2 | ‘Taita Dios escribichishca shimimi shinlli tucuchun ayudan’

BIBLIAPICA NINMI: “Punda tiempopi Taita Dios escribichishca shimica, ñucanchita yachachingapami can. Shinami shamuj punllacunapi Taita Dios imata caranataca shuyai ushashun. Ashtahuangarin Taita Dios escribichishca shimimi, ñucanchitaca shinlli tucuchun y aguantachun ayudan” (ROMANOS 15:4).

¿Imatata nisha nin?

Bibliapi escribishca shimicunaca shinlli tucuchun, aguantachun, nali yuyaicuna shamujpipash, ñaupaman catichunbashmi ayudan. Shinallata, shamuj punllacunapica emocionalmente unguicuna ñana tianatami villan.

Bibliaca ¿imashinata ayudan?

Huaquinbi llaquilla, preocupado sintirinaca normalmi can. Shinapash depresión, ansiedad unguicunahuan sufrijcunaca, casi cada punllami shina sintirin. ¿Imashinata Bibliaca ayudaita ushan?

Bibliapica ashtaca cushichij yuyaicunami tian. Chai ali yuyaicunaca, ñucanchi charishca nali yuyaicunatami mishai ushan (Filipenses 4:8). Bibliapa ayudahuanmi, ñucanchi umapi ali yuyaicunata charishpa tranquilo sintirinchi, ñucanchi yuyaicunatapash controlai ushanchi (Salmo 94:18, 19).
Bibliapa yuyaicunaca imapapash na sirvijshna ama sintirichunmi ayudan (Lucas 12:6, 7).
Bibliapi historiacunaca na ñucanchilla cashcata, ñucanchijta ruraj Taita Dios ñucanchi imashapacha sintirishcata ali intindij cashcatami ricuchin (Salmo 34:18; 1 Juan 3:19, 20).
Bibliapica ninmi, ñucanchita llaquichij yuyaicunataca Taita Diosca anchuchingami nishpa (Isaías 65:17; Apocalipsis 21:4). Preocupachij yuyaicunata charijpica, tal vez cai promesami ñaupaman catichun fuerzata cushpa ayudanga.

Jessicataca ¿imashinata Bibliaca ayudashca?

Depresión unguica cashnami ñucataca afectahuashca

“25 huatacunata charishpaca, crisis nerviosa nishcatami charircani. Chaimi depresión crónica unguitami charingui nihuarca. Ñuca umamanga ñapashmi cutin cutin punda punllacunapi pasashca llaqui, nali yuyaicuna shamushpa llaquichin carca. Na controlai ushanllu carcani. Doctorcunaca punda pasashca traumacunamandami nali yuyaicunata charishpa, depresión unguita charingui nishpami explicahuarca. Jambicunahuan ayudachunmi minishtircani. Shinallata, imamandapacha shina pensamientocuna llaquichijta yachangapami shuj especialistata mascarcani”.

Bibliaca cashnami ayudahuashca

“Depresionhuanpacha cajpimi, ataques de pánico nishcacuna, ansiedadpash atacan carca. Chaimi puñuitapash na puñui ushan carcani. Ashtaca tutacunami nali yuyaicuna ñuca umaman cutin cutin shamujpi, llaquilla, preocupada sintirin carcani. Shinapash, Salmo 94:19pi nishcashnaca, ñuca shungu ucupi ashtaca yuyaicunahuan musparijujpica, Taita Diosmi tranquilo, cushilla sintirichun ayudahuan. Chaimandami ñuca cama ladogupica shuj Bibliata, shinallata shuj libretagupimi animota cuj textocunata anotashpa charircani. Shinaca na puñui ushashpaca, Taita Dios paipa Shimihuan consolachunmi saquin carcani.

”Bibliapica yachachinmi, Taita Dios yachachishca jahua nali pensamientocuna shamujpica, uchallami rechazana canguichi nishpa. Por ejemplo, pundacunaca ñucaca imapapash na sirvinichu, ñucataca pipash juyachunga na miricinichu yashpami pensan carcani. Pero ali intindijpica, Bibliapica na chaita yachachinllu. Bibliapica yachachinmi, Taita Diosca juyaj, llaquij, cada unomanda preocuparij Dios cashcata. Asha ashami ñuca pensamientocuna ñucata controlanapa randica, ñuca controlai callarircani. Imashami Dios ñucata ricun, shinallatami ñucallata ali ricuri callarishcani. Bibliapa ayudahuanmi ñucamandallata nali yuyaicunataca saqui callarishcani.

”Uchallami nali pensamientocuna, llaquichij yuyaicuna tucurina punlla chayamuchun munani. Shamuj punllacunapi salud mental unguicuna tucurinatami seguro cani. Chaita yachanami cunan punllacunapi depresión unguihuan cashpapash, ali causai tianata yachashpa ñaupaman catichun ayudahuashca”.