Angelcunaca ¿ayudanllu?

Curazao llactapi causanajuj Kenneth y Filomenaca, shuj cusahuarmiman Bibliamanda yachachingapami, shuj domingo chishita rirca.

Kennethca ninmi: “Chayajpica, pungupash vichashcami carca. Paicunapa carropash illarcami. Shinapash, cayanayajpimi, chai huarmiguta telefonopi cayarcani” nishpa.

Huarmiguca, ñuca cusaca trabajajunmi nishpami contestarca. Shinapash Kenneth y Filomena paipa huasi pungupi shayanajujta yachashpami, punguta pascashpa ucuman yaicuchirca.

Paicunaca yaicushcandimi chai huarmigu huacajushcata cuenta japirca. Bibliata yachajui callaringapaj, Kenneth oracionda rurai callarijpica, cutinmi chai huarmiguca huacai callarirca. Chaimi, Kennethpash, Filomenapash imata pasangui nishpa aliguman tapuchirca.

Tapuchijpimi chai huarmiguca nirca, ñucaca cunan chishi huañuchirigrijushpami, ñuca cusaguman shuj cartata escribijurcani nishpa. Shinapash Kenneth telefonopi cayajpimi, na huañuchirirca. Chai huarmiguca depresión ungüitami charishcarca. Chaimandami paita animangapaj huaquin textocunata liirca. Shinami paica animarirca.

Kennethca ninmi: “Cai llaquilla huarmiguta ayudai ushashcamandaca, Jehová Diostami agradicinchi. Paimi paipa angelcunahuan o paipa espíritu santota cushpa ñucanchitaca chai huarmiguta cayachun animashcanga” nishpa.a

Shinaca Kenneth y Filomena nishca shinaca ¿ciertochu shuj angelhuan o paipa espíritu santota cushpa Taita Diosca paicunata ayudarca? ¿O cayana cashcamandallachu Kennethca chai huarmiguta cayarca?

Na yachapanchichu. Shinapash Bibliapica yachachinmi, Taita Diosca angelcunahuanmi gentecunata paimanda yachajuchun ayudan nishpa. Shuj ejemplota Bibliapi ricupashun. Apostolcunapa punllacunapica, Etiopía llactamanda shuj runagumi Taita Diosmanda yachajungapaj munajurca. Taita Diosca shuj angelta cachashpami, Felipe shuti runagutaca chai runagupaman richun ayudarca (Hechos 8:26-31).

Ashtaca religiongunapica yachachinmi, angelcunaca tianmi, huaquin angelcunaca alimi can, Taita Diospa munaitami pactachinajun, gentecunata cuidanajunmi nishpa. Cutin shuj gentecunaca, angelcuna paicunata ayudanajujtaca seguropachami can. Cutin shujcunaca angelcuna tiajtaca na crinllu.

Shinaca ¿ciertochu angelcunaca tian? Cierto tiashpaca ¿imashinata tiai callarirca? ¿Imatata Bibliaca yachachin? Gentecunata ¿ayudanllu? Ricupashun.