Julio

‘Tucurimui punllacunapi’ causanajuimandami jatun llaquicunata charipanchi (2 Tim. 3:1). Chaimi cai Alpapi nali ruraicunata Jehová Dios tucuchingacamanga llaquicuna mirashpa catinga. Shinapash Jehová Diosca ñallami shuj casilla ali causaiguta apamunga. Shinaca tapuripashunchi: ¿Pipa ayudatata mascanajupanchi? nishpa. Ashtaca huatacuna huashamanga, Salmo librota escribij runaguca nircami, ima problemata charishpapash Jehovapa ayudatami minishtinchi nishpa (Sal. 123:1-4). Jehová Diosta ricunshna causanataca shuj sirvij runahuanmi salmistaca chimbapurarca. Shuj sirvij runaca paipa amo micunaguta carachunlla, cuidachunllaca na shuyanllu. Chaipa randica paipa amo imashina cashcata ricushpami amopa munaita tucuipi cazungapaj munan. Shinallatami Jehová Diospa munai ima cajta ali intindingapaca Bibliata cada punlla liina capanchi. Shinami paipa munaita pactachishpa causashun. Chaimi Jehová Diosca ñucanchita ayudanga. w18.07 pág. 9 párrs. 1, 2

Jesusca chai shimicunahuanga ricuchijurcami, juchapa esclavo shina causanamanda gentecunata quishpichina cashcata (Juan 8:34). Juchapa esclavoshna causaimandami alita ruranapa randica nalitalla ruranchi. Chaimi llaquirinchi, sufrinchi, huañuitapash huañunchi (Rom. 6:23). Ñana juchayu cashpallami cushilla libre causaita ushashun. Shina causaitami Adanbash, Evapash chingachirca. Jesusca paipa nishcacunata ‘catishpa’ causana nishpaca, libre causaita charingapaj paipa nishcacunata pactachina cashcatami ricuchijurca (Juan 8:31). Jehovata sirvijcunaca ñucanchi causaita na llaquishpami Jesuspa nishcacunata pactachijushcata ricuchinchi (Mat. 16:24). Jesús paipa causaita cushpa ñucanchita salvashcamandami shamuj punllacunapica libre causaita charishun. w18.04 págs. 7, 8 párrs. 14-16

Jehová Diosca paita sirvijcuna pandata yuyanajujpipash, paicuna imashina sintirijtaca alimi intindin. Chaipaca Jehová Dios profeta Jonasman imata nishcata ricupashunchi. Jehová Diosca profeta Jonasmanga, Nínive llactapi causajcunata Jehová Dios llaquichigrinmi nishpa villachun cacharca. Shinapash chai llactamanda gentecuna arripintirijpimi Jehová Diosca chai llactataca na tucuchirca. Jonás villachishca shimicuna na pactarijpimi paica ‘ninanda llaquirishpa fiñarirca’. Shinapash Jehová Diosca profeta Jonás yangamanda fiñarishca cashcata ali intindichishpami ayudarca (Jon. 3:10–4:11). Jipamanga Jonasca pai pandata yuyajushcatami cuenta japirca. Jehová Diosca ñucanchipa ali cajpimi Jonashuan ima pasashcata yachajuchun Bibliapi escribichishpa saquishca (Rom. 15:4). Jehová Diosca paita sirvijcunata llaquishpa, paicuna imashina sintirishcata ali intindishpami ayudashca. Chaita yachaimandami ñucanchicuna imashina sintirishcata Jehová ali intindishcata seguro capanchi. Paica ñucanchicuna llaquicunamanda llaquilla sintirijtapashmi ali yachan. Shinallata Jehová Diosca ñucanchi yuyaicunata, ñucanchi shungu ucupi imashina sintirijta, ñucanchi imata rurai ushashcatapashmi ali yachan. Ashtahuanbash Jehová Diosca paita sirvijcuna nali munaicunapi o tentaciongunapi ama urmachunmi ayudan (1 Cor. 10:13). Jehová Dios ñucanchicunata llaquishpa ayudajta yachashpaca cushillami sintiripanchi. w19.03 pág. 16 párrs. 6, 7

Moisesman cushca Leycunapica israelitacunata ñaupajman pushajcunaca Jehová Diosmandallaca na yachachinachu carca. Ashtahuangarin problemacunata charijpi, plituricuna tiajpi, pitapash huañuchijpimi ayudana carca. Cunanga huaquin ejemplocunata ricupashunchi. Shuj israelita pitapash huañuchijpica ¿imatata rurana carca? Huañuchishca nishpallaca na huañuchinallachu carca. Ashtahuangarin chai llactamanda israelitacunata ñaupaman pushajcunaca, imamanda shina pasashcataca ali alimi ricuna carca. Chai jipami imata ruranatapash ricuna carca (Deut. 19:2-7, 11-13). Shinallata imacunamanda shina tucushcata, cusahuarmi imamanda culirarishcatapashmi ali ali tapuchina carca. Ña yachashpami imata ruranatapash ricuna carca (Éx. 21:35; Deut. 22:13-19). Israelitacunata ñaupaman pushajcuna Moisesman cushca Leycunata cazushpa, imagutapash ruranata agllajpica tucuicunallatami cushilla sintirin carca. Shinallata chai llactapi causajcunaca tucuicunallatami Jehová Diostapash jatunyachin carca (Lev. 20:7, 8; Is. 48:17, 18). Jehová Diosca ñucanchi causaipi imata rurajtapash ali alimi yachan. Shuj gentecunata juyaihuan tratachun, imatapash alita rurachunbashmi Jehová Diosca munan. Shinallata huasipi cashpa imata rurajujta, imata parlajtapash Jehová Diosca ricujunmi. w19.02 pág. 23 párrs. 16-18

Tucuicunallatami huaquinbica imacunamandapash yapata preocuparinchilla. Chaicunamandami huaquinbica imagumandapash ñapash fiñarinchilla. Huaquinbicarin, na ali pensarishpami ñapash nalitara ninchilla. Chaimi shujcunataca nali sintichinchilla. Yapata preocuparishca cashpaca Jesuspa ejemplotami yarina capanchi. Jesús cai Alpapi cashpaca huaquin quillacuna huañungapaj faltajpimi paica llaquilla carca. Jesusca yacharcami llaquinayaita huañuchi tucunata (Juan 3:14, 15; Gál. 3:13). Huaquin quillacuna pai huañuna punlla faltajujpica Jesusca llaquillapachami carca (Luc. 12:50). Huaquin punllacuna huañuna faltajujpimi Jesusca cashna nirca: ‘Ñucapaca ninan llaquimi chayamushca’ nishpa. Jehovata shina mañashpaca humilde, Jehovata cazuj cashcatami Jesusca ricuchirca (Juan 12:27, 28). Ña huañuna punlla chayajpica Jesusca na manllashpami contracuna paita llaquinayaita, pinganayaita huañuchi tucuna cashpapash huañuchichun saquirca. Jesusca Jehová Diospa munaitami pactachirca. Shinaca ñucanchicuna ima problemacunata charishpa o ima llaquicunata charishpapash Jesushna humilde cangapaj esforzaripashunchi (Is. 53:10). w19.02 pág. 11 párrs. 14, 15

Huaquinbica imapash jarcaicunamandami tucui tandanajuicunamanga na rita ushanchi. Chaimi na manllaj canaca minishtirishcapacha can. Huaquin huauquipanicunaca saludpi nali caimanda o llaqui llaqui sintirimandami tucui tandanajuicunaman ritaca na ushashca. Cutin shuj huauquipanicunaca paipa familia o gobiernocuna jarcaimandami tucui tandanajuicunaman rita na ushan. Cunan punllacunapica huaquin huauquipanicunaca paicunapa crishcacunamandami prezo can. Paicunataca ¿imashinata ayudai ushapanchi? Ñucanchicuna Jehovata tucui shunguhuan sirvishpami paicunataca ayudai ushapanchi (Heb. 13:3). Ñucanchicuna problemacunata charishca jahuapash Jehovata tucui shunguhuan sirvinajushcata yachaj chayashpaca chai huauquipanicunaca ninanda cushijushpa, Diospi crishpa, na manllashpami catin. Apóstol Pabloca Roma llactapi paipa propio huasipillatami prezo carca. Huauquipanicuna tucui shunguhuan Jehovata sirvishpa catijushcata yachaj chayashpaca ninandami cushijurca (Filip. 1:3-5, 12-14). Apóstol Pablo libre quedashca jipallami Hebreo huauquipanicunaman shuj cartata escribirca. Chai cartapica Jehovata tucui shunguhuan sirvij huauquipanicunataca tandanajunataca na saquinachu canguichi nishpami mandarca (Heb. 10:25). w19.01 pág. 28 párr. 9

Diabloca paipilla pensarimandami Jehovapa mandashcacunatapash na cazungapaj munan. Diabloca paishna yuyaj gentecunahuanmi ñucanchita pandachingapaj munan. Chai nali cumbacunahuan llevarishpaca ñucanchi “ali causajujtapash” huaglichishpami paicunashna pensangapaj, rurangapapash munashun (1 Cor. 15:33, MTQI ). Diabloca Jehová Diospi confianapa randica gentecunapa yachachishcacunapi confiachunmi munan (Col. 2:8). Ashtaca culquita charishpallami ali causai ushashun yashpa pensachunmi Diabloca munan. Shina pensanaca ¿imamandata nali can? Ashtaca culquita charingapaj munajcunaca ni paicunapillapash na pensarinllu. Paicunaca familiatapash, Jehovata sirvinatapashmi saquishca (1 Tim. 6:10). Jehová Diosca culquita charinamanda o na charinamandaca alimi ñucanchitaca yachachin (Ecl. 7:12; Luc. 12:15). w19.01 pág. 15 párr. 6; pág. 17 párr. 9

Jesús cai alpaman nara shamujpillatami Jehovata sirvijcunaca shujcunata animana minishtirishca cashcata ali yacharca. Rey Ezequiaspa ejemplota ricupashunchi. Asiriocunaca Jerusalén llactatami llaquichigrinajurca. Chaimi Ezequiasca israelitacunatapash, soldadocunata mandaj runacunatapash tandachishpa animarca (2 Crón. 32:6-8). Cunanga Job runagumanda ricupashunchi. Pai llaqui llaqui cajpimi shuj runacunaca animangapaj rirca. Jobta animanapa randica imacunatapash nishpami nali sintichirca. Shina nali sintichijpipash Jobca shujcunata imashina animanatami paicunataca yachachirca. Jobca nircami, ali shimicunata nishpami shujcunataca ñucaca animaiman carcani nishpa (Job 16:1-5). Jehová Diospash, Elihú runagupashmi Jobtaca animarca (Job 33:24, 25; 36:1, 11; 42:7, 10). w18.04 pág. 16 párr. 6; pág. 17 párrs. 8, 9

Profeta Isaiasca israelitacunata Jehová Dios imashina ayudanatami parlarca. Paica nircami: “Mandaj Jatun Diosca, ninan ushaihuan shamushpami, paipaj maquihuan mandanga” nishpa (Is. 40:10). Bibliapica maqui nishpaca ushaita ricuchingapami nisha nijun. Shinaca Isaiaspa shimicunaca Jehová Dios ushaita charij cashcatami yarichin. Punda tiempopica Jehová Diosca paita sirvijcunata ayudangapaj, salvangapami paipa ushaita utilizarca. Shinallatami cunanbipash Jehová Diosca paipi confiajcunataca shinllichishpa ayudajun (Deut. 1:30, 31; Is. 43:10). Pipash ñucanchita llaquichingapaj munajujpipash Jehová Diosca fuerzata cushpami ayudanga. Shuj shuj llactacunapica villachichunmi na saquishca. O ñucanchi organizacionda prohibishca. Shina jarcaicunata charishpapash na yapata llaquirishcanchichu. Jehová Diosca ninmi: “Maijan shinlli macanajunacunahuan shayarishpapash, candaca pipash na mishangachu” nishpa. Cai shimicuna shinllichishpa Jehovapi ashtahuan confiachunmi ñucanchitaca ayudan (Is. 54:17). w19.01 págs. 5, 6 párrs. 12, 13

Jehová Diosca Bibliamanda ashtahuan yachajuna munaihuanmi ñucanchitaca rurashca. Shuj animalgucuna cuendataca na rurashcachu (Mat. 4:4). Jehovapa consejocunata uyanaca ali yachaita charichun, ali intindichun, cushilla causachunmi ayudan. Jehová Diosca paimanda ashtahuan yachajuchunga Bibliahuan, “aliguta cazushpa, aliguta yarishpa servij” esclavo llujchishca ashtaca publicaciongunahuanbashmi ayudan (Mat. 24:45; Is. 65:13, 14). Bibliamanda ashtahuan yachajunaca ali yachaita charichun, imacunatapash ali pensarishpa rurachun, imapash nalicunata ama rurachunbashmi ayudan (Prov. 2:10-14). Bibliamanda ashtahuan yachajunaca ¿imacunatalla ali intindichunda ayudan? Taita Diosmanda llullacunata yachachishcamanda, ashtaca culquita charina munaimanda, ashtaca cosascunata charishpa cushilla causai ushangui nishcacunamanda intindichunmi ayudan. Shinallata nali munaicunapi, viciocunapi ama urmachunbashmi ayudan. Chaimi Jehová Dioshna pensangapaj, paipa ali yachaita charingapapash esforzarina capangui. w18.12 págs. 16, 17 párrs. 6, 7

Huaquin quirucunaca ashtaca ashtaca huatacunatami causan. Shinaca quirucunashna ashtaca huatacunata causangapaca gentecunaca sanocunami cana carca. Profeta Isaías nishcashna unai unaita causanaca na crinashnallami can. Shina cajpipash chai profeciaca pactaringapachami. Bibliapa huaquin profeciacunami shamuj punllacunapi shuj paraíso tianata ricuchin. Chai profeciacuna pactarijpimi Jehová Diosca cai Alpapi tucui gentecunata bendicianga. Chaipica millai animalcuna, nali gentecunapash nipita ñana llaquichingachu. Shinallata ñausacunapash cutinmi ricunga, na uyajcunapash cutinmi uyanga, suchucunapash cutinmi puringa. Paraíso Alpagupi gentecunaca paicunallata huasichishpa, tarpushpami chaipi fucushcacunata micushpa sano causanajunga. Chaipica quirucunatapash yalimi gentecunaca ashtaca ashtaca huatacunata causanajunga. Cai Alpapi shuj paraíso tianataca ¿imamandata seguro capanchi? Jesuspa nishcacunami cai alpapi shuj paraíso tianata seguro cachun ayudan (Luc. 23:43). w18.12 pág. 5 párr. 13; pág. 6 párrs. 14, 15

Ñucanchi yuyaita cambiangapaca Jehová Dios munashcashna pensangapami esforzarina capanchi. Shina rurashpaca Jehovapa yuyaicuna alipacha cashcatami cuenta japishun. Shinallata imata ruragrijushpapash siempremi Jehová Diospira pensarishun. Cunanbi gentecunaca Jehová Dios pensashcashnaca na pensanllu. Shinaca ñucanchi yuyaicunata cambiangapaca cai mundomanda gentecunapa nishcacunata, ruraicunataca na catinachu capanchi. Shina ruranaca minishtirishcapachami can. ¿Imamandata shina nipanchi? Chaipaca shuj chimbapuraita ricupashun. Ali micunatapash, putsujushca micunatapash micushpaca ¿sanochu causashun? Na, na sano causashunllu. Shinallatami cai mundomanda gentecunashna pensashpaca, Jehová Dioshna pensangapaj esforzarishpapash Jehová Dioshna pensaitaca na ushashunllu. w18.11 pág. 24 párrs. 14, 15

Bibliapa yachachishcacunata cada punlla ñucanchi causaipi pactachishpami causana capanchi. Cunanga caipi pensaripashunchi. Punda tiempopi soldadocuna macanajungapaj rishpaca alipacha cinturonda ajustarishpami rin carca. Cutin na ajustarishpaca llaqui apai ushanmanmi carca. Shinallatami Bibliapa yachachishcacunataca ‘cinturasta alipacha chumbilishcashna’ causana capanchi. Bibliapa yachachishcacunata cada punlla pactachishpami causana capanchi. Chai yachachishcacunami panda yachachishcacunata saquichun, imatapash ali decidichun ayudanga. Shinallata imapash nali munaicuna ricurijpi tucui shunguhuan chaicunata saquichunbashmi ayudanga. Shuj soldado macanajungapaj rishpaca nunca na cinturón illajca rinmanllu. Shina cuendami ñucanchicunapash Bibliapa yachachishcacunataca nunca na saquina capanchi. Ashtahuangarin imata yachajushcatami ñucanchi causaipi pactachishpa catina capanchi. w18.11 pág. 13 párr. 15

Bibliapa yachachishcacunata yachajungapami ninanda esforzarina capanchi. Chaipaca ¿imatata rurana capanchi? Ñucanchi munaicunatami huashaman saquina capanchi. Proverbios librota escribijca nircami, Bibliapa na llullaj shimitaca nimamanda na imahuanbash cambianachu can nishpa. Pipash imagutapash na cobrashpa carajpica, ¿nachu imagutapash paicunamanda ruranchiman? Hebreo shimipica “randina” nishpaca Proverbios 23:23​pi “imatapash japina cashcatami” ricuchijun. Shinaca imatapash japingapaj ninanda esforzarina cashcata o imapash valishca cosascunata na yanga cosascunahuan cambiana cashcatami ningapaj munan. Cunanga shuj ejemplota ricupashunchi. Shuj mercadopi platanosta carajunmi nijpica ¿imatata ruranchiman? Platanosta carajun nishpa pensarijpillaca platanosca ñucanchi maquimanga na shamunmanllu. Ashtahuangarin ñucanchillatami japingapaj rina capanchi. Shinallatami Bibliapa yachachishcacunata chasquingapaj culquita na cuna cashpapash, cada unomi imatapash rurana capanchi. w18.11 pág. 4 párrs. 4, 5

Jesusca Pedrota, Santiagota, Juandapash urcumanmi pusharca. Chaipimi paicunaca Jesús ñapash punchapamba tucujta muscuipishna ricurca. Jesuspa ñavipash, indishna punchapambami ricurirca. Paipa churajushca ropapash yura yura michagushnami ricurirca. Chaipimi Moisespash, Eliaspash, Jesushuan parlanajurca. Paicunaca Jesús huañunata, huañushpapash cutin causarinatami parlanajurca (Luc. 9:29-32). Jipamanga punchapamba fuyu pillushpa, paicunataca ñapash quilpamurca. Chai fuyu ucumandaca, Jehovapa rimaimi uyarirca. Jesús punchapamba ricurishpaca pai Diospa Reinopi mandashpa imatalla rurai ushashcatami ricuchijurca. Chaimi Jesús llaquicunata aguantachun, llaquinaita huañuna cashcatapash aguantachun ayudashcanga. Shinallata chai muscuipishna ricurishcami Jesuspa catijcunatapash ayudarca. Shinami llaquicuna shamujpipash na shaijushpa, tucui shunguhuan Jehovata sirvishpa ñaupaman catichun ayudarca. Apóstol Pedroca 30 huatacuna jipami Jesús punchapamba tucushcata parlarca. Shinami Jesús punchapamba tucushcata yaria causashcata ricuchirca (2 Ped. 1:16-18). w19.03 págs. 9, 10 párrs. 7, 8

Testigocunaca ¿imamandata panda religionmanda gentecunahuanga diferente capanchi? ‘Na llullashpa parlaimanda’ (Zac. 8:16, 17). Shinaca Diospa mandashcacunata ñucanchi shungupi charishpaca cabaltami parlapashun. Chaimi trabajopi, na rijsishca gentecunahuan, amigocunahuan, ñucanchi familiacunahuanbash cabalta parlangapaj esforzaripanchi. Joven cashpaca quiquinba cumbacuna canda alicachichunmi munangui. Shinapash huaquingunaca cumbacunahuan ali amigo cangapaj munaimandallami paicunashna nalicunata pacalla rurai callarin. Chaimi tandanajuipi cashpa, paipa familiahuan cashpapash shuj ali Testigo shina portarin. Cutin na Testigo cumbacunahuan cashpa, Internetpi cumbacunahuan escribirishpaca diferentepachami can. Chaita rurashpa causaj jovengunaca paicunapa taitamamaman, huauquipanicunaman, Taita Diosmanbashmi llullashpa causan (Sal. 26:4, 5). Nalicunata pacalla rurashpa causajcunaca shimihuanllami ninanda alicachinajun. Ashtahuangarin paicunapa shunguca Jehová Diosmandaca carupimi can. Chaitaca Jehová Diosca alimi yachan (Mar. 7:6). Ashtahuanbash Bibliapica ninmi: “Juchasapacunata ricushpaca, ama ñucapash chashna cashcaiman yanguichu. Ashtahuangarin tucui cambaj causaipi, Mandaj Diostalla manllashpa causangui” nishpa (Prov. 23:17). Shinaca chai mandashcatami pactachina capangui. w18.10 pág. 7 párrs. 14, 15

Mundo enteropimi Jehovata sirvijcunaca shuj jatun familiashna juyarishpa causan (1 Juan 4:21). Casi siempremi ñucanchi huauquipanicunaca paicunapa munaita saquishpa shuj huauquipanicunata ayudan. Huaquinbica huauquipanicunamanda imagutapash rurashpa, aliguman parlashpami ayudan. Ashtahuanbash “Taita Dios juyashca huahuacuna cashpami, paishnallapacha” cangapaj esforzarinchi. Chaimi shuj huauquipanicunata llaquishpa juyaihuan tratapanchi (Efes. 5:1). Jehová Dios imashina cajtaca Jesusca alipachami ricuchirca. Jesusca siempremi tucui gentecunata juyaihuan tratarca. Chaimi cashna nirca: “Imatapash rurashpa shaijushcashna, aparishcashna causajcuna, ñucapajman tucuilla shamuichi”. “Ñucami cangunataca samachisha”. “Ñucallami, na ñapash fiñarij, jariyanata na yarij shunguta charini” nishpa (Mat. 11:28, 29). Ñucanchicunapash Jesushna shujcunata llaquishpa juyaihuan tratashpaca Jehová Diostami cushichishun. Shina rurashpaca ñucanchipashmi ninanda cushijushun (Sal. 41:1). Shinaca congregacionbi, familiapi, villachinapi gentecunata llaquishpa juyaihuan tratangapaj esforzaripashunchi. w18.09 pág. 27 párrs. 1, 2

Terremotocuna, acapanacuna llaquichishca jipami huauquipanicunapa huasicuna huagli quedajpi, arreglashpa, limpiashpa ayudai ushapanchi. Shinallata culquiguhuan, ima minishtirishcahuanmi ayudai ushapanchi. Shinami Jehová Diosta sirvinajushcata ricuchishun (Juan 13:34, 35; Hech. 11:27-30). Shuj ejemplota ricupashunchi. Gabriela paniguca Polonia llactapimi causan. Ushashcata tamiajpimi paipa huasiguca nimapa na sirvi quedarca. Shinapash Gabriela paniguca ¿imamandata na yapata llaquirirca? Shuj congregaciongunamanda huauquipanicuna paita ayudangapaj shamujta ricushpami ninanda cushijurca. Paica ninmi: “Cosascunata ñana charishpapash na yapata llaquirinichu. Ashtahuanbachaca Jehovapa organizacionbi cashcamandami ninanda cushijuni. Jehová Diosta sirvinaca shuj jatun bendicionmi can” nishpa. Jatun llaquita apashca huauquipanicunaca ninmi, huauquipanicuna ayudajta ricushpaca ninandami cushijunchi nishpa. Shinallata llaquicunapi ayudaj huauquipanicunaca Jehovata ayudajuimandami cushilla sintirin (Hech. 20:35; 2 Cor. 9:6, 7). w18.08 pág. 24 párr. 12

Ñucanchi shunguta cuidangapaca ima ali cajta, ima nali cajtaca alimi yachana capanchi. Shinami imata ruranata ali yachashun. Cai punllapa textopica rey Salomonba tiempopi tucui tuta cuidajcunamandami parlajun. Paicunaca pueblopa pirca jahuapimi tuta entero cuidashpa pacarin carca. Chai cuidajcunami imapash peligro tiajpica caparishpa villan carca. Chai cuidaj runacunamandaca ¿imatata yachajupanchi? Diablo ñucanchi pensamientocunata ama pandachichun imata rurana cashcatami yachajupanchi. Punda tiempopica, tucui tuta cuidajcunaca pueblopa pungucunata cuidaj runacunahuanmi ayudarin carca (2 Sam. 18:24-26). Pueblota atacangapaj shamujpimi chai runacunaca ayudarishpa pungucunataca vichan carca (Neh. 7:1-3). Bibliahuan yachachishcashna ali concienciaca chai cuidajcunashnami can. Ñucanchi concienciaca Diablo ñucanchi shunguta ama pandachichunmi ayudan. Diabloca ñucanchi pensamientocunata, ñucanchi imashina sintirinata, ñucanchi munaicunata, ima munaihuan imatapash ruranatami huaglichingapaj munan. Shinaca imapash ruraicuna nali cajta ñucanchi cuenta japishpaca ñapashmi caruyana capanchi. Punguta vichaj cuendami ñucanchi shunguta Diablo ama pandachichun cuidana capanchi. w19.01 pág. 17 párrs. 10, 11

Anciano huauquicunaca paicunapa yuyaicunatara catinapa randica, Biblia mandashcashnami jovengunataca ali tratana can (2 Tim. 3:16, 17). Anciano huauquicuna gentecunapa yuyaicunata catishpaca jovengunata siervo ministerial o anciano cachunga na saquinmanllu. Shuj llactapica shuj siervo ministerial huauquica congregacionbi huaquin responsabilidadcunatami ali pactachijurca. Chai huauqui anciano tucungapaj Bibliapa mandashcacunata pactachijushcatami anciano huauquicunaca cuenta japirca. Shinapash huaquin mayorlla ancianocunaca chai huauqui joven cajpimi anciano cachunga na saquirca. Shuj llactacunapipashmi ashtaca anciano huauquicunaca shinallata pensan. Shinaca ñucanchi yuyaicunata catinapa randica Bibliapa mandashcacunatami pactachina capanchi. Shina rurashpaca Jesusta cazushpami tucuicunata igual tratashun (Juan 7:24). w18.08 pág. 14 párrs. 16, 17

Uyai na uyai imatapash shujcunaman villana o mensajeta cachanaca na alichu can. Ashtaca llactacunapimi gobiernocunaca ñucanchi huauquipanicuna villachichun, tandanajuchunbash na saquin. Chai llactacunapica Jehovata sirvijcuna paicunapura culirachunmi imapash llullacunata nishca. Cunanga huaquin huatacuna huashaman Unión Soviética nishcapi ima pasashcata ricupashunchi. Chai punllacunapi KGB nishca policiacunami llullacunata nishpa ashtaca huauquipanicunata yangata juchachirca. Chai nishcacunataca ashtaca huauquipanicunami crirca. Chaimi huaquingunacarin Jehovata sirvinatapash saquirca (1 Tim. 1:19). Shinaca ñucanchicunatapash ama shina pasachunga, imatapash uyashcandica na cachana, na parlanachu capanchi. Chaipa randica imapash cierto o na cierto cashcatarami ricuna capanchi. Shinallata shujcuna nishcata na tucui tucuitaca crinachu capanchi. w18.08 pág. 5 párr. 8

Griego shimipi punda tiempopi escribishcacunapica huaquingunapillami ishcai punto, coma, punto nishcacuna ricurin. Chaimi huaquingunaca nin, Jesusca cashnami nishcanga: “Na llullashpami, candaca cashna nini: Cunanllatami, paraíso juyailla llactagupi ñucahuan cangui” nishpa. Cutin shujcuna ninmi, Jesusca cashnami nishcanga “cunanllatami, na llullashpa candaca cashna nini: Paraíso juyailla llactagupimi ñucahuan cangui” nishpa. Lucas 23:43​pi shimicunata nara nishpallata Jesús imata nishcata ricupashunchi. Jesusca paipa catijcunamanga nircami: Runa Aichayu tucushca ñucapash, quimsa punlla, quimsa tutata, alpa ucupi pambashca casha” nishpa (Mat. 12:40; 16:21; 17:22, 23; Mar. 10:34; Hech. 10:39, 40). Shinaca Jesuspash, nalita ruraj runapash huañui na huañuica na paraisoman rircachu. Chaipa randica Jesusca quimsa punllacunatami huañushcacunata pambana pushtupi o “Hades” nishcapi carca. Chai jipami Jehová Diosca Jesusta causachirca (Hech. 2:31, 32). Nalita ruraj runaca jahua cielopi causangapaj agllashca runaca na carcachu. Chai runaca tucui shunguhuan sirvij apostolcunahuan Jesús shuj pactota rurashcataca na yacharcachu. Jesushuan chai pactota rurashca apostolcunallami paihuan mandangapaj jahua cieloman ri usharca (Luc. 22:29). Shinallata chai nalita ruraj runaca na bautizarishca carcachu (Juan 3:3-6, 12). Shinaca, cai Alpa shuj paraíso tucujpi chaipi causana cashcatami Jesusca chai runamanga nijurca. w18.12 págs. 6, 7 párrs. 17, 18; pág. 8 párrs. 20, 21

Israelitacunaca orohuan rurashca shicutami adoranajurca. Shina rurashpa Jehovapa mandashcata na pactachinajushcataca israelitacunaca alimi yacharca. Shinapash paicunaca chai orohuan rurashca shicupa ñaupajpi cungurishpapash Jehovatallatami sirvinajunchi nishpami pensashcanga. Shina pandata pensaimandami Aaronga cashna nirca, ‘Mandaj Diospa jatun fiestami can’ nishpa. Chaimi Jehová Diosca Moisesmanga nirca, israelitacunaca “ali causachun ñuca mandashca ñanmandaca, ñapashmi anchurinajushca” nishpa. Jehová Diosca ninanda culirashpami israelitacunata llaquichingapaj munarca (Éx. 32:5-10). Shinallata Jehová Diosca llaquishpa perdonaj Dios caimandami israelitacunataca na llaquichirca (Éx. 32:14). Aaronga chai shicuta rurashca cashpapash arripintirishpami levitacunahuan tandanajurca. Shina rurashpami Aaronbash, Moisespash, levitacunapash Jehovatalla sirvinajushcata ricuchirca. Chai punllapillatami chai yanga diosta adoraimanda ashtaca ashtaca israelitacuna huañurca. Cutin Jehovatalla sirvijcunaca Jehová Diospa bendiciondami chasquirca (Éx. 32:26-29). w18.07 págs. 18, 19 párrs. 13-16.

Gentecunapa ñaupajpi rijsishca canamanda, ashtahuan estudianamanda, negociocunata charinamandaca Jehovapa ñaupajpi ali ricurinami ashtahuan ali can. Apóstol Pabloca Diospa ñaupajpi ali ricurinamanda parlashpaca cashnami nirca: “Ashtahuangarin cunanga, Taita Diosta rijsinguichimi. Taita Diospash, cangunataca rijsinmi. Shina rijsishpapash ¿imashpata ushaita na charij, chai imapajpash na servij, cutin cutin yachachishcata catishpa, cutinllata gañanshna causangapaj munanguichi?” nishpa (Gál. 4:9). Tucuita Ruraj Jehová Diosca paita rijsichun, paipa amigo cachunmi munan. Chaica shuj alipacha bendicionmi can. Jehová Diosca ñucanchita juyaimandami paita rijsina munaihuan rurashca (Ecl. 12:13, 14). w18.07 pág. 4 párrs. 3, 4

Diospa leycunata alicachingapaj, respetangapami esforzarina capanchi (Amós 5:15). Chaipaca Jehová Dios ricushcashna ricungapami esforzarina capanchi. Caipi pensaripashunchi, na puñui ushajushpa doctorpaman rishcanguiman. Doctorca micunapi cuidarichun, ejerciciota rurachun, causaipi huaquin ruraicunata cambiachun nishcanman. Doctorta cazushpa ali sintirishpaca ¿nachu doctorta agradicinguiman? Shinallatami ñucanchicuna ali causachun, juchacunapi ama urmachunga ñucanchita Ruraj Taita Diosca leycunata cushca. Por ejemplo, llullana, umachina, shuhuana, shuj jarihuan o shuj huarmihuan juchapi urmana, shujcunata llaquichina, ayacunapa ruraicunapi chapurina nali cashcatami Bibliapica yachachin. Chaicunata cazunaca ñucanchipallatami ali can (Prov. 6:16-19; Apoc. 21:8). Jehovata cazuna ñucanchipallata ali cashcata cuenta japishpaca Jehovatapash, paipa leycunatapashmi alicachishun. w18.06 pág. 16 párrs. 5, 6

Roma llactata mandajushpaca Pilato gobernadorca Jesusta catishpa gentecuna paipa contra tucunatami manllajushcanga. Jesusca nircami: ‘Ñuca mandanaca na cai pachamandachu’ can nishpa (Juan 18:36). Jesusca politicapica na chapurircachu. Paica jahua cielomandami mandagrijurca. Ashtahuanbash ‘na llullashpa villangapaj’ cai alpaman shamushcatami Jesusca intindichirca (Juan 18:37). Jesusca cai alpapi imata rurana cashcataca alimi yacharca. Shinallata ñucanchipash imata rurana cashcata ali yachashpaca politicapica na chapurishunllu. Politicapi chapurinataca pensaitallapash na pensashunllu. Chaita pactachinaca huaquinbica shinllimi ricurin. Shuj superintendente huauquica ninmi: “Gentecunaca shuj shuj panda yuyaicunatami charin. Paicunapa llacta ashtahuan ali cashcatami pensarin. Paicunaca ninmi, gobiernocuna ñana mandajpimi ali causai ushashun nishpa. Shinapash Diospa Reinomanda ali villaicunata villachinami huauquipanicuna shujllashna tandanajushca cachun ayudashca. Huauquipanicunaca llaquicunata, problemacunatapash Taita Dios tucuchinatami crin” nishpa. w18.06 págs. 5, 6 párrs. 6, 7

Satanás shimica “contra” ningapami munan. Cai shimica Escrituras Hebreasmanda librocunapica 1 Crónicas, Job, Zacarías librocunapillami ricurin. Mesías cai alpaman nara shamushca punllacunapica ¿imamandata Jehová Diosca huaquin cosascunatalla chai nali angelmandaca parlarca? Jehová Diosca Escrituras Hebreaspica Satanasmanda, pai imatalla rurashcamandaca huaquin cosascunatallami parlarca. Chaipa randica gentecuna Mesiasta rijsishpa, paita catichunmi Escrituras Hebreastaca escribichirca (Luc. 24:44; Gál. 3:24). Mesías cai alpaman shamujpica Jehová Diosca Mesiasta, paipa catijcunatapash utilizashpami Satanás, paipa demoniocunapash imashina cashcata villarca. Chaimandami cunanbipash Satanás, paipa demoniocunapash imashina cashcata yachanchi. Jehová Diosca Jesusta, ungidocunata utilizashpami Satanastapash, paipa demoniocunatapash tucuchigrin (Rom. 16:20; Apoc. 17:14; 20:10). Satanasca tucui podertaca na charinllu. Satanaspa trampacunata mishachunga Jehovapash, Jesuspash, ali angelcunapashmi ñucanchitaca ayudanga. w18.05 págs. 15, 16 párrs. 2-4

Jehovata sirvijcuna cashcata ricuchingapaca granota fucuchinshnami causana capanchi (Mat. 13:23; 21:43). Juan 15:1-5​pi granota fucuchinshna causana nishpaca ¿gentecunata Jesuspa discipulocuna tucuchun ayudanamandachu parlajun? Na, na chaimanda parlajunllu (Mat. 28:19). Gentecuna na uyangapaj munaj llactacunapimi ashtaca huauquipanicunaca tucui shunguhuan villachinajun. Jesuspa discipulocuna tucuchun nipita na ayudashpaca, chai huauquipanicunaca na fucuchij malquishnami canman. Shinapash pensaripashunchi, Taita Diosmanda ali villaicunata chasquichunga nipita na obligai ushanchichu. Ashtahuanbash Jehová Diosca ñucanchita juyaimandami ñucanchicuna pactachi ushanagutalla mañan (Deut. 30:11-14). Shinaca granota fucuchinshna causanaca ¿imata can? Chaitaca tucuicunallatami pactachi ushapanchi. Jehová Diosca paita sirvijcunamanga paipa Reinomanda gentecunaman villachichunmi mandashca (Mat. 24:14). w18.05 pág. 5 párrs. 8, 9

Cunanbica panda religiongunata ñaupaman pushajcunataca pastorcuna, curacuna, rabino nishpapashmi paicunataca rijsin. Paicunaca, fariseocuna cuendami Diospa Shimimanda cabalta yachachinapa randica “llullatara” yachachin (Rom. 1:18, 25). Panda religiongunaca yachachinmi jaricuna huarmihuanshna puñuna, jaripura o huarmipurallata cazaranapash Diospa ñaupajpica alimi can nishpa. Shinallata na huañuj almatami charinchi, infiernopash tian nishpami yachachin. Gobiernocunapashmi llullacunata nishpa gentecunata umachishca. Paicunaca llullashpami ñalla cashna ninga “casilla aliguta, imatapash na manllashpami causanajunchi” nishpa. Paicunaca cai nali mundopi causai ali cashcatashna crichingapami gentecunamanga munan. Shina ninajushpapash paicunaca ‘ñapashmi’ tucuchi tucunga. Gobiernocunapa llullacunataca ñucanchica nimamanda na crinachu capanchi. Shinallata tuta shuhua shamunshna, [“Jehovapa punlla”, NM ] chayamunataca alimi yachapanchi (1 Tes. 5:1-4). w18.10 págs. 4, 5 párrs. 6-8

Llaqui punllacunapi causanajuimandami huaquinbica llaquilla, desanimarishca sintirinchi. Jesusca ‘mandajcunata’ o anciano huauquicunata utilizashpami tucuilla huauquipanicunata animajun. Huaquin ancianocunaca ungidocuna o shuj llamagucunamanda huauquicunami can. Shinapash huauquipanicunataca ancianocunaca ‘cashna, chashna crishpami catina canguichi nishpaca na mandajunllu’. Chaipa randica huauquipanicuna ‘cushilla causachunmi ayudan’. Shinaca ancianocunaca huauquipanicuna cushilla, tucui shunguhuan Jehovata sirvichunmi ayudanajun (Is. 32:1, 2; 2 Cor. 1:24). Ancianocunaca apóstol Pablopa ejemplotami catina can. Paica Tesalónica llactapi catiriashpa llaquichi tucushca huauquipanicunamanmi cashna escribirca: “Ñucanchica, cangunataca ninanda juyashpami, Taita Diosmanda ali villaita villarcanchi. Cangunamandaca, huañuitapash huañushunlla yashpami, na saquishpa villarcanchi. Cangunaca, ninanda juyai tucushcami canguichi” nishpa (1 Tes. 2:8). Imagutapash nishpa animana ali cajpipash, apóstol Pablo nishcashnaca ruraicunahuanmi animana ashtahuan ali can. Éfeso llactamanda anciano huauquicunamanga apóstol Pabloca cai punllapa textopi shimicunatami nirca. w18.04 págs. 22, 23 párrs. 6-8

Libre causaita Jehová Dios cuchunga paihuanmi ali amigocuna tucuna capanchi (2 Cor. 3:16). Shinapash israelitacunaca paicunapa yuyaita, shunguta shuj telahuan quilpashcashnami carca. Chaimi Jehová Dios shina yuyanapa randica Jehovata na rijsi gentecunashna yuyai callarica. Paicunaca paicunapa munaita rurashpa causangapami libre causaita charingapaj munarca (Heb. 3:8-10). Jehovapa espíritu cushca libre causaica nimahuan na igualanllu. Jehovallami juchamanda, huañuimanda quishpichita ushan. Shinallata panda religionda, chai religionba costumbrecunata saquichunbashmi ayudan. Shina libre causaitaca nipipash na cui ushanllu (Rom. 6:23; 8:2). Chai libre causaica aligupachami can. Esclavo cashpa o carcelpi cashpapashmi libre sintiri ushan (Gén. 39:20-23). w18.04 pág. 10 párrs. 3-5