CALLARI TEMA | ANGELCUNACA TIANLLU? ¿AYUDANLLU?
Angelcunamandaca ¿imatata Bibliaca yachachin?
Angelcunaca ¿imashinata can? ¿Imashinata tiai callarirca? ¿Imatata ruran? Chaicunata ali yachangapaj munashpaca Bibliatami ricuna capanchi (2 Timoteo 3:16). Shinaca, Biblia imata nijta ricupashun.
Taita Diosca espiritumi can. Paita ricuitaca na ushanchichu. Angelcunapash na ricui ushanalla espiritucunami can. Paicunaca gentecunashna ‘aichayu, tulluyuca’ na canllu. Ali angelcunaca cielopimi causan. Taita Diospa ñaupajpimi caita ushan (Lucas 24:39; Mateo 18:10; Juan 4:24).
Huaquinbica, Taita Diospa munaita pactachingapami, gentecunashna tucushpa cai Alpaman shamushca. Shinapash, Taita Diospa munaita ña pactachishpaca, cutinmi espiritucuna tucushca (Jueces 6:11-23; 13:15-20).
Angelcunaca siempremi jari gentecunashna ricurishca. Bibliapipash jaricuna cajpishnami parlan. Shinapash angelcunaca ni jari, ni huarmi na canllu. Angelcunaca na cazaranllu, huahuacunatapash na charinllu. Huahuacuna o jatun gentecuna huañushpa angelcuna tucushcapash na canllu. Angelcunaca Taita Diospa rurashcacunami can. Chaimandami Bibliapica nin, angelcunaca ‘Taita Diospa churicunami’ can nishpa (Job 1:6; Salmo 148:2, 5).
Bibliapica ninmi: ‘Gentecunapa rimaicunapash, angelcunapa rimaicunapashmi’ tian nishpa. Shinaca, angelcunapashmi paicunapa shimipi parlaita ushan. Gentecunahuan parlangapaca, angelcunatami Taita Diosca utilizashca. Shinapash, paicunata adorachun, paicunata mañachunga na munanllu (1 Corintios 13:1; Apocalipsis [Revelación] 22:8, 9).
Ashtaca millón millón angelcunami tian (Daniel 7:10; Apocalipsis 5:11).
Angelcunaca ashtaca ushaitami charin. Gentecunatapash yali ashtaca yachaitami charin. Ashtahuangarin, gentecunapash na intindij ushajtami, ñapash shuj shuj ladocunaman cuyurinlla (Salmo 103:20; Daniel 9:20-23).
Gentecunamanda yali ushaita, yachaita charishpapash na tucuita yachai ushanllu (Mateo 24:36; 1 Pedro 1:12).
Angelcunaca Taita Diosman rijchaj rurashcacuna caimandami, Taita Dios charishca cualidadcunata charin. Cada unomi imata ruranata agllai ushan. Chaimandami gentecunashnallata alita, nalitapash agllai ushan. Shinapash, huaquin angelcunaca Taita Diosta na cazunatami agllarca (Judas 6).