Pipash cangunata pactarallapash pandachinman

1. Colosenses 2:4, 8​pi nishca shinaca ¿imashinata Diabloca gentecunataca umachin?

DIABLOCA Jehová Diospa contra tucuchunmi munan. Chaimandami ñucanchicuna imashna pensajta ricushpa Diabloca pandachingapaj munan. Shinallata Diabloca ñucanchi munaicunata utilizashpa paishna pensachun, paishna rurachunmi munan (Colosenses 2:4, 8, liingui).

2, 3. a) Colosenses 2:8​pi shimicunataca ¿imamandata cazunaca minishtirishcapacha can? b) Cai temapica ¿imatata yachajupashun?

² Diablo ñucanchita umachichun saquinaca llaquipachami can. Cunanga apóstol Pablo Colosenses 2:8​pi shimicunata picunaman nishcata yaripashunchi. Chai shimicunataca Jesusta na catijcunamanga apóstol Pablo na nircachu. Ashtahuangarin Jehovapa espíritu santohuan agllashca ungido huauquipanicunamanmi shina nijurca (Col. 1:2, 5). Chai tiempopi huauquipanicunataca Diablomi pandachingapaj munarca. Shinallatami ñucanchicunatapash pandachingapaj munan (1 Cor. 10:12). ¿Imamandata shina nipanchi? Diabloca cai alpamanmi shitai tucurca. Chaimi Diabloca Jehovata sirvijcunata catiriashpa pandachijun (Apoc. 12:9, 12, 17). Shinallata cunanbi gentecunaca “nalitalla rurashpa, shujcunata pandachijcunaca ashtahuan ashtahuanmi naliman tigranga” nishca tiempopimi causanajupanchi (2 Tim. 3:1, 13).

³ Gentecunata Diablo imashina ‘yanga parlocunatalla parlashpa’, llullacunahuan pandachijtami cai temapica yachajupashun. Shinaca quimsa panda yuyaicunahuan cunanbi gentecunata Diablo imashina umachijtami yachajupashun (Efes. 6:11). Cutin cati temapica chai panda yachachishcacunahuan ñucanchi yuyaicunapi ama pandachichunmi yachajupashun. Pundapica Jehová Dios carashca alpacunaman yaicushca jipa israelitacunata Diablo imashina umachishcatami yachajupashun. Ñucanchicunapash ¿imatata chaicunamandaca yachajupanchi?

YANGA DIOSCUNATA SIRVICHUNMI DIABLOCA PANDACHIRCA

4-6. Deuteronomio 11:10-15​pi nishca shinaca Jehová Dios carashca alpacunapi israelitacuna causanajushpaca ¿imatata alpacunata tarpunamandaca yachajuna carca?

⁴ Israelitacuna yanga dioscunata sirvichunmi Diabloca pandachirca. Israelitacunata pandachingapaca micunata minishtijujta ricushpami Diabloca paicunata pandachirca. Israelitacunaca Jehová Dios carashca alpacunaman yaicushpaca alpacunata imashina tarpunatami yachajuna carca. Egipto llactapi israelitacuna causashpaca río Nilo nishcamanda yacuta japishpami tarpushcacunapi yacuta regan carca. Shinapash Jehová Dios carashca alpacunapi yacuta regangapaca yacuca illanmi carca. Chaimi paicunaca tamiachun shuyan carca (Deuteronomio 11:10-15, liingui; Is. 18:4, 5). Shinaca chai alpacunapi imashina tarpushpa trabajanatami yachajuna carca. Ashtahuanbash alpacunata trabajanata yachaj israelitacuna chaquishca pambacunapillata huañushca caimandami, paicunapaca alpapi trabajanaca ashtahuan shinlli ricurirca.

⁵ Israelitacunapa causai cambianatami Jehová Diosca villarca. Jehová Diosca imashina alpacunata tarpunata pundapi yachachinapa randica caita nishpami israelitacunamanga mandarca: “Shina cashcamanda cangunapaj shungupi pandarinata, Diosmanda anchurishpa, shuj dioscunatara servishpa, paicunapaj ñaupajpi cungurinataca cuidarinami canguichi” nishpa (Deut. 11:16, 17). Jehová Diosca alpacunata imashina tarpunata parlajushpapash ¿imamandata israelitacunataca yanga dioscunata pactara sirvinguichiman nirca?

⁶ Jehová Diosca alimi yacharca, israelitacuna yanga dioscunata sirvij gentecuna imashina tarpuj cashcata yachangapaj munashcata. Canaán llactamanda gentecunaca alpacunata imashina tarpunataca alipachami yacharca. Cutin Jehovata sirvij israelitacunaca alpacunata tarpunata na ali yachaimandami chai gentecunamanda yachajungapaj munanajushcanga. Shinapash yanga dioscunata sirvijcunamanda yachajunaca israelitacunapaca nalipachami carca. Canaán llactamanda gentecunaca Baal yanga diosta sirvimandami panda crishcacunata charirca. Paicunaca Baal diosmi cielopa dueño caimanda tamiata caran nishpami crin carca. Chaimi Jehová Diosca israelitacuna shina pandata crishpa umachi tucuchunga na munarca. Shinapash israelitacunaca cutin cutinmi Baal yanga diosta sirvi callarirca (Núm. 25:3, 5; Juec. 2:13; 1 Rey. 18:18). Shinaca Diabloca ¿imashinata israelitacunata pandachi usharca? Ricupashunchi.

DIABLOCA ¿IMASHINATA ISRAELITACUNATA PANDACHIRCA?

7. Jehová Dios carashca alpacunapi cashpaca ¿imatata israelitacunaca rurai callarirca?

⁷ Pundapica: Tamiachun munaihuanmi Diabloca israelitacunataca pandachirca. Jehová Dios carashca alpacunapica abril quillamanda septiembre quillacamanga ashatallami tamian carca. Octubre quillamanda callarishpami ashtahuan tamian carca. Chaimi tarpushcacunapash ali fucun carca. Chaita yachashpami Israel llactapi ladolla tiaj shuj llactacunapica tamiachun nishpami yanga dioscunaman imacunatapash ruran carca. Chai yanga dioscunata sirvishpaca ali fucun nishpami Diabloca israelitacunataca crichirca. Jehová Diospi na crij israelitacunaca chai yanga dioscunaman imacunatapash rurashpallami tamianga nishpa crirca. Chaimi chai israelitacunaca Baal yanga diosman imacunatapash rurashpa sirvinajurca.

8. Catipica ¿imashinata israelitacunataca Diabloca umachirca?

⁸ Catipica: Nali munaicunahuanmi israelitacunataca Diabloca umachirca. Chai llactacunapi yanga dioscunata sirvingapami millanai nali cosascunata ruran carca. Por ejemplo yanga dioscunata sirvingapaj huasicunapica culquimanda huainayaj jaricuna, huarmicunami tiarca. Shinallata chai llactacunapica jaripura, huarmipura huainayanata, shuj nali ruraicunatapashmi alitashna ricun carca (Deut. 23:17, 18; 1 Rey. 14:24). Shina rurashpami dioscunaca alpapi ali fucuchun ayudanga nishpa paicunaca crin carca. Ashtaca israelitacunaca chai nali ruraicunata rurangapaj munaimandami yanga dioscunata sirvi callarirca. Chai israelitacunaca Diablo paicunata umachichunmi saquirca.

9. Oseas 2:16, 17​pi nishca shinaca Jehovapa shutita israelitacuna ñana utilizachunga ¿imashinata Diabloca umachirca?

⁹ Ultimopica: Jehovapa shutita ñana utilizachunmi Diabloca israelitacunataca umachirca. Profeta Jeremiaspa punllacunapica Jehová Diosca cashnami nirca, llullashpa villaj profetacunaca israelitacuna ñucapa shutitaca ñana utilizachunmi umachinga nishpa. Chai profetacunaca Baal yanga diostami sirvi callarirca. Israelitacunapash shina rurachunmi umachinajurca (Jer. 23:27). Israelitacunaca Jehovapa shutita utilizanata saquishpami Baal diospa shutitara utilizai callarirca. Baal shutica “Dueño” o “Amo” ningapami munan. Shinami Jehovata sirvij israelitacunaca Jehovata sirvinata, Baal diosta sirvinata igual can nishpami pensai callarirca. Chaimi israelitacunaca Baal diosta sirvingapaj imacunata ruranajushpapash shinallata Jehovata sirvingapaj rurai callarirca (Oseas 2:16, 17, liingui).

CUNANBIPASH ¿IMASHINATA DIABLOCA ÑUCANCHICUNATA UMACHINGAPAJ MUNAN?

10. ¿Imacunahuanllata Diabloca gentecunata umachin?

¹⁰ Cunanbipashmi shinallata Diabloca ñucanchicunata umachingapaj munan. Ñucanchi munaicunata ricushpa, shuj jarihuan, shuj huarmihuan cana munaicunahuan, Jehovapa shutita ñana utilizachunmi Diabloca umachin. Pundapica Jehovapa shutita ñana utilizachun imashina umachijtami yachajupashun.

11. Jehovapa shutita ama utilizachunga Diabloca ¿imatata rurarca?

¹¹ Jehovapa shutita ñana utilizachunmi Diabloca gentecunata umachishca. Apostolcuna huañushca jipaca, huaquin Jesusta catinchi nij tucushcacunaca panda yuyaicunatami yachachi callarirca (Hech. 20:29, 30; 2 Tes. 2:3). Chai apostatacunaca Jehovapa shutita ñana utilizachunmi pandachi callarirca. Por ejemplo, paicunaca shuj Bibliacunapi Jehovapa shutita churanapa randica “Mandaj Dios”, “Taita Dios” o “Señor” nishpami churashca. Shina churaimandami Bibliata liijcunaca Jehová Dios pipacha cajtaca na rijsi ushashca. Shinallata shuj dioscunamanda Jehová Dios diferente cashcatapashmi Bibliata liijcunaca na intindi ushashca (1 Cor. 8:5). Ashtaca Bibliacunapica Taita Diosmanda parlangapaj, Jesusmanda parlangapapashmi “Señor” nishpa churashca. Chaimi Jehová Diospash, Jesuspash igual cashcata gentecunaca intindishca (Juan 17:3). Chaita na ali intindimandami gentecunaca Jehová Diospash, Jesuspash, espiritu santopash shujllami can nishpa cri callarirca. Shinapash Bibliapica ni maipi na chaitaca yachachinllu. Jehovapa shutita Bibliapi na churashcamandami gentecunaca Taita Diostaca na rijsi ushanchichu nin. Chaica shuj jatun llullami can (Hech. 17:27).

12. a) Panda religiongunaca ¿imatata yachachishca? b) Romanos 1:28-31​pica ¿imatata apóstol Pabloca nirca?

¹² Diabloca nali munaicunahuanmi gentecunataca umachin. Punda tiempopi israelitacuna huainayana juchapi urmachunmi panda religionda Diabloca utilizarca. Cunanbipash shinallatami pandachin. Por ejemplo, panda religiongunaca Taita Diosta na cazushpami nara cazarashpallata shuj jarihuan, shuj huarmihuan pacta puñunaca alimi can nishpa yachachishca. Chaimi Taita Diosta sirvinchi nij tucushca gentecunaca chaitaca alitashna ricui callarishca. Caimandami apóstol Pabloca paicuna imashna cashcata Romanos libropica escribishpa saquirca (Romanos 1:28-31, liingui). Apóstol Pabloca nircami, ‘napash ruranacunaca’ nara cazarashpa shuj jarihuan, shuj huarmihuan pacta puñuna, jaripura, huarmipura pacta puñuna cashcatami nijurca (Rom. 1:24-27, 32; Apoc. 2:20). Imashinami ricupanchi, ñucanchicunaca Bibliapa yachachishcacunata cazungapami esforzarina capanchi.

13. ¿Diabloca imacunahuanllata gentecunataca umachin?

¹³ Diabloca ñucanchi munaicunahuanmi umachingapaj munan. Ñucanchi familiata mantiningapaj, ñucanchi minishtirishcaguta charingapaj imatapash estudiana munaita charinaca alimi can (1 Tim. 5:8). Chaimi escuelaman o colegioman estudiangapaj rinchi. Shinallata ali estudiantecuna cangapapashmi esforzaripanchi. Shinapash cuidadota charinami capanchi. Ashtaca llactacunapica escuelacunapi, colegiocunapica estudiantecunapa causaipa ali yachachishpapash, gentecunapa yachachishcatapashmi profesorcunaca yachachin. Shinallata Taita Dios na tianllu nishpa, Bibliaca nimapa na sirvinllu nishpapashmi yachachin. Ashtahuanbash evolución nishcamandallami cai alpapi causai tiai callarishca nishpapashmi yachachin (Rom. 1:21-23). Gentecunapa yachachishcacunaca ‘Taita Diospa ali yachaihuanga’ na igual canllu (1 Cor. 1:19-21; 3:18-20).

14. Gentecunaca ¿imatata yachachin?

¹⁴ Gentecunapa yachachishcacunaca Taita Diospa mandashcacunata na sirvishcatami ricuchin. Chai gentecunaca Taita Diospa espirituta charishcataca na ricuchinllu. Ashtahuangarin shina gentecunamandaca Bibliapica cashnami nin: Paicunapa ‘munaitalla rurashpa causajcunami’ can nishpa (Gál. 5:19-23). Shina gentecunaca jatun tucushcacuna, paicunapilla pensarij gentecunami can. Chaimi paicunaca paicunapilla pensarishpa causan (2 Tim. 3:2-4). Cutin Jehová Diosca paita sirvijcunaca humilde gentecuna cachunmi munan (1 Ped. 5:5). Universidadpi estudiaj huaquin Testigocunahuanga ¿imata pasashca? Paicunaca gentecunapa yachachishcacunahuan pandachi tucushpami cai mundomanda gentecunashna pensari callarishca. Chai yachachishcacunata catimandami Jehová Dioshnaca ñana pensanllu. Chaipaca shuj ejemplota ricupashunchi.

15, 16. Shuj panigumandaca ¿imatata yachajupanchi?

¹⁵ Tiempo completopi 15 yali huatacunata sirvijuj shuj panigumanda yachajupashunchi. Paica ninmi: “Universidadpi estudiashpaca ashtaca llaquicunata charishcatami shujcunamandaca uyashca carcani. Ñucaca ña bautizarishcami carcani. Universidadpi estudiajuimanda ashtaca llaquicuna tian nishcatapash na cazushpami ñucaca estudiai callarircani” nishpa. Jipamanga ¿imata paihuanga pasarca? Paillatami cashna nin: “Estudiajuimanda yapa ocupada caimandaca Jehovata mañangapajpash na tiempota charircanichu. Nara estudiashpaca siempremi Jehovata mañan carcani. Shaijushca caimandaca Bibliamanda shujcunaman villachishpapash na cushilla sintirinllu carcani. Yapata shaijushca sintirimandaca tandanajuipa ali prepararitapash na preparari ushanllu carcani. Universidadpi yapata estudiajuimanda Jehová Dioshuan nali cashcatami cuenta japircani. Chaimi estudianataca saquina cashcata cuenta japishpa estudianataca saquircani” nishpa.

¹⁶ Universidadpi estudiaimandaca ¿imata chai paniguhuanga pasarca? Paillatami cashna nin: “Universidadpi estudiajushpaca shujcunata nalicachishpami ricui callarircani. Ashtahuanbachaca turiñañacuna imata rurashcatapash nalicachishpami ricun carcani. Shina pensaimandami turiñañacunamandapash caruyai callarircani. Chaita rurashcamanda cunanbi yarishpaca ninandami pinganayan. Turiñañacunahuan cutin ali cangapaca ashtaca tiempomi yalirca” nishpa. Chai paniguca ¿imatata yachajurca? Paica ninmi: “Jehová Diospa organizacionhuan, Jehová Diospa yachachishcacunata na cazunaca nalipacha cashcatami yachajurcani. Ñucataca Jehová Diosmi alipacha rijsihuan. Pundamanda Jehovata cazushca cashpaca imapash llaquicunataca na charinmanllu carcani” nishpa.

17. a) Ñucanchicunaca ¿imatata rurana capanchi? b) Cati temapica ¿imatata yachajupashun?

¹⁷ Ñucanchicunata Diablo ‘yanga parlocunahuan parlashpa pandachichunga’ ama saquipashunchichu. Diablo ama pandachichun cuidaripashunchi (1 Cor. 3:18; 2 Cor. 2:11). Diabloca Jehovata ama sirvichun, Jehovata cungachunmi munan. Shina pandachichunga ama saquipashunchichu. Jehová Dios yachachishcacunata siempre cazupashunchi. Diabloca Jehovata na cazuchunmi munan. Shinaca Diablotaca na cazunachu capanchi. Cai mundomanda gentecunapa yuyaicuna ñucanchita ña pandachijujta cuenta japishpaca ¿imatata uchashpa rurana capanchi? Cati temapica panda yachachishcacuna, “shinllipacha shayanajuj patacunatashna” yanga costumbrecunata mishachun Biblia imashina ayudajtami yachajupashun (2 Cor. 10:4, 5).