GENTECUNATA JUYACHUNGA ¿IMATA AYUDANGA?
2 | Na vengarinachu capanchi
Bibliapica ¿imatata nin?
ROMANOS 12:17-19pica cashnami nin: “Pipash cangunata nalita rurajpica, na chashnallata tigrachinachu capanguichi. Shujcunahuan tranquilo aliguta causangapaca, tucui rurai ushashcata rurapaichi. Juyashca huauquicuna, pipash quiquingunata llaquichijpica, na chashnallata nalita rurashpa tigrachinachu capanguichi. Porque Taita Dios escribichishca shimipica nijunmi: ‘Ñucami vengarisha. Ñucami paicunamanga paicuna imata miricishcata cusha’ ninmi Jehová Diosca”.
Caica ¿imata significan?
Ciertomi pipash ñucanchita llaquichijpica ninanda culiranchi. Shinapash Taita Diosca ñucanchicuna vengarichunga na munanllu. Más bien tucuita paipa maquipi saquichunmi munan. Paimi tucui imapash injusticiacunataca arreglasha nin (Salmo 37:7, 10).
Caita rurapai:
Pipash quiquinda llaquichijpi vengarinaca ashtahuan contrarishpa, nimamanda na ricunayachishpa causaimanmi apan. Chaimandami ama vengaringapaj controlarina capanchi. Chaimandami masqui pipash llaquichijpipash mejor controlarishpa, cungana capanchi (Proverbios 19:11). Pero si de pronto pipash quiquinda llaquichijpica quiquin munashpaca chai problemata arreglangapaca talvez autoridadcunapaman rita ushapangui.
Vengarishpaca ñucanchillatami dañota rurarinchi
De pronto quiquin shuj personahuan charishca problemata tranquilo, aliguta arreglaita na usharijpi o chai problemata arreglangapaj imagutapash ali modos rurashca jahua, pero nimamanda na arreglarita ushashpaca ¿imatata rurana capangui? Talvez chai problemata na arreglaita ushashpapash, ama vengaripanguichu. Chaipa randica tucuita Taita Diospa maquipi saquipangui. Taita Diospi confianamanda parlashpami Salmo 37:3-5pica cashna nin: “Paitalla yariashpa causai. Paica, imata cashpapash rurangallami” nishpa.