajpimi jaicata llaquichi ushan. Bibliapi nishca shinaca, macanajunshna esforzarishpaca nali munaicunata, nali yuyaicunata mishai ushashunmi. Shinapash ñana esforzarijpica, Diablopash, cai mundopash, ñucanchi nali munaicunapashmi ñucanchitaca mishanga. Shinaca na desanimarishpami esforzarishpa catina canchi (1 Ped. 5:9). Mishangapaj munashpaca, Jehová Diospa ñaupajpi ali ricuringapaj esforzarijushcatami yaipi charina canchi. Hebreos 11:6​pica ninmi: ‘Taita Diospaman quimiringapaj pipash munashpaca, pai tiajtaca crinapachami. Paita mascashpa causajcunaman aliguta caranatapash crinapachami’ can nishpa. Caipi nishca shinaca, Jehová Dios ñucanchita bendiciachunga shinllitami esforzarina canchi (Hech. 15:17). w16.09 2:4,5

Bibliapi ali consejocunami Jehová Dios alicachishca decisiongunata agllachun ayudan. Tucuicunallatami shuj shuj ropata alicachinchi, shuj shuj ropata randinchi. Shuj shuj cashpapash ropaca siempremi limpio, na pinganai, na liqui cana can. Maijan llactapi causashpapash alimi ricuna can. Ashtaca almacengunapica mushuj moda llujshishca ropacunatallami jatun. Chaimandami, na pinganai ropata randinaca shinlli can. Na pinganai ricurij camizacunata, faldacunata o na yapa ajustado pantalongunata mascangapaca ashtahuan tiempomi minishtirin. Shina cajpipash esforzarishpa catinami canchi. ¿Imamandata esforzarishpa catina canchi? Ishcai yuyaicunata ricupashun. 1) Ñucanchi huauquipanicunaca ricunajunmi. Ñucanchi aliguta vistirijpica alicachishpami ricunga. 2) Ñucanchi munaicunata huashaman saquishpa aliguta vistirishpaca Jehovata cushichina jatun cushijuitami charishun. w16.09 3:15, 16

Quiquinba huahuacunapash imata yachajushcapi paicunallata aliguta pensarichun ayudapangui. Chashna rurajpica paicunaca aliguta yuyashpa, aliguta intindishpami yachajunga, imata yachajushcatapash alimi yaringa. Biblia imapipash na pandashpa villajushcata quiquinba huahuacunaman yachachingapaca cunan punllapa textomanda yachachita ushapangui. Huahuacuna aliguta pensarichunmi nita ushapangui, Jobpa punllacunapi gentecunaca cai Alpa imapillapash na huarcushca cashcataca na yachashcangachu. Paicunaca crinmi carca, tucui cosascunami imapash jahuapi tiajun nishpa. Chai punllacunapica telescopiocuna o imapash cosascunapash nara tiarcachu. Chaimandami cai Alpa imapipash na huarcushca cashcataca nara yacharca. Bibliaca punda tiempopi escribishca cashpapash, Jehová Dios escribichishca cashcamandami imapipash na pandashpa tucuita cabalta yachachin (Neh. 9:6). w16.09 5:9, 12

Jehová Diospi, Jesuspi feta charishpaca paicuna ñucanchimanda imata rurashcata, imata ruranata yachashca jahuapash paicuna munashcashnami causangapaj munanchi. Ashtahuangarin, shuj gentecunapash paicunata rijsichunmi ayudangapaj munanchi. Jehová Dios tucuita mandajujpi para siempre causangapaj munashpaca fetami charina canchi. Chai jahuapash ñucanchi fetaca shinlliyachishpami catina canchi. Ñucanchi feca shuj plantagu cuendami can. Shuj plantagu aliguta, juyailla viñashpa catichunga yacutami cutin cutin churana canchi. Yacuta na churajpica, chai plantaguca asha asha anguyashpami huañunga. Shinallata, shuj plantaguta cuendami ñucanchi fetapash ashtahuan shinlli cachun, ashtahuan mirachun ricuriana canchi (Tito 2:2; 2 Tes. 1:3; Luc. 22:32; Heb. 3:12). w16.10 4:4, 5

Babiloniocuna Danieltapash paipa amigocunatapash Babilonia llactaman apashpaca munai na munai paicunapa costumbrecunata, religionda catichunmi munarca. Chaimandami babiloniocunaca ‘caldeocunapa rimaita yachachirca’. Ashtahuangarin, Babilonia llactapa shuticunahuanmi paicunataca shutichirca (Dan. 1:3-7). Babiloniocunaca paicunapa ashtahuan importante Bel shuti yanga diosmandami Danieltaca Beltsasar nishpa shutichirca. Rey Nabucodonosorca paicunapa yanga diosra Jehová Diosmanda ashtahuan yali poderta charishcata pensachunmi shina rurashcanga (Dan. 4:8). Mishqui micunata micui nishpa ricuchijpica Danielca ‘paipa shungupimi’ yuyarca, reypa micunata micuimanda Taita Dios mandashca leycunataca napacha huashaman saquishachu nishpa (Dan. 1:8). Danielca Hebreo shimipi ‘Taita Dios escribichishca shimicunata’ ali estudiashpa catimandami caru llactapi causashpapash espiritualmente shinlli caita usharca (Dan. 9:2). Casi 70 huatacunata Babilonia llactapi causajushca jipapash, Danieltaca Daniel nishpami gentecunaca rijsin carca. (Dan. 5:13). w16.10 2:7, 8

1919 huatamandami Jesusca, Jehovata sirvijcunaman Bibliata intindichishpa yachachichun, Bibliapi ima nishcata cazuchunga ‘aliguta cazushpa, aliguta yarishpa sirvij’ esclavota churashca (Mat. 24: 45-47). Bibliapi ima nishcata cazushpami congregacionguna limpio, tranquilo, shujllashna tandanajushca cachun ayudanchi. Shinaca pensaripashunchi: “¿Jesustapash cazushpachu, ‘aliguta cazushpa, aliguta yarishpa sirvij’ esclavopa instrucciongunata catini?” nishpa. Bibliapimi yachajushcanchi, Jehová Diosca jahua pachapipash paipa organizacionda charishcata. Profeta Ezequielca, shuj muscuipishnami ricurca, Jehová Diosca shuj jatun carropishna tiajujta. Chai carroca maiman Jehová Dios munashcamanmi ñapash cuyurijurca (Ezeq. 1:4-28). Jesusca paipa angelcunandi tandanajushpami cai Alpapi tucuilla nali ruraicunata tucuchinga. Chaipica Jehovatapash paipa shutitapash na respetajcuna, Jehovapa mandashcata nalicachishpa rimajcunaca na tiangachu. w16.11 3:9, 10

Tandanajuicunapimi ñucanchicunaca Jehová Diosmandapash yachajunchi, caishujhuan chaishujhuanbash animarishpa cushichirinchi (1 Cor. 14:31). Ashtaca huatacunata Jehovata sirvinajujcunapashmi shujcuna animashpa cushichichun minishtin. Josueta yaripashun. Canaán alpacunaman ña chayagrinajujpica, Jehová Diosca Josuetami israelitacunata pushachun agllarca. Josueca ashtaca huatacunatami Jehovata sirvijurca. Shinapash Jehová Diosca, Josueta animashpa cushichichunmi Moisestaca nirca: “Cunanga Josuetaca, cushichishpa shinllichishpa mandangui. Paimi, israelcunata ñaupashpa rishpa, can ricugrijuj llactataca, paicunapaj cachun cunga” nishpa (Deut. 3:27, 28). Josueca shuj shuj llactacunahuanmi macanajuna carca. Shuj llactahuan macanajushpacarin huaquinbica mishai tucunami carca. Chaimandami Josueca Moisés animashpa cushichichun minishtirca (Jos. 7:1-9). Cunanbica, tucuicunallatami ancianocunatapash, superintendente de circuito huauquicunatapash animashpa cushichita ushanchi. Paicunaca ashtacatami shuj huauquipanicunataca ayudanajushca (1 Tes. 5:12, 13). w16.11 1:12, 13

Bibliamanda Yachajujcunaca familiacunaman, rijsicunaman, paicunapa iglesiacunapi cumbacunaman ñana cai iglesiamanda cangapaj munanchichu nishpapash tucuilla gentecunamanmi Babilonia shuti jatun puebloca shuj huainayaj huarmishnami can nishpa villangapaj munarca. Chaimandami ashallacuna cashpapash diciembre de 1917 huatamanda callarishpa 1918 callari quillacunacamanga, 10 millón tratadocunata gentecunaman saquirca. Chai tratadopica “Babilonia shuti jatun puebloca urmashcami” nishpami villachijurca. Ashtahuangarin, Jesustami catinchi nij tucushca religionguna imashina cajtami nijurca. Chaita uyashpa, ricushpaca iglesiacunapi ñaupaman pushajcunaca culirashcacunapachami cashcanga. Shinapash Jesusta ali catijcunaca ‘Taita Diostami, runacunatapash yali ashtahuan cazunapacha canchi’ nishpami villachishpa catirca (Hech. 5:29). Shinaca, Primera Guerra Mundial punllacunapica ¿Babilonia shuti jatun puebloca Jesusta ali catijcunataca prezotashnachu charijurca? Na. Ashtahuangarin, Babilonia shuti jatun pueblomanda libre quedanajushpami shujcunapash Babiloniamanda libre quedachun ayudangapaj munarca. w16.11 5:2, 4

Huaquingunaca ninmi, apóstol Pabloca Jesusta catijcunamanda, shinallata Jesusta na catijcunamandami parlajurca nishpa. Shinapash apóstol Pabloca Taita Diospalla ‘cachun agllai tucushcacunamandami parlajurca’ (Rom. 1:7). Shinaca ‘Diospa espíritu yachachijujta catijcunapash’, paicunapa ‘munaita rurashpa causajcunapash’ Jesusta catijcunallatami carca. Apóstol Pabloca nircami: “Ñucanchipaj munaitalla rurashpa causajpimi, mandashca shimicunaca, juchata rurana munaicunata ñucanchi cuerpopi ima tiajtapash yarichijurca” nishpa (Rom. 7:5). Apóstol Pablo yachachishca shinaca, paicunapa ‘munaitalla rurashpa causajcunaca’ paicunapa nali munaicunata pundapi churashpa chaicunata rurashpa causajcunami can. w16.12 2:5, 7

Huaquin gentecunaca punda pandarishca cosascunamandami yapata llaquirin. Rey Davidpash paipa pandarishcacunata yarishpami ninanda llaquirishpa musparirca. Chaimandami paica nirca: “Ñuca shungu nanaihuanmari aij nijuni” nishpa (Sal. 38:3, 4, 8, 18). Chashna sintirijushpami rey Davidca Jehová Dios llaquishpa perdonanataca tucui shunguhuan crirca. Jehová Dios paita perdonashcata yachashpami Davidca cushilla sintirirca (Sal. 32:2, 3, 5). Huaquinbica problemacunamandami yapata preocuparishpa llaquirinchi. Shuj ejemplota ricupashun. Salmo 55​ta escribijushpaca huañuchi tucunatami rey Davidca manllajurca (Sal. 55:2-5). Yapata llaquirishpa mushparijushpapash Jehovatami ayudahuai nishpa tucui shunguhuan mañarca. Mañashpapash paipa problemacunata arreglangapaj paipash esforzarina cashcatami rey Davidca ali yacharca (2 Sam. 15:30-34). Shinaca ninanda llaquirishpalla musparijunapa randica quiquin charishca problemata arreglangapami esforzarina capangui. Jehová Dios quiquinda ayudanatapash seguromi cana capangui. w16.12 3:14, 15

Davidca Jehová ayudachunmi saquishpami profeta Natán consejashpa intindichijpica ali uyarca shuj oracionda rurashpapash paipa juchacunata villarca. Shina rurashpami Davidca ciertopacha Jehová Diospa ñaupajpi cutin ali ricuringapaj munajushcata ricuchirca (Sal. 51:1-17). Paipa juchacunamanda cutin cutin nali sintirijunapa randica, juchata rurana na ali cashcata intindishpami chai juchacunata cutin ama rurangapaj esforzarirca. Huañungacamanmi Davidca shinlli feta charirca. Chaimandami Jehová Diospash alicachishpa Davidca yarin (Heb. 11:32-34). Shinaca Jatun juchata rurashpaca tucui shunguhuan arripintirishpami, ñucanchi juchata Jehová Diosman villashpa perdonahuai nishpa mañana canchi (1 Juan 1:9). Ancianocunahuanbash parlanami canchi. Ancianocunami Jehová Diospa ñaupajpi cutin ali ricurichun ayudaita ushan (Sant. 5:14-16). Jehová Dios ayudachun saquishpaca, Jehová Dios perdonanata confiashcatami ricuchinchi. Ashtahuangarin, juchata rurana na ali cashcata intindishpami Jehová Diosta ali sirvishpa catina canchi (Heb. 12:12, 13). w17.01 1:13, 14

Jariyashcacunaca autoridadta o derechota na charishpapash, ñapash fiñarimanda o pacienciata na charimandami imatapash ruranlla. Huaquinbica tucuicunallatami jariyashpa imatapash rurashcanchi. Shinapash imashinami rey Saulpa ejemplopi yachajurcanchi, jariyana costumbreta charijcunataca nalicachishpami Jehová Diosca ricun. Salmo 119:21​pica ninmi: ‘Jariyajcunataca ninanda nalicachishpami’ ricun nishpa. Jariyashca cashpaca jatun llaquicunapimi urmashun. ¿Ima llaquicunapita urmashun? Pundapica, autoridadta na charishpapash imatapash rurashpaca, shujcunahuanrami problemacunata charishun (Prov. 13:10). Shinallata, jariyashpa imatapash rurashcata shujcuna cuenta japijpica ñucanchillatami pingai tucushun (Luc. 14:8, 9). Ashtahuangarin, Jehová Diosta na respetashcatami ricuchinajushun. Ñucanchillata ama llaqui apachunmi Jehová Diosca humildemi cana canguichi nin. w17.01 3:4, 5

Adanga pai munashca shina causashcamandaca Jehová Diospa ejemplota ali catitaca ñana usharcachu. Shamuj punllacunapi ali causashpa catina bendiciondapashmi chingachirca. Paipa huahuacunamanga juchata, huañuitallami saquirca (Rom. 5:12). Adanba culpamandami paipa huahuacunapash para siempre causana oportunidadta chingachirca. Adán y Eva jucha illaj huahuacunata ñana chari ushajpimi, paipa huahuacunapash jucha illaj huahuacunataca na chari usharca. Diabloca Adán y Evata Jehová Dioshuan contrachishca jipapash, ñucanchitapashmi Taita Dioshuan contrachingapaj munan (Juan 8:44). Adán y Eva Jehová Diosmanda caruyajpipash, Jehová Diosca gentecunata juyashpami catirca. Chaimandami gentecuna paipa ali amigocuna cachun munarca. Gentecuna huañuchunbash na munarcachu (2 Ped. 3:9, NM ). Chaimandami Adán y Eva juchata rurashca jipaca, uchalla shuj arreglota rurarca. Chai arreglota rurashpapash paipa leycunata na huashaman saquircachu (Juan 3:16). w17.02 1:12-14

Shujcuna imata ali rurai ushashcata ricushpaca, shujcuna ñucanchitara alicachishpa ricuchunga na munanajushunllu. Shinallata shujcuna imata rurana cashcatapash na ninajushunllu. Chaipa randica consejota mañashpami paicunapa yuyaicunatapash chasquishun. Shinallata, ñucanchi huauquicuna imata ali ruranajujta ricushpaca imapash mushuj asignacionda chasquijpica cushijushunmi. Ashtahuangarin, ñucanchi huauquipanicunahuan igual sirvita ushashcamandami Jehová Diostaca agradicishun (1 Ped. 5:9). Ashtahuanbash, Bibliapi textocunami Jehová Dios imata pensajta, imashina sintirijta intindishpa pai alicachishca decisiongunata agllachun ayudan. Bibliata estudiashpa, Jehovata mañashpa, imata yachajushcata pactachishpaca ashtahuan ali concienciata charishpami shujcunapipash pensarishun (1 Tim. 1:5). Tucui chaicunata rurajpica Jehová Diosca ninmi, Jesusta ashtahuan ali catichun, humilde cashpa catichunmi ayudasha nishpa (1 Ped. 5:10). w17.01 4:17, 18

Tucuilla ñucanchi huauquicunata, panicunatami respetana canchi. Tucuilla huauquipanicunata respetana cashpapash ñaupaman pushaj huauquicunatami respetana canchi. Paicunami Jehovata sirvijcunata cuidashpa ñaupaman pushanajun. Bibliapi nishca shinaca, chai huauquicunaca Jehová Dios carashca cuendami can. Chaimandami, chai huauquicunataca maijan llactamanda cajpi, pobre cajpi, charij cajpi, estudiashca cajpi na estudiashca cajpipash respetana canchi. Apostolcunapa punllacunapi Jesusta catijcunaca congregaciongunata ñaupaman pushajcunataca alimi respetan carca. Ñucanchicunapash ñaupaman pushaj huauquicunahuan cashpaca, paicunataca na angelcuna cajpishnachu tratana canchi. Congregacionbi ashtacata ayudajushcamanda, humilde cashcamandami ñaupaman pushajuj huauquicunataca respetanchi (2 Cor. 1:24; Apoc. 19:10). w17.03 1:13

Rey Herodes Agripa I nishcami Judea llactataca mandai callarirca. Shinapash paica na humildechu carca. Shuj punllaca shuj jatun tandanajui tiajpimi Herodesca valishca ropata churajushpa punchapambata rirca. Paita ricushpa, parlajujta uyashpacarin, “Taita Dios rimachijpimari rimajun, na runaca rimajunllu” nishpami gentecunaca caparinajurca. Chaimi Herodesca ninanda cushijushpa ‘Taita Diosta punchapambagumi cangui nishpa alicachinataca’ na munarca. Chaimarndami Herodesca “jurucuna micujpi huañurca” (Hech. 12:21-23). Imashinami ricunchi, rey Herodesca Jehová Dios agllashca reyca na carcachu. Cutin Jesusca Jehová Dios paita agllashcatami ricuchirca. Jehová Diostaca siempremi alicachirca. Jehová Diosca ashtaca huatacunata paipa sirvijcunata Jesús ñaupaman pushachunmi munarca. Chaimandami causarishca jipaca Jesusca paipa catijcunataca nirca: “Jahua pachapipash, cai pachapipash mandajuchunmi, tucui ushaita Diosca ñucaman carahuarca. Ricuichi, ñucami cai pacha tucuri punllacaman tucui punllacuna cangunahuan cani” nishpa (Mat. 28:18-20). w17.02 3:20, 21