“¿Picunata Jehová Diospa munaita ruranajun?” nishca folletohuanga ¿imashinata yachachishun?

Cai folletomi Bibliamanda yachajuj gentecunataca Jehová Diospa organizacionda rijsichun ayudanga

1. ¿Picunata Jehová Diospa munaita ruranajun? folletoca ¿imashinata Bibliamanda yachajujcunataca ayudanga?

¹ Ñaupa quillacunapica ¿Picunata Jehová Diospa munaita ruranajun? folletotami chasquircanchi. ¿Ñachu cai folletohuan yachachinajupashcanchi? Bibliamanda yachajujcunataca ¿imashinata cai folletoca ayudanga? 1) Jehová Diosta sirvijcunata rijsichun, 2) ñucanchicuna imata rurajujta yachachun, 3) Jehovapa organización imashina trabajajta rijsichunmi ayudanga. Cai folletopa cada hojapimi shuj lección tian. Shuj lecciondaca 5 ó 10 minutocunapillami yachachita ushanchi.

2. Cai folletoca ¿imashinata can?

² Cai folletoca ¿imashinata can? Cai folletoca quimsa partecunatami charin. Cai quimsa partecunaca Jehovapa organización imashina cajta, párrafo 1pi quimsa yuyaicunata intindichunmi ayudan. Shinallata 28 lecciongunatami charin. Chai lecciongunapa titulocunaca shuj tapuimi can. Cada leccionbi subtitulocunaca yana letracunapimi tiajun. Chai subtitulocunami titulopi tapuicunata contestan. Tucuilla folletopica 50 yali llactacunamanda fotocunami tian. Cada foto urachaquipica maijan llactapi fotota tomashcatami villajun. Shinami mundo enteropi villachijushcata ricuchin. Tauca lecciongunapica “Caita rurapangui” nishca recuadromi tian. Cai recuadromi Bibliamanda yachajujcunata ayudan.

3. ¿Imashinata cai folletohuan yachachishun?

³ ¿Imashinata cai folletohuanga yachachishun? Primeroca cada leccionba titulopi tapuitami rurana canchi. Parrafocunata liishpaca subtitulocunamandami ashtahuan yachachina can. Jipamanga cada leccionba último tapuicunatami repasana can. Munashpaca tucuilla leccionda liishpa o cada parrafota liishpa yachachinallami can. Maijan textocunata liinatapash aligutami agllana can. Fotocunamanda, “Caita rurapangui” nishca recuadromandapash yachachinami can. Cai folletota callarimanda yachachina cashpapash huaquinbica shuj leccionman yalishpa yachachinallami can. Shuj ejemplota ricupashun. Jatun Tandanajui punllacuna ña chayamujujpica lección 11ta yachachinallami can.

4. ¿Imamandata cai folleto llujshishcamandaca ninanda cushijupanchi?

⁴ Bibliamanda yachachishpami gentecunataca Jehovata rijsichun ayudanchi. Shinapash cai folletomi gentecunata Jehová Diospa organizacionda rijsichun ayudan (Prov. 6:⁠20). Cai folleto llujshishcamandaca ninandami cushijunchi.