Abril

Jesús ñucanchita juyashcataca ñucanchimanda huañungapaj dispuesto cashpami ricuchirca (Juan 15:13). Jehová Diospash, Jesuspash caicunata rurashcamandaca ñucanchicunaca nuncapash na pagaitaca usharingachu. Shinapash aliguta causashpami paicunata agradicishcata ricuchita ushapanchi (Col. 3:15). Ungido huauquipanicunaca Jesús huañushcamandami, Jesuspi crishpaca jahua cielopi causana esperanzata chasqui ushan (Mat. 20:28). Shinallata Jesusmandami Jehová Diospa ñaupajpi ali ricurishpa paipa propio churicunashna tucun (Rom. 5:1; 8:15-17, 23). Cutin cai Alpapi causana esperanzata charijcunaca Jesús huañushcamandami paipi crishpaca, Diospa ñaupajpi ali ricurishpa “ninan manllanai llaquimanda” quishpirita ushanga. Chaimandami paicunapash ninanda agradicishca can (Apoc. 7:13-15). Shinaca ishcandi grupo gentecunaca Jesús Huañushcata Yarina Tandanajuiman rishpami, Jesús huañushcamanda ninanda agradicishcata ricuchin. w22.01 pág. 23 párrs. 14-15

Jesustaca “Taita Diosta, paipa shutitapash na respetashcanguichu” nishpami, llullacunata nishpa yangamanda juchachishpa huañuchirca (Mat. 26:64-66). Jesusca yangamanda juchachi tucushpa huañugrijushcamandami ashtahuanbachaca llaquilla, nali sintirijurca. Chaimandami ama shina huañungapaj Jehová Dios ayudachun munarca (Mat. 26:38, 39, 42). Jesusca judío gentecunata quishpichingapami shuj caspipi huañuna carca (Gál. 3:10). Judiocunaca “Jehová Diospa mandashcacunata pactachishun” nishpapash na pactachishcarcachu. Chai jahuapash Adán y Evapa culpamandami juchayujcuna carca. Chaicunamanda quishpichingapami Jesusca huañuna carca (Rom. 5:12). Diospa Leypica pipash shuj jatun juchata rurashpaca huañunapachami carca. Chaimi huaquinbica shuj jatun juchata ruradorcunataca huañuchishpa shuj caspipi huarcun carca (Deut. 21:22, 23; 27:26). Shinaca Jesús huañushpa shuj caspipi huarcui tucujpimi, judío gentecunaca quishpiri ushana carca. w21.04 pág. 16 párrs. 5-6

Jesús cai Alpapi cashpa ima llaquicunatalla charishcapi pensaripashunchi. Romano soldadocunaca paita japishpami ninanda macashpa llaquichirca (Mat. 26:52-54; Juan 18:3; 19:1). Jesustaca aicha carata liquij shuj azialhuan ninanda macashpami shuj jatun racu caspita apachishpa paita huañuchina pushtucaman pusharca. Shinapash jipamanga, soldadocunaca shuj runatami chai racu caspita aparishpa ayudachun obligarca (Mat. 27:32). Jesusta huañuchina pushtuman ña chayashpaca chai caspipillatami Jesuspa chaquita, maquitapash clavarca. Shina clavashcata huarcujpimi cuerpopa pesohuanga chai clavashca pushtucunataca ashtahuan nanachirca. Caita ricushpa Jesuspa mama, paipa amigocunapash ninanda huacanajujpica judiocunata ñaupaman pushajcunaca Jesusmandaca ninandami burlarinajurca (Luc. 23:32-38; Juan 19:25). Ashtaca horascunatami Jesusca chashna sufrijurca. Chaimandami ña shaijushca respiraitapash ñana ushajurca. Jehovapa munaitaca Jesusca huañungacamanmi pactachirca. Chaimandami Jesusca, Jehová Diosta mañashca jipaca huañurca (Mar. 15:37; Luc. 23:46; Juan 10:18; 19:30). Imashinami ricupanchi, Jesusca llaquinaita sufrishpami huañurca. w21.04 pág. 16 párr. 4

Jesusca paipa 11 ali apostolcunamanga ishcai pactocunamandami parlarca. Jesusca mushuj pactomanda y pacto del Reino nishcamandami parlarca (Luc. 22:20, 28-30). Cai ishcai pactocuna tiashcamandami apostolcunapash y shuj huauquipanicunapash jahua cielopi reycuna, sacerdotecuna shina tucushpa Jesushuan mandana oportunidadta chasquigrinajurca (Apoc. 5:10; 14:1). Shinaca cai Alpapi puchushca ungidocunalla cai ishcai pactocunapi beneficiarinajuimandami, Jesús Huañushcata Yarina Tandanajuipica tandata micuita, vinotapash ufiaita ushan. Jehová Diosca ungidocunataca jahua cielopi na huañushpa causana cuerpohuan causachunmi agllashca. Shinallata paicunaca jahua cieloman rishpaca Jesushuan mandana oportunidadta, Jehová Diospa ñaupajpi cana bendiciondapashmi charinga (1 Cor. 15:51-53; 1 Juan 3:2). Ungidocunaca huañungacaman Jehová Diosta na saquishpa sirvina cashcataca alimi yachan (2 Tim. 4:7, 8). w22.01 pág. 21 párrs. 4-5

Jesustaca ishcai nalita rurajcunapa chaupipimi clavarca (Luc. 23:40, 41). Shujca Jesushuan parlashpaca cashnami nirca: “Quiquin ña rey shina mandajushpaca ñucata yarihuangui” nishpa (Luc. 23:42). Jesusca, Jehová Dios ninanda llaquij cashcata yachaimandami, pai parlashca shimicunahuan shuj esperanzata charichun chai runataca ayudarca (Sal. 103:8; Heb. 1:3). Jehová Diosca juyaj, llaquij Dios caimandami ñucanchicuna Jesús ñucanchimanda huañushcapi crijpica, ima pandacunatapash rurashcataca perdonangapaj munan (1 Juan 1:7). Huaquinbica: “Jehová Diosca ñucata na perdonahuangachu” nishpami pensarinchi. Shinapash cashna pensajushpaca, caita yaripai: Nalita ruraj runaca chairami Jesuspica cri callarijurca. Shinapashmi Jesusca chai shuhua runataca llaquishpa, juyaihuan tratarca. Shinaca ñucanchicuna Jehová Diosta sirvingapaj ashtahuan esforzarijujpicarin, ñucanchitaca ashtahuan juyaihuan, llaquishpami tratanga (Sal. 51:1; 1 Juan 2:1, 2). w21.04 pág. 9 párrs. 5-6

Jesús, Jehová Diosta huañungacaman cazushpaca ¿imatata ricuchirca? ¿Ima bendiciongunata ñucanchicuna chasquichunda ayudarca? Primero, Satanaspa nishcacuna llulla cashcata, shinallata Satanás ima jarcaicunata churajpipash Jehová Diosta huañungacaman sirvi ushashcatami Jesusca ricuchirca. Segundo, Jesusca paipa causaiguta cushpaca gentecuna Jehová Dioshuan ali amigo tucuchun, shinallata jipa punllacunapipash para siempre causana bendicionda chasqui ushachunmi ayudarca. Tercero, Jesusca, Jehová Dioslla mandana derechota charishcatami ricuchirca. Shinallata Jehová Diospa shutigupash alicachishca o santificado cachunbashmi ayudarca. Shinaca cada punllami Jehová Diostaca último punllata sirvijunshna sirvina capanchi. Shinami huañuna tucuna cashpapash Jehová Diostaca, “canda sirvingapaca tucui usharishcagutami rurapashcani. Satanás llullaj cashcata ricuchingapapashmi esforzaripashcani. Canba shutiguta alipi quidachingapaj, canlla mandana derechota charishcatapash ricuchingapami esforzaripashcani” ni ushapashun. w21.04 pág. 12 párrs. 13-14

Jesustaca contracunaca yangamanda juchachishpami Jesusmanda burlarishpa, llaquinaita maltratashpa, macashpa shuj caspipi clavangapaj apan. Jesusca maquipipash, chaquipipash clavai tucushca cashcamandami samaitapash na aisai ushashpa ninanda sufrijun. Shina cashpapashmi Jesusca nara huañushpallata huaquin minishtirishca shimicunata nina can. Chai shimicunamandaca ashtacatami yachajui ushapanchi. Jesuspa shimicunaca shujcunata perdonana cashcata, Jehová Dios ñucanchita perdonanapi confiana cashcatapashmi yachachin. Ñucanchicunaca tauca huauquipanicunapa ayudatami charinchi. Pero ayudata minishtishpaca ñucanchirami ayudata mañana canchi. Ima llaquita charijpipash Jehová Dios ayudanataca seguromi capanchi. Cada punllami Jehová Diostaca último punllata sirvijunshna sirvina capanchi. Shinallata huañujpipash Jehová Dios ñucanchita causachinataca seguromi capanchi. w21.04 pág. 8 párr. 1; pág. 13 párr. 17

Jesuspa chaquita catishpami na huañushpa causaiguta chari ushashun. Shuj charij charij joven Jesusta: ‘Na huañushpa causaiguta charingapaca ¿imatata rurana cani?’ nishpa tapujpica, Jesusca: “Ñucata catingapaj shamunallami cangui” nircami (Mat. 19:16-21). Jesusca pai Taita Diospa agllashca cashcata na crij judiocunamanbashmi: “Ñuca llamagucunaca [. . .] ñucataca catihuanmi. Ñucami paicunamanga para siempre causaita cusha” nirca (Juan 10:24-29). Jesuspi crishcataca paipa yachachishcacunata causaipi pactachishpami ricuchita ushapanchi. Shinami causaita causagrina bendicionda chasquipashun (Mat. 7:14). Jesuspa chaquita ali catingapaca Jesustarami ali rijsina capanchi. Jesusta rijsingapaca siempremi paimanda ashtahuan yachajushpa catijuna capanchi. Jesusmandaca pai imashina cajta, imata yuyajta, imata mandajtami yachajuna capanchi. Asha tiempota o ashtaca tiempota Testigo cashpapash tucuicunallatami Jehová Diosta, Jesustapash ‘rijsingapaj’ esforzarina capanchi. w21.04 pág. 4 párrs. 9-10

Apóstol Pabloca Jesusta nara catij tucushpa nali cosascunata rurashcamandami huaquinbica llaquiyan cashcanga. Chaimi tucuimandaca “ñucami ashtahuan pecador capani” nirca (1 Tim. 1:15). Jesusmanda nara yachaj chayashpaca Jesusta catijcunata catiriashpa, prezomi churarca. Cutin shujcunatapash huañuchichunmi paica apoyarca (Hech. 26:10, 11). Caipi pensaripashun: Pablo pundapi shuj cusahuarmita huañuchichun apoyashcapa shuj churita rijsishpaca ¿imashinashi sintirishcanga? Pabloca, pundacunapi nali cosascunata rurashcamandaca llaquiyarcami. Shinapash ñana imatapash rurai ushashcataca alimi intindirca. Chaimandami Jesús paimanda huañushcata seguro cashpa cashna nirca: “Taita Dios ñucata ninanda juyashcamandami apóstol capani” nishpa (1 Cor. 15:3, 10). ¿Imatata yachajupanchi? Ñucanchipashmi Jesús ñucanchimanda huañushcata, pai huañushcamanda ñucanchicuna Jehová Dioshuan ali amigocuna tucuita ushashcatapash crina capanchi (Hech. 3:19). Jehová Diosca cunan punllacunapi o jipa punllacunapi ñucanchicuna imata rurajtami ricujun. Pundacunapi nalicunata rurashpa pandarishcacunataca na ricujunllu (Is. 1:18). w21.04 pág. 23 párr. 11

Ashtaca judío gentecunaca Mesías huañunataca na shuyanajurcachu. Shinapash Bibliapica ñami caita nijurca: “Paica, huañuchi tucungacamanmi llaquichi tucunga. Paica, ashtacacunapaj juchata apashpa, na cazujcunamandapash Diosta mañashpami” juchayucunamandaca huañunga nishpa (Is. 53:12). Shinaca Jesús shuj shuhuashna o shuj juchayuj genteshna huañushcamandaca judío gentecunaca, “Jesusca na Mesiaschu can” nitaca na usharcachu. Ama pandachi tucuchunga ima pasashcacunatami ali ali yachana capanchi. Mateo capítulo 5​manda, 7​caman parlashca shimicunapica Jesusca paipa catijcunamandaca ‘llullashpa nalicunatami’ rimanga nircami (Mat. 5:11). Cai llullacunaca Satanasmandami shamun. Paica ñucanchipa contracuna ñucanchimanda llullacunata nishpa parlachunmi imacunatapash rurajun (Apoc. 12:9, 10). Cashna llullacunataca na crinachu capanchi. Chaipa randica Jehovapi tucui shunguhuan cringapami esforzarina capanchi. w21.05 pág. 11 párr. 14; pág. 12 párr. 16

Bibliamanda yachajujcunata Jehová Diospi confiachun ayudapangui. Jesusca paipa discipulocunataca, Jehová Diosca quiquingunata juyaimandaca ayudangallami nircami (Mat. 10:19, 20, 29, 30). Bibliamanda yachajujtaca paitapash Jehová Dios ayudanatami yarichina capangui. Jehová Diospi confiachunga paihuan Jehovata mañajushpaca paipa metacunamandapashmi mañaita ushapangui. Polonia llactamanda Franciszek shuti huauquica ninmi: “Ñucata yachachij huauquica Jehovata mañajushpaca, Jehová Diosta ñuca sirvingapaj munaimanda ima metacunatalla charishcamandami parlan carca. Jehová Dios imashina paipa mañaicunata contestajta ricushpaca ñucapashmi shinallata mañai callarircani. Shina mañashpaca Jehová Dios ñucata ninanda ayudajtami cuenta japircani. Por ejemplo, ñuca mushuj trabajopica reuniongunaman, asambleacunamanbash ringapami huaquin día librecunata mañarcani. Chaipimi Jehová Dios ñucata imashina ayudajta cuenta japircani” nin. Shinapash cunan rato pimanbash Bibliamanda na yachachijushpaca, Bibliamanda yachajujcunataca ¿imashinata bautizarichunga ayudaita ushapanchi? Ñucanchicunaca shuj huauquipanicunatami paicunapa estudiogucunaman cumbaita ushapanchi. Chaita rurashpapashmi Bibliamanda yachajujcuna bautizarichunga ayudaita ushapanchi. Jehová Diosca tucui Bibliamanda yachajujcunapimi preocuparin. Jehová Diosca ñucanchicuna Bibliamanda yachajujcunata ima modospash ayudangapaj esforzarijpica ninandami cushijun (Is. 52:7). w21.06 pág. 7 párrs. 17-18

Bibliata charishcamanda agradecido cashcata ricuchingapaca Bibliatami siempre liina capanchi. Estudio personaltaca, “ima hora pactashpami rurasha” nishpapash na pensanachu capanchi. Estudio personalta rurangapaj shuj horarioguta charishpami, Jehová Diospica tucui shunguhuan crishpa catipashun. Cai mundopi “alipacha yachajushca” o estudiashca gentecunahuan ricujpica, ñucanchicunaca Bibliata yachajushpa pruebacunata charishcamandami Jehovapica cripanchi (Mat. 11:25, 26). Bibliata yachajushcamandami cai mundopi imamanda ashtahuan llaquicuna mirashpa catijujtaca yachapanchi. Shinallata Jehová Dios cai tucui cosascunahuan imata ruragrijujtapashmi yachapanchi. Shinaca, tucui shunguhuan Jehovapi crishpa catingapaj, shinallata shuj gentecunapash Jehová Dios tiajta yachachun ayudapashunchi (1 Tim. 2:3, 4). Shinaca cai Alpa shuj paraíso tucujpi, chaipi causaj gentecuna Jehová Diosta alabashpa, Apocalipsis 4:11​pi shimicunata nichun cushijushpa shuyapashunchi. Chaipica, “Ninan poderta charij ñucanchi Jehová Dioslla, quiquinmi jatunyachi tucuna derechota [. . .] charipangui. Porque quiquinmi tucuita rurapashcangui” ninmi. w21.08 pág. 19 párrs. 18-20

Congregacionda ñaupaman pushanajuj ancianocunaca pipash consejota minishtijpica, consejana responsabilidadtami charin. Paicuna consejocunata cushpaca shujcunata cushichingapaj, animangapami esforzarina can (Prov. 27:9). Anciano huauquicunaca tucui huauquipanicunata juyaimandami shuj huauqui o shuj pani imapash nalita ruragrijujta ricushpaca consejashpa ayudan (Gál. 6:1). Shinapash shuj anciano huauquigu pitapash consejagrijushpaca apóstol Pablopa nishca shimicunatami yarina can. Paica, “juyaita charijcunaca pacienciata charinmi shujcunata llaquinmi [. . .] tucuipimi pacienciata charin, tucuitami crin, tucuitami shuyan, tucuitami aguantan” nircami (1 Cor. 13:4, 7). Cai versocunapi pensarinami shuj anciano huauquigutaca shujcunata juyaihuan, ali consejachun ayudanga. Shina consejajpica seguromi consejota uyador personaca paimanda preocuparishcata ricushpa, consejota chasquingapaj munanga. w22.02 pág. 14 párr. 3; pág. 15 párr. 5

Angelcunata, gentecunatapash Jehová Diosca jucha illajcunatami rurarca. Shinapash Satanasmi Adán y Evataca Jehovapa contra tucuchun llullacunata nishpa umachirca (Satanás nishpaca “Contra” nisha ninmi). Ashtaca angelcuna, shuj gentecunapashmi Jehová Diospa contracuna tucurca (Jud. 6). Chaimandami Jehová Diosca traicionai tucushca sintirirca. Shinapash paipa tucui contracunataca shuj punllaca tucuchingami. Chai punllacamanmi aguantashpa catinga. Paita tucui shunguhuan sirvijcunaca chai punllapica ninandami cushijupashun. Jobtaca Satanasca yangamandami juchachirca. Paica Taita Diosmanga, “Jobca candaca paita cuidajushcamandallami sirvijun” nircami. Shina nishpaca tucui Jehovata sirvijcunatami juchachijurca (Job 1:8-11; 2:3-5). Cunan punllacunacamanmi Diabloca, Jehovata sirvijcunataca shina nishpa juchachijun (Apoc. 12:10). Jehová Diosta juyaimanda sirvishpa, llaquicunata aguantashpami Diablopa nishcacuna llulla cashcata ricuchipanchi. w21.07 pág. 9 párrs. 7-8

Apóstol Pabloca shuj ali ejemplota utilizashpami ñucanchi causaipi cambiocunata rurana importantepacha cashcata ricuchirca. Paica ñucanchipa punda nali causaitaca jatun racu caspipi clavashcashnami saquina canguichi nircami (Rom. 6:6). Jesusca paipa Taitapa ñaupajpi ali ricuringapaca sufrishpa jatun jatun racu caspipi huañuchi tucungapaca dispuestomi carca. Ñucanchicunapash Jesushnallatami Jehová Diospa ñaupajpi ali ricuringapaca pai millanayachishca nali cosascunata saquingapaca dispuesto cana capanchi. Shinami ñucanchi concienciapi ali sintirishpa, cai Alpapi para siempre causana bendiciondapash chasqui ushashun (Juan 17:3; 1 Ped. 3:21). Jehová Diosca ñucanchicuna cushilla sintirichunllaca na paipa mandashcacunataca cambiangachu. Más bien ñucanchicunami, paipa mandashcacunata pactachishpa causangapaj cambiocunata rurana capanchi (Is. 1:17, 18; 55:9). Bautizarishca jipapashmi nali ruraicunapi ama urmangapaca esforzarishpa catina tucupanga. Ñucanchicunapi confianapa randica, Jehová Diosta ayudahuai nishpa, paipa espíritu santopa ayudapi confiapashunchi (Gál. 5:22; Filip. 4:6). Punda causaita saquishpa nali ruraicunapi ama cutinlla urmangapaca ninandami esforzarina capanchi. w22.03 pág. 6 párrs. 15-17

Jehová Diosca paipa Reinotara pundapi churajpi y paipa mandashcacunata respetajpica, imagupash na faltangachu ninmi (Mat. 6:33). Chaimandami, “ñucanchi charishca cosascuna o culquimi cai mundopica cushilla causachun ayudanga” nishpaca na pensanachu capanchi. Ñucanchicunaca Jehová Diosta sirvishpalla tranquilo, cushilla causaiguta chari ushashcatami yachapanchi (Filip. 4:6, 7). Shinallata, ashtaca cosascunata randingapaj culquiguta charishpapash, “¿chai cosascunata randishca jipa cuidangapaj, utilizangapaj tiempoguta charishacha?” nishpami pensarina capanchi. Shinallata tapuripashunchi: “Ñucapa charishca cosascunataca ¿yapatachu valichini?” nishpa. Jehová Diosca paipa familiapica paita ali sirvijcuna cachunmi munan. Chaimandami ñucanchi charishca cosascuna paita ali sirvinata jarcachunga na saquina capanchi. Ñucanchicunaca Jesuspa tiempopi shuj charij charij jarishnaca na cangapaj munapanchichu. Paica Jesusta catij tucuna, Jehová Diosta sirvishpa jipa punllacunaman Jehovapa shuj churi tucuna oportunidadtami chingachirca. Paica paipa charishca culquita, cosascunata Jehová Diostapash yali juyashcamandami chai oportunidadcunata chingachirca (Mar. 10:17-22). w21.08 pág. 6 párr. 17

Bibliata yachajushpaca, Jehová Dios imashinapacha cashcatami ashtahuan rijsipangui. Jehová Dios imashinapacha cashcataca, paipa rurashcacunapipashmi ricui ushapangui. Jehovamanda ashtahuan yachajushpami, Jehová Dios ciertopacha tiashcataca cripangui (Éx. 34:6, 7; Sal. 145:8, 9). Y paipica tucui shunguhuanbash crishpa catipangui. Shinami, paita juyashpa, paipa amigopash tucuita ushapangui. Taita Diospi crishcataca shuj gentecunahuanbash parlapangui. Pimanbash Taita Diosmanda parlajujpica, huaquinbica chai rato na tigrachi ushashca tapuicunatami Taita Diosmandaca tapuita ushan. Shinapash cai tapuicunata chai rato na contestai ushashpaca, Bibliamanda japishca publicaciongunapi ashtahuan informacionda mascashpami chai personahuanga cutin parlaita ushapangui. Shinallata, ashtahuan experienciata charij huauquita o panitami ayudata mañanalla capangui. Investigashca informacionda chai persona crijpi o na crijpipash, quiquin investigashpaca quiquinllatami ashtahuan tucui shungu crishpa catipangui. w21.08 pág. 18 párrs. 14-15

Jehovata pai munashcashna sirvingapaca tucui tucuita saquinaca na minishtirinllu (Ecl. 5:19, 20). Shinapash ñucanchi gushtashca cosascunata na ladoman saquishpa y Jehová Diosta pai munashcashna ashtahuan na sirvishpaca, Jesús parlashca shuj chimbapuraimanda jarishnami capashun. Chai jarica paipilla pensarimandami Taita Diostaca ladoman saquirca (Luc. 12:16-21). Imapash problemacunahuan cashpaca, uchallami Jehovata mañashpa, imata ruranata ali ricushpa decidina capanchi (Prov. 3:21). Jehová Diosca ñucanchicunataca ninandami bendiciashca. Chaimi paita agradicishcata ricuchingapaj, paita alabangapaca imagutapash rurana capanchi (Heb. 13:15). Chaipaca talvez ashtahuanmi villachina capanchi. Shina rurajpimi Jehová Diosca ashtahuan bendicianga. Y ñucanchicunallatapash ñucanchi causaipi cada punlla Jehová Dios ali Dios cashcata ricui ushapashun (Sal. 34:8). Shinami ñucanchipash Jesús nishcashna nipashun: “Ñucata cachamuj Taita Diospa munaita rurana, pai mingashca obrata alipacha pactachinami ñucapaca micunagushna capan” nishpa (Juan 4:34). w21.08 págs. 30-31 párrs. 16-19

Diabloca ñucanchicunapash paishnallata jariyashcacuna tucuchunmi munan. Ñucanchicunapash jariyashcacuna cashpaca Diabloshnallatami huañuchi tucushun. Chaimi apóstol Pabloca jariyanamanda parlashpaca cashna advirtirca: Pipash jariyashpaca ‘Diabloshnallatami juzgai tucunga’ nishpa (1 Tim. 3:6, 7). Shinaca ñucanchicunaca chairalla o tauca huatacunata Jehová Diosta sirvinajushpapashmi jariyashcacuna tucui ushapanchi. Chaimi cuidarina capanchi. Pipash jariyashca cashpaca paipillami pensarin. Satanasca ñucanchicuna problemacunahuan cashpa ñucanchicunapilla pensarichun, Jehová Diospica ama pensarichunmi munan. Por ejemplo, ima horapash ñucanchitaca ¿imatapash na rurajpitachu imamandapash yangamanda culpashca? Chai ratocunaca Jehová Diostara, ñucanchi huauquipanicunatara culpachunmi Satanasca munan. Shinallata Jehová Diospa mandashcacunata ladoman saquishpa, ñucanchi munai imashapash problemacunata arreglachunmi Satanasca munan (Ecl. 7:16, 20). w21.06 pág. 15 párrs. 4-5

Jehová Diosca shuj importante trabajotami profeta Ageomanga mingarca. Jesús cai Alpaman shamuchun 537 huatacuna faltajpimi, tauca judiocunaca Babilonia llactamanda Jerusalenman tigrarca. Chaipica Ageopashmi cashcanga. Paicunaca Jerusalén llactaman chayashcandimi Jehová Diospa templo huasitaca shayachi callarirca (Esd. 3:8, 10). Shinapash jarcaicuna ricurijpimi, judiocunaca desanimarishpa Jehová Diospa templo huasita shayachinataca chaipi saquirca (Esd. 4:4; Ageo 1:1, 2). Chaimandami Jehová Diosca, Jesús cai Alpaman shamuchun 520 huatacuna faltajpi, profeta Ageotaca Diospa templo huasiguta huasichi tucuchichun judiocunata animachun mandarca (Esd. 6:14, 15). Desanimarishca judiocuna Jehová Diospi cutin tucui shunguhuan crichun, shinlli tucuchunmi profeta Ageoca ali villaicunata villarca. Jehová Dios “tucuita Mandaj Dios” cashcata judiocuna uyashpaca tranquilo, alimi sintirishcanga. Jehová Diosca tauca shinlli angelcunatami ñaupaman pushajun. Chaimandami judiocunaca Jehová Dios paicunata ayudanataca tucui shunguhuan confiana carca. w21.09 pág. 15 párrs. 4-5

Cunan punllapica testigo de Jehovacunaca maijan llactamanda cashpapashmi paicunapura juyaita ricuchin. Shuj religiongunashnaca na capanchichu. Ñucanchicunaca shuj shuj llactamanda cashpapash, shuj shuj culturacunata charishpapash tucuicunami shuj familiashna capanchi. Tucuicunahuan juyarishcataca tandanajuicunapi, jatun tandanajuicunapimi ricuita ushapanchi. Cashna tucuicunaman juyaita ricuchishcamandami Jehová munashcashna paita ali adoranajushcata ricuchipashcanchi (Juan 13:34). Bibliapica, “caishuj chaishujmi tucui shunguhuan juyarina capanguichi” nijunmi (1 Ped. 4:8). Tucuicunallata juchayujcuna caimanda imagupipash pandarijpi perdonarishpami chashna juyashcataca ricuchita ushapanchi. Shinallata tucuicunaman imagutapash na mitsashpa carangapaj esforzarishpa, ñucanchi huauquipanicunata huasigupi mingachishpapashmi ricuchita ushapanchi (Col. 3:12-14). Shinaca juyaita ricuchishcamandami Jesusta ali catijcuna cashcataca seguro caita ushapanchi. w21.10 pág. 22 párrs. 13-14

Juchata ruradorta congregacionmanda expulsashpaca, pai nalita rurashcamanda arripintirishpa paipa causaipi cambiai ushachunmi ayudan. Expulsai tucushcacuna congregacionman cutin tigramushpaca, paicunapa causaipi cambiachun ninanda ayudashcatami cuenta japishca. Shinallata expulsai tucushpami paicunaca arripintirishpa cutin Jehová Diospaman tigrai ushashca (Heb. 12:5, 6). Cai ejemplopi yuyapashun: Shuj michij runagu paipa llamagucunamanda shuj llamagu irquilla cajta ricushpaca ¿imatata ruran? Cai michij runaguca cai irquilla llamaguta aliguta jambi ushangapami shuj pushtupi paitalla churan. Shinapash llamagucunaca llamacunapura cangapami munan. Shinapash shuj llamagutalla shuj pushtupi churajpica, talvez huacangami. Shinaca cai michij runaguca ¿cai llamaguta llaquinaita tratashcatachu ricuchijun? Na. Cai michij runaguca tucui llamagucunata juyashcatami ricuchin. Cai irquilla llamaguta chaishuj llamagucunahuan saquijpica, talvez cai llamagupa unguica tucui llamacunapamanmi yalita ushanman. Chaimi chai irquilla llamaguta paigutalla shuj pushtupi churashpaca, chaishuj llamagucunata cuidangapaj munashcata ricuchin. w21.10 pág. 10 párrs. 9-10

Mundo enteropi ninanda juyarij familiapi cashcamandaca ninandami cushijupanchi. Chaimandami ashtaca gentecunapash Jehová Diosta ñucanchihuan adorachun munapanchi. Chaimi Jehovapa shutita, Jehovapa organizaciondapash nalipi ama quidachingapaj siempre esforzaripanchi. Shinallata Taita Diospa ali villaigucunata gentecuna uyashpa Jehovamanda yachajuna munaita charichunmi siempre ali portaringapaj esforzaripanchi. Ñucanchicuna Jehová Diosta cazunajushcamandaca, huaquingunaca ñucanchitaca nalicachishpa ricunga o catiriashpa llaquichitapashmi llaquichinga. Shinapash ñucanchi crishcacunata shujcunaman na manllashpa villachichunga ¿imata ayudanga? Jehová Diospash, Jesuspash ñucanchita ayudanata yarinami ñucanchitaca ayudanga. Jesusca imata ninata na atinajujpica, “chai ratopi imata ninata yachachunga Taita Diosllatami ayudanga. Shinaca na cangunallaca parlanguichichu. Jahua cielopi cangunapa Taita Dios, paipa espíritu santohuan ayudajpimi parlanguichi” nircami (Mat. 10:19, 20). w21.09 pág. 24 párrs. 17-18

Moisesca Jehová Diosmandaca shuj pacajuj Dios cashcatami parlarca (Sal. 90:1). Chaimi ñalla huañugrijushpaca Jehová Diosmandaca, “can pacajunaca, causaita causajuj Taita Diosmi. Causaita causajuj Diospa rigrapash, cai pachacamanmi” nircami (Deut. 33:27). Cai shimicunapica ¿imatata Jehová Diosmanda yachajui ushapanchi? Jehová Dios ñucanchipa shuj pacajuna huasishna o torreshna cashcata seguro cashpaca tranquilomi sintirinchi. Shinapash huaquinbica llaquilla, desanimarishcami sintirita ushapanchi. Shina pasajpica, Jehová Dios ñucanchita ayudangapaca ¿imatata ruranga? (Sal. 136:23). Jehová Diosca ñucanchitaca juyaihuanmi ñaupaman catichun ayudanga (Sal. 28:9; 94:18). Shinaca Jehová Dios ñucanchita ayudanata seguro canaca ñucanchitaca Jehová Diospa ishcai bendiciongunata yaipi charichunmi ayudan. Callaripica, maipi causashpapash Jehová Dios ñucanchipa pacajuna huasishna o torreshna cashcata yaipi charichunmi ayudan. Catipica, Jehová Diospa ñaupajpi valishcacunapacha cashcata cuenta japichunmi ayudan. w21.11 pág. 6 párrs. 15-16

Llaquicunahuan cashpa shinlli feta charishcata o na charishcata paipa catijcuna ricuchina tucushcataca Jesusca alimi yacharca. Jesusca llaquicunata aguantashpa catita ushachunmi, Lucas libropi shuj chimbapuraimanda parlarca. Jesusca shuj viuda huarmigu juezpaman rishpa, paita llaquichishcamanda justiciata rurapai nishpami cutin cutin mañangapaj rishcatami parlarca. Chai viuda huarmiguca cutin cutin mañashcamanda chai juez ayudanataca segurami carca. Y shinami pasarca. Chai juez na justo cashpapashmi cutin cutin mañajushcamandaca ayudanata decidirca. ¿Imatata yachajupanchi? Jehová Diosca shuj justo Diosmi can. Chaimandallatami Jesusca, “Taita Diospa agllashca gentecuna tuta y punlla paita roganajujpica ¿nachu paicunataca ayudanga?” nirca (Luc. 18:1-8). Shinallata Jesusca: “Runapa Churi chayamushpaca ¿ciertopacha tucui shunguhuan crij gentecunata cai Alpapi taringacha?” nircami. Shinaca pipash ñucanchita yangamanda llaquichijpica, ñucanchicuna Jehová Diosta cutin cutin mañashpami pacienciata ricuchina capanchi. Shinallami feta charishcata ricuchipashun. Chai viuda huarmigushnami pacienciahuan ñaupaman catina capanchi. Shinlli feta charishpami Jehová Dios ayudanapica tucui shunguhuan confiaita ushapashun. Shinallata ñucanchicuna mañajpi Jehová Dios ñucanchita uyajujtaca tucui shungumi crina capanchi. w21.11 pág. 23 párr. 12; pág. 24 párr. 14

Jovenguna, ”Jehová Diospa mandashcacunaca yapatami imatapash ama rurachun jarcan” ¿yashpachu pensanajupanguichi? Cashna pensachunga Satanasmi munan. Satanasca, internetpi ricurishca gentecunashna o escuelapi compañerocunashna imatapash na rurashcamanda canba causai llaquilla cashcatashna ricuchunmi munan. Shinallata Jehovapa mandashcacunata pactachijuimanda na shuj cushilla causaita charishcatashna ricuchunmi munan. Shinapash Satanasca na villanllu ancho ñanda catijcuna huañuita tarina cashcata (Mat. 7:13, 14). Cutin Jehová Diosca quichiji ñanda catijcunaca causaita causagrinatami japigringa nishpa aligutami ricuchishca (Sal. 37:29; Is. 35:5, 6; 65:21-23). w21.12 pág. 23 párrs. 6-7

Shujcunata perdonana ali cashcataca alimi yachapanchi. Chaita ali yachashpapashmi huaquinbica shujcunata perdonanaca shinlli can. Apóstol Pedrotapashmi chaillata huaquinbica pasashca yarin (Mat. 18:21, 22). Shujcunata perdonangapaca ¿imata ayudaita ushan? Callaripica, Jehová Dios ñucanchita mashna viajecunata perdonashcatami yarina capanchi (Mat. 18:32, 33). Jehová Diosca ñucanchicuna na miricijpipashmi juyaimanda cutin cutin llaquishpa perdonan (Sal. 103:8-10). Ñucanchicunataca Bibliapica ‘caishujhuan chaishujhuan juyarichunmi’ mandan. Shinaca ñucanchicunaca huauquipanicunata perdonana obligaciondami charipanchi (1 Juan 4:11). Catipica, perdonanaca ñucanchita nali tratashcacuna ali comportarichun, congregacionbipash tucuicunahuan ali llevaringapaj, Jehová Dioshuanbash ali amigo cashpa catingapami ayudaita ushan. Ñucanchillatapashmi tranquilo sintirishun. Caicunata yarinami shujcunata perdonachun ayudaita ushan (2 Cor. 2:7; Col. 3:14). Quimsapica, shujcunata perdonai ushangapaca Jehová Diostami mañana capanchi. Jehová Diosmi shujcunata perdonachunga munan. Diabloca ñucanchi huauquipanicunahuan ali llevarichunga na munanllu (Efes. 4:26, 27). Diablopa cai trampapi ama urmangapaca Jehová Diospa ayudatami minishtipanchi. w21.06 pág. 22 párr. 11; pág. 23 párr. 14

Davidca, rey Saúl paita huañuchingapaj mascajujta yachashpami pacajushpa rirca. Shuj viajeca imagutapash micungapaj na charimandami Davidca, Nob shuti puebloman chayarca. Chaipi cashpaca picha tandagucunatalla carachunmi mañarca (1 Sam. 21:1, 3). Chai jipaca Davidpash, paipa soldadocunapash shuj cuevapi pacajungapami rirca (1 Sam. 22:1). Davidca ¿imamandata shina pacajushpa purijurca? David ashtaca macanajuicunata mishashcamanda rijsishcapacha tucujpimi, Saulca ninanda envidiai callarirca. Na cazushcamanda Israel llactata rey shina mandashpa catichun Jehová Dios ñana munashcataca Saulca alimi yacharca. Shinallata Israel llactata mandachun Jehová Dios Davidta agllashcatapashmi yacharca (1 Sam. 23:16, 17). Shinapash chai ratocaman Saúl Israel llactata mandajushcamandami ashtaca ashtaca soldadocunata charirca. Chaimandami Davidca pacajushpa purijurca. Rey Saulca ¿“Jehovapa decisionguna ama pactarichun jarcai ushashami” yuyajurcachu? (Is. 55:11). Bibliapica caimandaca na imatapash nijunllu. Shinapash Saulca Diospa agllashca decisionda na cazushpaca nalitami rurajurca. Taita Diospa contracunaca nunca na mishangachu. w22.01 pág. 2 párrs. 1-2

Jesusca gentecunaman villachingapaca shinllitami esforzarirca. Maipi cashpapash, ima hora cashpapash villachingapaj aprovechashpami gentecunata juyashcata ricuchirca (Luc. 19:47, 48). ¿Imamandata chaita rurarca? Gentecunata llaquimandami shina rurarca. Huaquinbica ashtaca ashtaca gentecuna Jesús yachachijpi uyangapaj munashcamandami paipash y paipa discipulocunapash ‘micuitapash na usharca’ (Mar. 3:20). Shinallata shuj runagu Jesushuan parlangapaj tuta rijpipash, paica chai runaguta chasquishpami uyarca. Jesús villachishca gentecunaca na tucuicunachu Jesuspa discipulocuna tucurca. Shinapash tucuicunamanmi Jesusca aliguta villachirca. Cunan punllacunapipash tucui gentecunaman Jehová Diosmanda ali villaigucunata yachachingapami munapanchi (Hech. 10:42). Chaita rurai ushangapaca, talvez imapash cambiocunata rurana tucushun. Shinaca ñucanchi munashca horaspi villachinapa randica, gentecunata ima horas tupanata ricushpa villachipashunchi. Shina rurajpica Jehová Diosca ninandami cushijunga. w22.01 pág. 17 párrs. 13-14

Cunan punllacunapica autoridadta charij gentecunapi confianaca ashtacacunapaca shinllimi ricurin. Leycuna tiajpipash autoridadta charij gentecunaca pobre gentecunapa favor tucunapa randica, rico gentecunatallami ayudashca. Shinallata iglesiacunata ñaupaman pushajcuna nalicunata rurashpa causanajushcata ricushpami gentecunaca Diospi confianatapash saquishca. Chaimandami Bibliamanda yachachijushpaca gentecuna Jehová Diospi confiai ushachun y paipa organizacionbi confiai ushachunbash ayudana capanchi. Shinapash Jehová Diospi y paipa organizacionbi confianataca na Bibliamanda yachajujcunallaca yachajunachu can. Mashna huatacunata Jehovata sirvinajushpapash tucuicunallatami Jehová Dios tucuita ali ruraj Dios cashcataca siempre confiashpa catina capanchi. Huaquinbica imapash situacionguna ricurijpimi Jehová Diospi tucui shungu confiashcata o na confiashcataca ricuchina tucun. w22.02 pág. 2 párrs. 1-2