Mayo

Jehová Diosca ñucanchita juyaimandami paipa Churi Jesusta rijsichunga Bibliapica Mateo, Marcos, Lucas, Juan librocunata escribichirca. Cai librocunapica Jesús cai Alpapi cashpa imacunatalla rurashcatami villajun. Cai librocunapimi Jesusmandaca ashtahuan yachajuita ushapanchi. Shinaca cai chuscu librocunapimi Jesús imashina cashcata, imashina paipa ejemplota ali catita ushanatapash yachajuita ushapanchi. Cai chuscu librocunataca liitallaca na liinachu capanchi. Sino liishcacunapi ali pensaringapami tiempota llujchina capanchi (Josué 1:8​huan chimbapurashpa ricupangui). Chai librocunata liijushpa, chaipi cashcashnallata imatapash ricungapaj, uyangapaj, sintingapaj quiquinba umapi pensaripai. Shinallata Jehová Diospa organización cushca ayudacunahuanbash ashtahuan yachajupai. w21.04 págs. 4-5 párrs. 11-13

Jehová Diosca Bibliapica Jesús ashtaca huatacunata cai Alpaman nara shamujpillatami, Mesiastaca ‘quimsa chunga culquipami’ traicionanga nishpa villarca (Zac. 11:12, 13). Paita traicionajca shuj amigomi canga nijurcami (Sal. 41:9). Shinallata Zacarías libropipashmi: ‘Llamacunata michijta chugrichijpimi, llamacunaca caita chaita rinajunga’ nirca (Zac. 13:7). Cai tucui cosascuna pasajpipash ali shunguta charij gentecunaca Jesuspi cai profeciacuna pactarijta ricushpaca Jesusmanda caruyanapa randica, Jesús Mesías cashcata crishpami tucui shungu catina carca. ¿Cunanbipashchu chashnallata pasajun? Ari. Cunan punllacunapipash huaquin rijsishca testigo de Jehovacunaca Bibliapa yachachishcacunata saquishpami paicunaca yanga yachachishcacunata crishpa Jehovamanda caruyashca. Shinapash paicunaca shujcuna paicunashnallata Jehová Diosmanda caruyachunmi huaquinbica internetpi, telepi, radiopi testigo de Jehovacunamanda imapash llullacunata nishca. Shinapash ali shunguta charij gentecunaca cai llullacunataca na crinllu. Paicunaca cunan punllacunapi cashna llullacunata nij gentecuna tianata Bibliapi yachajushcamandami na crin (Mat. 24:24; 2 Ped. 2:18-22). w21.05 pág. 11 párr. 12; págs. 12-13 párrs. 18-19

Bibliapica Diospa llactaca tiempohuanmi asha asha imagutapash yachajushpa ringa nijurcami (Col. 1:9, 10). Jehová Diosca paipa organizacionmanga asha ashami Bibliamandaca ali yachachishpa catijushca. Chaimandami Bibliata tucuita aliguta intindingapaca pacienciata charina capanchi. Ñucanchi organizacionbi ñaupaman pushaj huauquicunaca Bibliapi imapash textocunata panda intindishcata cuenta japishpaca, chaita ali intindishpami cambiocunata ruranlla. Ashtaca iglesiacunata ñaupaman pushajcunaca iglesiaman shamuj gentecunata cushichingapallami imapash cambiocunata ruran. Shinapash testigo de Jehovacunaca cambiocunata rurashpaca, Jehová Diosmanda ashtahuan yachajungapaj, paihuan ali amigo tucungapaj, Jesús yachachishcashna adorangapami rurapanchi (Sant. 4:4). Cambiocunata rurashpaca gentecuna caita o chaita ruraichi nishcamandallaca na rurapanchichu. Cai cambiocunataca Bibliata ashtahuan ali intindishcamandami rurapanchi. Shinami Bibliata ciertopacha respetashcata ricuchipanchi (1 Tes. 2:3, 4). w21.10 pág. 22 párr. 12

Sololla sintirishpaca ¿imatata rurai ushapangui? Jehová Dios quiquinda imashina ayudajujta pensaripai (Sal. 55:22). Caipi pensarinami ama sololla sintirichun ayudanga. Sololla sintirij huauquipanicunata imashina Jehová Dios ayudajushcapipash pensaripai (1 Pedro 5:9, 10). Hiroshi shuti huauquiguca ashtaca huatacunatami paipa familiapica pailla Testigo cashca. Paica ninmi: “Tucuicuna Jehová Diosta sirvingapaj tucui usharishcaguta ruranajushcata ricunami, na Testigo familiata charishpapash Jehovata sirvishpa catichun ayudahuashca” nin. Shinallata Jehovata mañarianata, Bibliata liinata, tandanajuicunaman rinata ama saquipanguichu. Chaipaca quiquin imashina sintirijushcataca cabalgutami Jehová Diosmanga parlanalla capangui. Jehová Dios quiquinda juyashcata yarichunga Bibliata cada punlla liina, liishcapi pensarinapashmi minishtirishcapacha can. Huaquin huauquipanicunaca paicunata animachij textocunatami de memoria yachajun. Por ejemplo, Salmo 27:10​ta, Isaías 41:10​tami yachajun. Cutin shujcunaca reuniongunapa prepararijushpa o Bibliata liijushpaca grabashca audiocunatami uyan. Caicunata rurana ama sololla sintirichun ayudajtami ricushca. w21.06 págs. 9-10 párrs. 5-8

¿Quiquinba shuj familiarchu huañupashca? Shina cajpica Jehová Dios cutin causachishca gentecunapa ejemplomanda Bibliapi liipangui. O talvez quiquinba familiamanda pipash congregacionmanda expulsai tucushca cajpica, Jehová Diospa disciplina siempre ali cashcata parlaj temacunata estudiapangui. Imapash problemacuna o llaquicuna ricurijpica, Taita Diospaman ashtahuan quimirinami quiquinba fetaca ashtahuan shinlliyachinga. Shinallata quiquin imashina sintirijushcatami, Jehová Diosmanga tucuita villapangui. Huauquipanicunahuanbash tandanajushpa catipangui (Prov. 18:1). Llaquilla cashcamanda huacajushpapash, Jehová Diosmanda imagutapash ruranataca ama saquipaichu (Sal. 126:5, 6). Tandanajuicunaman rinata, villachinata, Bibliata liinatapash ama saquipaichu. Shinallata Jehová Dios carasha nishca bendiciongunapi pensarishpa catipai. Jehová Dios quiquinda imashina ayudajujta ricushpami, quiquinba feca ashtahuan shinlliyanga. w21.11 pág. 23 párr. 11; pág. 24 párr. 17

Jesusta catijcunaca ¿imapita “uchilla huambragucunashna” capanchi? Cai mundomanda gentecunaca charij gentecunata, famosocunata o autoridadta charijcunatami yapata respetashpa ricun. Shinapash ñucanchicuna na shina cashcamandami paicunaca ‘uchilla huambracunatashna’ o na importantecunatashna ricun (1 Cor. 1:26-29). Shinapash Jehová Diosca ñucanchicunataca na shina ricunllu. Jesusca ¿imamandata cai ‘uchilla huambragucunashnacunamandaca’ parlarca? Jesuspa discipulocunaca: “Jahua cielopi Taita Diospa Gobiernopica ¿pita ashtahuan importante can?” nishpami Jesustaca tapushca carca (Mat. 18:1). Jesuspa tiempopica ashtaca judiocunaca shujcunapa ñaupajpi yali cangapaj, importantecuna cangapami munan carca. Shuj estudiashca jarica ninmi: “Chai tiempomanda gentecunaca paicunata ninandapacha shujcuna alicachishpa ricuchun, famosocunatashna tratachun, paicunata ninanda respetachunmi munan carca” ninmi. Jesusca paipa discipulocuna judiocunashna ama pensangapaj ninanda esforzarina cashcatami ali yacharca. w21.06 pág. 20 párr. 2; pág. 21 párrs. 6, 8; pág. 22 párr. 9

Apóstol Pabloca anciano huauquicunapaca shuj alipacha ejemplotami saquirca. Por ejemplo, Tesalónica llactamanda huauquipanicuna consejota minishtijujta ricushpaca na manllashpami consejarcalla. Shinapash paicunaman cachashca cartacunapica, callaripica Jehová Diosta na saquishpa sirvinajushcamanda, juyaita ricuchishcamanda, llaquicunata aguantashpa catinajushcamandami felicitarca. Shinallata paicuna ima llaquicunatalla charishcata yachaimandami, “aguantashcatapash na cungapanchichu” nirca (1 Tes. 1:3; 2 Tes. 1:4). Shinallata shuj huauquipanicunapapash ali ejemplocunami canguichi nircami (1 Tes. 1:8, 9). Pablo paicunata cashna animajpica paicunaca seguromi ninanda cushijushcanga. Paicunata ninanda juyashcatapashmi seguro cashcanga. Chaimandami Tesalónica llactamanda huauquipanicunaman Pablo cachashca ishcai cartacunapi consejocunata paicunaca cushijushpa chasquishcanga (1 Tes. 4:1, 3-5, 11; 2 Tes. 3:11, 12). w22.02 pág. 15 párr. 6

Satanasca, Jehová Diosmanda llullacunata ningapaca cai mundopi panda religiongunata pushajcunatami utilizan. Chaimi panda religiongunaca, “cai mundopi llaquicunataca Taita Diosmi cachamujun” nishpa gentecunamanga yachachin. Shuj huahuagu huañujpica, “Taita Diosmi cielopi shuj angelguta minishtishcanga. Chaimi quiquinba huahuagutaca apashcanga” nishpami crichin. Shina nishpaca Jehová Diosmandaca nalicunatapachami ninajun. Shinapash Testigocunaca imacunamandapacha llaquicuna tiashcataca alimi yachapanchi. Chaimi shuj na jambirinalla unguihuan cashpa o shuj familia, shuj amigo huañujpica Taita Diostaca na culpanchi. Ashtahuangarin chai llaquicunata Taita Dios shuj punlla tucuchinatami cripanchi. Chaimi Jehová Dios shuj juyaj Dios cashcataca tucuicunaman villapanchi. Shinami Jehová Diosca, Satanás llullaj cashcata ricuchi ushanga (Prov. 27:11). Jehová Diosca llaquij, juyaj Diosmi can. Chaimi ñucanchicunata catiriashpa llaquichijpi, shuj na jambirinalla unguihuan cajpi, ñucanchicuna juchayujcuna caimanda pandarijpipash ninanda llaquirin (Sal. 22:23, 24). Jehová Diosca ñucanchicuna imashinapacha sintirijtaca alimi yachan. Chaimi ñucanchipa sufrimientocunata tucuchingapaj munan. Y tucuchingami (Éxodo 3:7, 8; Isaías 63:9​huan chimbapurashpa ricupangui). w21.07 págs. 9-10 párrs. 9-10

Jehová Diosta cazuj gentecunaca paita juyashpa para siempre adorana bendiciondaca ñallami chasquinga. Jesús cai Alpata mandai callarishpaca, Adanba y Evapa culpamanda tiashca llaquicunatami tucuita tucuchinga. Shinallata Jehová Diosca ashtaca gentecunatami causachinga. Chai gentecunaca cai Alpagu shuj paraíso tucujpi sano, imapash ungui illaj causana oportunidadtami chasquinga (Luc. 23:42, 43). Chai tiempopica Jehová Diosta sirvijcunaca jucha illajmi tucunga. Chaipimi David nishcashnaca, “jatun canatapash, alicachi tucunatapash” gentecunaca chasquinga. Quiquin pipash ‘na cuentai ushanalla ashtaca gentecunapuramanda’ cashpaca shuj alipacha bendiciondami charipangui (Apoc. 7:9). Jehová Diosca quiquinda juyaimandami paipa familiapi cachun munan. Shinaca paipa ñaupajpi imagutapash alita rurashpa ali ricuringapaj esforzaripangui. Jehová Dios cusha nishca bendiciongunata chasquinatapash yaria causapangui. Jehová Diosta para siempre adorana, alabana bendiciondapash valichishpa ricupangui. w21.08 pág. 7 párrs. 18-19

Gentecuna na uyangapaj munajpipashmi, profeta Jeremiasca ashtaca huatacunata na shaijushpa villachishpa catirca. Profeta Jeremiastaca gentecunapa rimashcacuna, burlarishcacunami ninanda desanimachirca. Chaimandami shuj viajeca villachinatapash saquinata pensarca (Jer. 20:8, 9). Shina pensajujpica ¿imata paitaca ayudarca? Callaripica, pai villachishcamanda uyaj gentecunaman Jehová Dios shuj tranquilo, ‘ali causaiguta caranapimi’ pensarirca (Jer. 29:11). Catipica, villachichun Jehová Diosllata paita agllashca cashcatami pensarirca (Jer. 15:16). Ñucanchicunapash Jehová Dios ñucanchita agllashcamandami, Jehová Dios shuj ali causaiguta gentecunaman carana cashcata villachipanchi. Shinaca caicunapi pensarinami gentecuna na uyangapaj munajpipash cushilla villachishpa cati ushapashun. Shuj persona Jesuspa catij tucuchunga pacienciami minishtirin. Chaimandami shuj Bibliamanda yachajuj ñucanchi munashca tiempopi Jehová Diosta na sirvi callarijpica na desanimarina capanchi (Sant. 5:7, 8). w21.10 pág. 27 párrs. 12-13

Mashna tiempota Jehová Diosta sirvijushpapash, paipa rurashcacunapi tucui shunguhuan crishpa catingapami paimanda ashtahuan yachajushpa catina capanchi. Na shina rurashpaca, asha ashami Diospi crinataca saquita ushapanchi. Yaripashunchi: Ñucanchicunaca na ricunalla cosascunapi crishpapash, chaicuna ciertopacha cashcata seguro caimandami cripanchi. Shinapash, imapash cosascunata na ricushpaca, facilmi cungaita usharinlla. Chaimandami Pabloca, tucui shunguhuan na crinataca, ‘ñucanchita fácil urmachingapaj munaj pecado’ nirca. Shinaca, Jehová Diospi tucui shunguhuan crishpa catingapaca ¿imatata rurai ushapanchi? (2 Tes. 1:3). Callaripica, Jehová Dios paipa espíritu santohuan ayudachunmi siempre mañana capanchi. ¿Imamandata shina rurana capanchi? Porque tucui shunguhuan crinataca espíritu santopa ayudahuanmi ashtahuan charita ushapanchi (Gál. 5:22, 23). Shinaca, espíritu santo na ayudajpica, Jehová Diospi, pai tucui cosascunata rurashcapi tucui shunguhuan crishpa catitaca na ushashunllu. Shinaca, Jehová Dios paipa espíritu santohuan ayudashpa catichun siempre mañapashunchi. Shina rurajpica, paica ayudangami (Luc. 11:13). Ashtahuangarin, “tucui shunguhuan crichun ayudahuayari” nishpami mañaita ushapanchi (Luc. 17:5). Catipica, Bibliata siempre estudiapashunchi (Sal. 1:2, 3). w21.08 págs. 18-19 párrs. 16-18

Mayorgucunaca masqui pundacunashna na fuerzata charishpapash ashtacatami ayudaita ushan. Paicunaca paicunapa causaipica ashtaca experienciatami charishca. Jehová Diosca mayoriashca huauquipanigucunataca paipa organizacionbi ayudashpa catichunmi utilizashca. Bibliapica mayor tucungacaman Jehovata tucui shunguhuan sirvishcacunamandami parlan. Por ejemplo, Moisesca 80 huatacunata charishpami profeta tucurca, israelitacunatapash ñaupaman pusharca. Cutin Danielca talvez 90 yali huatacunata charishpapashmi Jehovapa profeta carca. Shinallata apóstol Juanga, Apocalipsis librota Jehová Dios yarichijpi escribijushpaca 90 yali huatacunatami charishca yarin. Bibliapica “alita ruraj Taita Diosta sirvij Simeón shuti” jarigumanda ashagutallami parlan. Shinapash paitami Jehová Diosca Jesús huahuagu cajpi rijsina bendicionda curca. Simeonga Jesuspash, Mariapash jipa punllacunapi ima pasanata villana bendiciondapashmi chasquirca (Luc. 2:22, 25-35). w21.09 págs. 3-4 párrs. 5-7

Taitamamacuna huahuacunata charishpaca na paicunapa shuj huahuacunahuanga comparajunachu can. Shinallata na usharina cosascunatapash rurachunga na mandanachu can. Caicunata rurashpaca huahuacunatami nalitapacha sintichita ushanga (Efes. 6:4). Sandra shuti paniguca ninmi: “Ñuca mamitaca tucuipi ali notacunata llujchichunmi munan carca. Shinapash chaitaca na rurai usharcanichu. Chaimi ashtaca tiempota ña escuelata tucuchishca cashpapash, Jehová Diosta sirvingapaj imaguta rurashpapash, ‘Jehová Diosca chaigucunahuanga na cushijungachu’ yashpa pensarini” nin. Rey Davidca nircami: “Jatumbi canatapash na mascashpa purishcanichu. Ñucapaj imapash yapa ali canataca, na mascashcanichu” nishpa. Rey Davidca humilde cashcamandami shungu ucupipash tranquilo sintirirca (Sal. 131:2). Taitamamacunaca rey Davidshnallatami paicunallatapash, paicunapa huahuacunahuanbash humildecuna cana can. Paicunaca huahuacuna imata alipacha rurai ushashcata, imata na alipacha rurai ushashcatapash yaipimi charina can. Shinami pactachi ushana metacunata churarishpa ali sintirichunmi huahuacunataca ayudanga. w21.07 págs. 21-22 párrs. 5-6

Jehová Diosca cada unomanmi imata ruranata, imata na ruranata agllachun libre saquishca. Chaimandami cada uno Jehová Diosta sirvinata o na sirvinata agllai ushapanchi. Huaquin jovengunaca na Testigo familiapurapimi viñashca. Shinapash paicunaca Jehová Diosta sirvinata decidishpami aliguta sirvinajushca. Cutin shujcunaca Testigo taitamamacunahuanmi viñashca. Cai taitacuna Jehovata sirvichun paicunata ninanda ayudashca cajpipashmi, viñashpaca Jehovata sirvinata saquishca. Shinaca cada unomi Jehovata sirvinata o na sirvinataca decidina capanchi (Jos. 24:15). Chaimandami taitamamacunaca huahuacuna Jehová Diosta sirvinata saquijpica na culparijuna can. Huaquinbica taita o mamami Jehová Diosta sirvinataca saquin. Huaquinbicarin familiatapashmi jichushpa rin (Sal. 27:10). Cai pasajpica, huahuacunaca ninandami llaquirin. Jovenguna, quiquingunapa taita o mama expulsai tucujpica llaquillami sintiripanguichi. Jehová Diosca quiquinguna imashina sintirijushcataca alipachami intindin. Paica quiquingunataca juyanmi. Paita sirvishpa catinajujta ricushpacarin ninandami cushijun. Shinallata taita o mama expulsai tucushca cajpica, quiquinguna chaicunamanda na culparijuna cashcatapash yarinami canguichi. w21.09 pág. 27 párrs. 5-7

Congregacionmanda expulsashcacunaca Jehovapa ñaupajpi shuj irquilla llamagucunashnami can (Sant. 5:14). Contagioso unguicunaca shujcunamanga yalinllami. Shina cuendami pipash Jehovapa ñaupajpi ñana ali ricurijujpica congregacionmanda huauquipanigucunata llaquichita ushan. Chaimi juchata rurashpa chaicunamanda na arripintirijcunataca congregacionmanda expulsana can. Juchata ruradorta expulsashpaca Jehová Diosca congregacionmanda tucui huauquipanicunata juyashcatami ricuchin. Shinallata juchata ruradorpash shungumanda arripintirichunmi ayudan. Expulsashcacunaca tandanajuicunaman rita, publicaciongunatapash charita ushanmi. JW Broadcasting^® programatapashmi ricushpa catita ushan. Y paipa causaipi cambiocunata rurajujta ricushpaca ancianocunapashmi ashtahuan consejogucunata cushpa ayudanga. Shinallata congregacionman cutin tigrachunbashmi ayudaita ushanga. w21.10 pág. 10 párrs. 9, 11

Cunan punllacunapica callari Jesusta catijcunapa ejemplota catishpami Jehová Diostaca adoranajupanchi. Por ejemplo, ñucanchi organizacionga punda Jesusta catijcunashnallatami organizarishca can. Chaimandami superintendentes viajantes, ancianos, siervos ministeriales huauquicuna tian (Filip. 1:1; Tito 1:5). Shinallata shuj jarihuan shuj huarmihuan canamanda, cazaranamanda, yahuarta respetanamanda, congregacionbi pipash shuj juchata rurashpa na arripintirijpi expulsanamandaca, punda Jesusta catijcunashnallatami pensapanchi (Hech. 15:28, 29; 1 Cor. 5:11-13; 6:9, 10; Heb. 13:4). Bibliapica, “crinapash shujllami“ o shujlla ali religionmi tian nijunmi. Y cai religionllami Diospa ñaupajpica ali ricurijun (Efes. 4:4-6, Diospaj Shimi). Jehová Diospa organizacionbi cana, Jehová Diosmanda cabalta yachajuna, pai jipa punllacunapi ima cosascunata ruragrijujta yachanaca shuj jatun bendicionmi can. Chaimanda Bibliapa yachachishcacunapi tucui shunguhuan crishpa catipashunchi. w21.10 págs. 22-23 párrs. 15-17

Amonitacuna, moabitacuna y Seír pushtumanda gentecunahuan tandanajushpami, rey Jehosafatta, paipa familiata y tucuilla chaipi causajcunatapash llaquichingapaj munanajurca (2 Crón. 20:1, 2). Chai llaquipi cashpaca, Jehosafatca ¿imatata rurarca? Jehová Dios paita ayudachun, paita shinlliyachichunmi paipa ayudata mascarca. Paica, Jehová Diostami ayudahuai nishpa mañarca. Jehosafatpa mañashcataca 2 Crónicas 20:5-12​pimi taripanchi. Chaipimi Jehová Diospi tucui shunguhuan confiashcata ricupanchi. Jehová Diosca, Jahaziel shuti levitata utilizashpami Jehosafatpa mañaita uyashcata ricuchirca. Chaitaca cunan punllapa textopimi ricui ushapanchi. Jehosafatca Jehová Diostaca tucuipimi cazurca. Chaimi rey Jehosafat guerraman rishpaca alipacha macanajuj soldadocunata ñaupa filapi churanapa randica, candanata yachaj jaricunatami ñaupa filapica churarca. Jehová Diosta cazushcamandami Jehosafatca chai guerrapi paipa tucui contracunata mishai usharca (2 Crón. 20:18-23). w21.11 págs. 15-16 párrs. 6-7

Llaquicunahuan, problemacunahuan cajpica, Jehová Diosmi paita sirvishpa ñaupaman catichun ayudanga (2 Cor. 4:7-9). Shinaca Jehová Dios ñucanchita juyashpa catinataca seguromi caita ushapanchi. Salmo librota escribij runagupashmi, ‘Mandaj Diosca paipaj ñavihuanmi paita manllajcunatapash, pai llaquichun shuyajcunatapash ricujun’ nircami (Sal. 33:18-22). Jehová Diosca paita nara rijsijpillatami ñucanchitaca ña juyarca. Shinapash ñucanchi paimanda yachajushpa paita sirvi callarijpica ashtahuanmi ñucanchimanga paipa ninan juyaita ricuchishca. Chashna ñucanchita ninanda juyashcamandami, ñucanchitaca siempre cuidajun. Jehová Diosca ñucanchita cuidashpa paipa nishcacunatapash tucuitami pactachinga. Jehová Diosca, ñucanchicuna shuj ali causaiguta charichunmi munan (Sal. 46:1, 2, 7). Shinaca ima llaquicunata charijpipash Jehová Diosmi ñucanchiman fuerzata cushpa paita sirvishpa ñaupaman catichun ayudanga. w21.11 pág. 7 párrs. 17-18

Casi tucuicunallatami shuj persona escuelamanda, trabajomanda shuj compañero o shuj familiar llaquichishcamanda ashtaca huatacunata risintirishpa quidashcata uyapashcanchi. Josemanda yaripashunchi. Josetaca paipa huauquicunaca paita na ricunayachimandami nali cosascunata rurarca (Gén. 37:2-8, 25-28). Joseta paipa huauquicuna nali tratashca cajpipashmi, paica paicunataca llaquishpa, juyaihuan tratarca. Joseca na risintirishpami Levítico 19:18​pi mandashca consejotaca pactachirca (Gén. 50:19-21). Jehová Diospa ñaupajpi ali ricuringapaj munashpaca, shujcuna ñucanchita llaquichishcamanda risintirishca quidanapa randica, Josepa ejemplota catishpami perdonana capanchi. Jesuspashmi pipash ima nalita rurashcajpica perdonanami canguichi nirca (Mat. 6:9, 12). Shinallata apóstol Pablopashmi: “Cangunata na ricunayachij gentecunataca, na tigrachishpa llaquichinachu canguichi” nishpa consejarca (Rom. 12:19). w21.12 pág. 11 párrs. 13-14

Jesusca huata 33, 14 de nisanbimi jardín de Getsemaniman rishpa Jehovataca shungumanda tucuita parlarca (Luc. 22:39-44). Jesusca chai horasca shuj difícil situaciondami yalijurca. Chaimandami Jehová Diostaca, “huacashpa uyarijta mañarca y rogarcapash” (Heb. 5:7). Shinaca Jesús nara huañushpaca, Jehová Diostaca ¿imatata mañarca? Jehová Diostaca, “canda huañungacaman ama saquishpa sirvingapaj, canba munaita tucuipi pactachingapaj” ayudahuai nishpami mañarca. Jesús mañashcata uyashpami, Jehová Diosca shuj angelta cachashpa paita shinllichirca. Jesusca, Jehovapa shutita tucui gentecunapa ñaupajpi alipi quidachina jatun responsabilidadtami charirca. Jesús tucui shunguhuan mañajpica, Jehová Diosca uyarcami. ¿Imamandata uyarca? Jesuspaca Jehová Diosta na saquishpa sirvina, paipa shutita alipi quidachina ashtahuanbacha importante caimandami, Jehová Diosca paipa mañaicunataca uyarca. Ñucanchicunapash chaitallata rurangapaj Jehová Diosta mañajpica ñucanchitapash uyangami (Sal. 145:18). w22.01 pág. 18 párrs. 15-17

Ashtaca gentecunaca ñucanchicuna politicapi na chapurijpimi ñucanchitaca na uyangapaj munan. Paicunaca, “shuj candidatota apoyanami canguichi” ninmi. Pero ñucanchicunaca gentecunapa shuj gobiernota apoyashpaca Jehovapa Gobiernota na apoyajushcatami ricuchinchiman (1 Sam. 8:4-7). Cutin shuj gentecunaca: “Hospitalcunata, escuelacunata, shuj shuj ali ruraicunata rurashpami gentecunataca ayudana canguichi” ninmi. Paicunaca cunanbi tiashca problemacunata ñucanchicuna uchalla arreglachunmi munan. Ñucanchicuna villachinapi ashtahuan empeñarijpimi ñucanchi yachachijpica na uyangapaj munan. ¿Imata ama pandachi tucuchunga ayudanga? (Mat. 7:21-23). Ñucanchipaca Jesús mandashcashna Diospa Gobiernomanda villachinami ashtahuanbachaca importante can. Cai mundopi politicamanda o shuj cosascunamanda tiashca problemacuna ñucanchita pandachichunga na saquinachu capanchi. Testigo de Jehovacunaca gentecunata juyaimandami, paicuna llaquicunata charijpica preocuparipanchi. Chaimi paicunata ayudangapaca Diospa Gobiernomanda ali villaigucunata villachishpa, yachachishpa Jehová Diospa amigocuna tucuchun ayudapanchi. w21.05 pág. 7 párrs. 19-20

Aunque tauca gobiernocuna, “ñucanchica Taita Diostami sirvinchi” nishpapash, paicunapa munashcata rurashpami catinajun. Jesús cai Alpapi causashca tiempocunapishnami, cunanbi gentecunaca Jehová Dios Jesusta agllashcata na crishpa Jehovapa sirvijcunataca catiriashpa llaquichinajun (Hech. 4:25-28). Chaita ricushpaca, Jehová Diosca ¿imatata nin? Salmo 2:10-12 Jehová Diosca cashnami nin: “Jatun mandajcunalla, cunanga aligutapacha yarishpa causaichi. Cai pachapi tiaj juezcuna, shinlli tacurishcata cazuichi. Mandaj Diostaca, manllaihuan servishpa causaichi. Cushijuitapash chujchushpa cushijuichi. Pai fiñarijpi ñanbi ama huañungapaca, paipaj Churitami alicachina canguichi. Paica, nina japirinshna ñapash fiñarinllami. Paita yariashpa causajcunaca, tucuicunami ninanda cushijun” nishpa. Jehová Diosca gulpi gentegucunata ninanda juyaimandami, contracunapash cambiachun cunangaman tiempoguta carashca. Shinapash chai tiempoca ñami tucurijun (Is. 61:2). Chaimandami gentecunaca uchalla Jehová Diosmanda yachajushpa, paipa lado tucuna can. w21.09 págs. 15-16 párrs. 8-9

Cai shimicunahuanga Pabloca, imaguta charishpapash chai cosascunahuanlla contento causana cashcatami nijurca (Filip. 4:12). Shinaca Jehová Dioshuan ali amigo canami tucuimanda ashtahuan importante cashcata yarina capanchi (Hab. 3:17, 18). 40 huatacunata desiertopi cajpi, Moisés israelitacunaman imata nishcata ricupashunchi. Moisesca, cangunataca “Mandaj Taita Diosca, canguna imata rurajpipash, ninandami bendiciamurca [. .  .] Cangunata Mandaj Taita Diosca, cai [40] huatata cangunahuan cajpimi cangunaca, imapash na illajpi causarcanguichi” nircami (Deut. 2:7). Israelitacuna 40 huatacunata desiertopi cajpica Jehová Diosca maná micunaguta cushpami alimentarca. Shinallata paicunapa ropapash ama tucurichunmi cuidariarca (Deut. 8:3, 4). Ñucanchicuna imapash charishca cosasgucunahuanlla contento cajpi, ñucanchita bendiciashcamanda valichishpa agradicijpica, Jehová Diosca ninandami cushijunga. w22.01 pág. 5 párrs. 10-11

Cusacuna, familiata ali cuidana responsabilidadtami charipanguichi. Chaimandami chaita ali pactachingapaj esforzarinajunguichi. Shinaca familiapi problemacunataca quiquingunalla solucionana cashcatami talvez yuyapanguichi. Shinapash chashna pensanapa randica, Jehová Diospa ayudatami mascana canguichi. Quiquingunapa huarmiguhuanbash Jehová Diosta mañapaichi. Jehovapa ayudataca Bibliapi, Jehová Diospa organización cushca publicaciongunapipash mascapaichi. Chaipi yachajushca consejocunata pactachingapapash esforzarichi. Huaquingunaca Bibliapi yachajushcashna imatapash rurai callarijpimi nalicachishpa ricuita ushan. Paicunaca, “Bibliapa consejocunata catinapa randica, culquita charina, cosascunata charinami ashtahuan cushilla causaita cunga” nita ushan. Shinapash rey Jehosafatpa ejemplota yaripaichi (2 Crón. 20:1-30). Paica Jehová Diospi confiashcataca ruraicunahuanmi ricuchirca. Shina rurashcamandami Jehová Diosca Jehosafattaca nunca na saquirca. Shinallatami Jehová Diosca quiquingunatapash nunca na saquinga (Sal. 37:28; Heb. 13:5). w21.11 pág. 15 párr. 6; pág. 16 párr. 8

Jehová Dios ñucanchita paiman rijchajta rurashcamandami ñucanchicunapash nali cosascunataca nalicachipanchi (Gén. 1:26). Shinapash juchayucuna caimandami huaquinbica imatapash alimi yachanchi yashpa pitapash yangata imatapash nishpa pandarinchilla. Por ejemplo, Bibliapi Jonás runaguta yaripashunchi. Paica Jehová Dios Nínive llactapi gentecunata perdonanata decidishcamandami ninanda culirarca (Jon. 3:10–4:1). Shinapash Nínive llactapi gentecunata Jehová Dios perdonanata decidishcamandami 120 mil gentecuna salvarirca. Shinaca Jehová Dios Nínive llactapi gentecunata perdonanata decidishpaca alitami rurarca. Jonasmi pandarijurca. Jehová Diosca imata decidishpapash imamanda shina decidishcata explicana obligaciondaca na charinllu. Punda tiempocunapica Jehová Diosca imata decidishpapash paipa sirvijcuna chai decisiongunamanda imata yuyashcata parlachun saquircallami (Gén. 18:25; Jon. 4:2, 3). Huaquinbicarin imamanda shina decidishcatapashmi intindichin carca (Jon. 4:10, 11). Shinapash Jehová Diosca imatapash nara rurashpallata o imatapash rurashca jipapash ñucanchipa aprobaciondaca na minishtinllu (Is. 40:13, 14; 55:9). w22.02 págs. 3-4 párrs. 5-6

‘Ashtahuan jovenshna’ cangapaca shujcuna ñucanchimanda yali cashcatami ricuna capanchi (Filip. 2:3). Shujcuna ñucanchimanda yali cashcata ricushpaca shuj huauquipanicunataca na llaquichishunllu. Tucui huauquipanigucunallatami ñucanchimandaca imagupipash yali can. Chaitaca paicunapa ali ruraicunapimi cuenta japita ushapanchi. Ñucanchicunaca apóstol Pablo Corinto llactapi congregacionman cushca consejotami yarina capanchi. Paica nircami: “Shinaca ¿imata charishpata quiquinga shujcunamanda mejormi cani yajungui? ¿Nachu Taita Dios quiquinmanga tucuita cushca? Taita Dios tucuita cushca cajpica ¿imashpata imatapash na chasquishcashna jariyajungui?” nishpa (1 Cor. 4:7). Shinaca “shujcunata yalimi cani” yashpaca ima horapash napacha pensanachu capanchi. Chaimi shuj huauquigu discursocunata ali cuita ushashpapash o shuj panigu gentecunaman Bibliamanda yachachi callaringapaj ali cashpapash, Jehová Diospa ayudahuan rurai ushashcata yarina can. w21.06 pág. 22 párrs. 9-10

Ashtaca Testigocunapaca cunanbi gentecunaman villachinaca ashtahuan shinllimi tucushca. Huaquin gentecunaca jatun edificiocunapi o condominiocunapimi causan. Cashna huasicunapica guardiacuna cuidanajushcamandami na fácil villachingapaca yaicuita usharin. Guardiacunaca dueñocunalla o rijsishcacunalla yaicuchunmi ricurianajun. Chaimi chai huasicunamanga na yangata yaicuita usharinlla. Cutin shujcunaca gentecunataca huasipi casi na tupanllu o carucunata rishpa ashalla gentecuna tiaj pushtucunapimi villachin. Chaimandami ashtaca horascunata rishpapash huaquinbica huasicunapica pitapash na tupan. Ñucanchicunata shina pasajujpi na desanimarishpa villachishpa catinami capanchi. Horasta cambiapashunchi. Gentecuna huasipi cana horaspi villachishpaca ashtahuanmi gentecunahuanga parlai ushapashun. Gentecunaca maimandapash siempremi huasigumanga muyumun. Ashtaca huauquipanicunaca chishillapi o tutayajujpi villachishpaca ashtahuan gentecunatami tarishca. Chishicunapica gentecunaca ashtahuan tranquilo caimandami villachijpica uyana munaitapash charin. w21.05 pág. 15 párrs. 5, 7

¿Cunanbipashchu chashnallata pasajun? Ari. Ashtaca gentecunaca testigo de Jehovacuna cumpleañoscunata, navidadcunata na rurajta ricushpami ñucanchitaca culiran. Shinapash caicunata rurachunga Bibliapica na mandajunllu. Shinallata shujcunaca llactapa fiestacunapi na participajpi, pipash huañujpi imapash costumbrecunata na catijpimi ñucanchitaca culiran. Talvez paicunaca, ”Taita Diospa ñaupajpica alitami ruranajunchi” yashpami shina ruran. Shinapash cai mundopa costumbrecunatara catishpa Bibliapi mandashcashna imatapash na rurajpica, Jehová Diosca na chasquingachu (Mar. 7:8-9). ¿Imata ama pandachi tucuchunga ayudanga? Jehovapa mandashcacunata, paipa yachachishcacunata juyanami ama pandachi tucuchun ayudanga (Sal. 119:97, 113, 163-165). Jehová Diosta juyashpaca pai nalicachishca cosascunataca na rurashunllu. Ashtahuangarin pai munashcatalla rurangapaj imapash cosascuna jarcachunga na saquishunllu. w21.05 pág. 6 párrs. 15-16

Apóstol Pablopa cai consejotaca ¿imashinata pactachi ushapanchi? Tucui shunguhuan crishpa catingapaca Bibliatami ali ali yachajushpa catina capanchi. Shinallata Jehová Diostaca cutin cutinmi mañana capanchi. Diospa Reinomanda Jehová villachichun mingashcatapashmi siempre pactachina capanchi (2 Tim. 4:4). Jehová Diospi tucui shunguhuan crishpaca testigo de Jehovacunamanda imapash llullacunata uyashpaca na manllashunllu (Is. 28:16). Jehová Diosta, Bibliapa yachachishcacunata, huauquipanicunata juyanami Jehová Diosta saquishcacuna ñucanchita ama umachichun ayudanga. Jesuspa tiempopica ashtacacunami Jesús Mesías cashcataca na crirca. Shinapash ashtacacunaca Jesuspica crircami. Paicunapurapica Sanedrinmanda shuj jarillapash, ashtaca sacerdotecunapashmi Jesuspica crirca (Hech. 6:7; Mat. 27: 57-60; Mar. 15:43). Cunan punllacunapipash ashtaca millón gentecunami Jesusta catinata decidishca. ¿Imamandata shina rurashca? Paicunaca Bibliamanda yachajushpa, Bibliapi nishcacunata juyaimandami Jesusta catinataca decidishca. Diospa Shimi Bibliapica: “Can mandashcata juyajcunaca, casilla ali causaitami charin. Paicunapaca, imapi nitijanapash na tianllu” nijunmi (Sal. 119:165). w21.05 pág. 13 párrs. 20-21

Apóstol Pabloca Jehová Diosta sirvingapaj imata rurashpapash, Jehová Dios ayudajushcamandallami rurai ushashcata cuenta japirca. Jehová Diosca, Pablo villachishpa catichunga paipa espíritu santota cushpami ayudarca. Chaimandami llaquicunata, problemacunata charishpapash, carcelpi churai tucushpapash Jehová Diosmandaca villachishpa catirca. Jehová Diosca Timoteotapashmi paimanda villachishpa catichunga ayudarca. Timoteoca apóstol Pablo shuj shuj llactacunapi villachingapaj rijpimi cumbashpa rirca. Shinallata Pabloca Timoteotaca huaquin viajecunatami shuj shuj congregaciongunapi huauquipanicunata visitachun, animachun cacharca (1 Cor. 4:17). Caicunata pactachinaca Timoteopaca shinllimi ricurishcanga. Chaita ricushpami Pabloca Timoteotaca, “quiquin joven cashcamanda, pipash quiquinda na valichichunga na saquinachu cangui” nishcanga (1 Tim. 4:12). Shinallata chai tiempopica Timoteopashmi cuerpopica shuj nanaita charirca. Bibliapica Timoteo cada rato irquiyan cashcatami ricuchin (1 Tim. 5:23). Shinapash Timoteoca Jehová Diosmanda villachingapaj, huauquipanicunata ayudangapaj Jehová Diosllata paipa espíritu santota cushpa ayudanataca seguromi carca (2 Tim. 1:7). w21.05 pág. 21 párrs. 6-7

Santiago 1:19​pi shimicunaca consejocunata cujcunapaca alipachami can. Chai textopica: “Uyangapaca listomi cana capanguichi. Uyangapaj listo cashpapash na ñapash imatapash ninajunachu capanguichi, ni ñapash culirajllapash na canachu capanguichi” nijunmi. Anciano huauquica shuj panigupa o shuj huauquigupa causaimandaca alimi yachanitaca na yuyanachu can. Proverbios 18:13​pica, “narapash uyashpata imatapash tigrachijlla runaca, muspa runashnami nalicachishpa rimai tucun” nijunmi. Shinaca shuj huauquigu o shuj panigu imashinapacha cashcata yachangapaca paicunatami directamente tapuna capanchi. Chaipaca ali uyanatami yachajuna capanchi. Chaimi ancianocunaca cashna tapuita ushanman: “¿Imanallata capashcangui? ¿Imapita ayudai ushani?” nishpa. Shinaca ancianocuna shuj huauquicuna imashinapacha cajta yachangapaj esforzarishpaca, talvezpashmi chai huauquita o chai panitaca animaita ushan. Pitapash consejangapaca Bibliamanda huaquin textocunata liishpa, chai textocunapi imata nishcata uyachishpa consejanallaca na minishtirinllu. Ashtahuangarin huauquipanicunaca paicunata intindimanda ayudangapaj munashcatami ricuna can. w22.02 pág. 17 párrs. 14-15