Davidca Imatapash Na Manllarcachu

Manllanayachishpaca ¿imatata rurangui?... Papito o mamita ayudachunllari munangui. Shinapash gentecunata yali ushaita charijmi shuj tian. ¿Pi cajta yachanguichu?... Jehová Diosmi can. Paitami ayudahuai ninalla cangui. Davidca Jehovapi confiashcamanda imatapash na manllashcatami Bibliapica parlan.

Davidtaca huahuamandapacha Jehovata juyachunmi paipa taitamamaca yachachirca. Davidca Jehová paipa amigo cajta, paita ayudanatapash yachaimandami imatapash na manllan carca. Shuj punllaca paipa llamagucunata michijujpimi, león shamushpa shuj llamaguta aparca. Davidca ¿imatashi rurarca? Davidca leonda catishpami paipa maquihuan huactashpa huañuchishcanga. Shuj osopashmi llamagucunata japingapaj munarca. Davidca chai osotapashmi huañuchirca. David ama manllanayachichunga ¿pishi ayudarca?... Jehovami ayudarca.

David imapi na manllashcatapash ricushun. Israelitacunaca Filistea llactamandacunahuanmi macanajunajurca. Filisteocunapurapica Goliat shuti jatun jatun jarirucumi tiarca. Paica israelitacunamandapash Jehovamandapashmi burlarijurca. Israelitacunataca nircami: “Pita ñucahuan macanajungapaj atrivinguichi” nishpa. Goliatta manllaimandami paihuan macanajungapaca nipi na atrivirca. Goliat nishcata uyashpaca Davidca nircami: “Ñuca sí canhuan macanajushallami. Candaca mishashami. Jehovami ñucata ayudahuanga” nishpa. Davidca imatapash na manllanllu carca ¿nachu?... Jipaman ima pasashcata ricushun.

Davidca chai jatun jatun jarirucuhuan macanajungapami picha rumicunata, paipa huaracatapash japishpa rirca. Huaracataca rumita pigangapami utilizan carian. David chairalla huambragu cajta ricushpami Goliatca paimanda burlarirca. Davidca Goliatta nircami: “Canga espadahuanmi shamujungui. Cutin ñucaca Jehová Diospa shutipimi shamujuni” nishpa. Davidca calpashpa rishpami shuj rumita huaracapi churashpa pigarca. Chai rumihuan Goliatpa frentepi huañujta chayachijpimi alpaman urmarca. Filisteocuna chaita ricushpaca ninanda manllarishpami calpai callarirca. David chairalla huambragu cashpapash ¿imamandashi chai jatun jatun jarirucutaca misharca?... Jatun jatun gentecunatapash yali ushaita charij Jehová Diosmi ayudarca.

Caipica ¿imatata yachajurcanchi?... Jehovami gentecunata yali ushaita charin. Shinaca, imatapash manllashpaca caita yuyari: Jehovami canba amigo. Paimi candaca ayudanga.